வெஸ்ட் இண்டீஸ் தொடரிலிருந்து விலகினார் ஜோஃப்ரா ஆர்ச்சர்; லுக் வுட்டிற்கு வாய்ப்பு!

வெஸ்ட் இண்டீஸுக்கு எதிரான ஒருநாள் தொடரிலிருந்து ஜோஃப்ரா ஆர்ச்சர் விலகியதை அடுத்து, லுக் வுட் இங்கிலாந்து அணியில் சேர்க்கப்பட்டுள்ளார்.

வெஸ்ட் இண்டீஸ் தொடரிலிருந்து விலகினார் ஜோஃப்ரா ஆர்ச்சர்; லுக் வுட்டிற்கு வாய்ப்பு! (Image Source: Google)

இங்கிலாந்தில் சுற்றுப்பயணம் மேற்கொள்ளும் வெஸ்ட் இண்டீஸ் அணியானது மூன்று போட்டிகள் கொண்ட ஒருநாள் மற்றும் டி20 தொடர்களில் விளையாடவுள்ளது. அதன்படி இவ்விரு அணிகளுக்கு இடையேயான ஒருநாள் தொடரானது மே 29ஆம் தேதியும் டி20 தொரானது ஜூன் 06ஆம் தேதி முதலும் நடைபெறவுள்ளது. 

வெஸ்ட் இண்டீஸூக்கு எதிரான ஒருநாள் மற்றும் டி20 தொடர்களுக்கான இங்கிலாந்து அணி சமீபத்தில் அறிவிக்கப்பட்டது. இதில் இங்கிலாந்து ஒருநாள் மற்றும் டி20 அணியின் கேப்டனாக ஹாரி புரூக் நியமிக்கப்பட்டுள்ளார். மேற்கொண்டு அதிரடி வீரர் வில் ஜேக்ஸ் ஒருநாள் மற்றும் டி20 அணிகளில் இடம்பிடித்துள்ள நிலையில், நட்சத்திர ஆல் ரவுண்டர் லியாம் லிவிங்ஸ்டோன் இங்கிலாந்து அணியில் இருந்து நீக்கப்பட்டுள்ளார். 

அதேசமயம் பில் சால்ட், லுக் வுட் மற்றும் லியாம் டௌசன் ஆகியோர் டி20 அணிக்கும், டாம் ஹாட்ர்லி ஒருநாள் அணியிலும் இடம்பிடித்துள்ளனர். மேலும் முன்னாள் கேப்டன் ஜோஸ் பட்லர் சாதரான வீரராக இந்த தொடரில் விளையாடவுள்ளார். இந்நிலையில் இத்தொடருக்கு முன்னதாக இங்கிலாந்து அணி பின்னடைவை சந்தித்துள்ளது. அதன்படி அணியின் நட்சத்திர வேகப்பந்து வீச்சாளர் ஜோஃப்ரா ஆர்ச்சர் காயம் காரணமாக தொடரிலிருந்து விலகியுள்ளார். 

இதுகுறித்து இங்கிலாந்து கிரிக்கெட் வாரியம் வெளியிட்டுள்ள அறிக்கையில், வேகப்பந்து வீச்சாளர் ஜோஃப்ரா ஆர்ச்சர் விரலில் ஏற்பட்ட காயம் கரணமாக வெஸ்ட் இண்டீஸ் ஒருநாள் தொடரில் இருந்து விலகினார். இதனையாடுத்து அவருக்கு பதிலாக இடதுகை கை வேகப்பந்து வீச்சாளர் லூக் வுட் இங்கிலாந்து ஒருநாள் அணியில் சேர்க்கப்பட்டுள்ளதாக அறிவித்துள்ளது. இதற்குமுன் லுக் வுட் இங்கிலாந்து ஒருநாள் அணிக்காக கடந்த 2023ஆம் ஆண்டு விளையாடினார் என்பது குறிப்பிடத்தக்கது. 

இருப்பினும் ஜோஃப்ரா ஆர்ச்சர் தொடரிலிருந்து விலகியுள்ளது அணிக்கு பெரும் பின்னடைவாக பார்க்கப்படுகிறது. ஏனெனில் இந்திய அணிக்கு எதிரான டெஸ்ட் தொடர் அடுத்த மாதம் நடைபெற இருக்கும் நிலையில், தற்போது ஜோஃப்ரா ஆர்ச்சர் இங்கிலாந்து டெஸ்ட் அணியில் இடம்பெறுவாரா என்ற கேள்விகளும் அதிகரித்துள்ளன. ஒருவேளை ஆர்ச்சர் இந்திய டெஸ்ட் தொடரிலும் இடம்பெறாமல் போனால் அது அணியை மேலும் பலவீனப்படுத்தும் என்று கூறப்படுகிறது. 

இங்கிலாந்து ஒருநாள் அணி: ஹாரி புரூக் (கேப்டன்), கஸ் அட்கின்சன், டாம் பான்டன், ஜேக்கப் பெத்தேல், ஜோஸ் பட்லர், பிரைடன் கார்ஸ், பென் டக்கெட், டாம் ஹார்ட்லி, வில் ஜாக்ஸ், சாகிப் மஹ்மூத், ஜேமி ஓவர்டன், மேத்யூ பாட்ஸ், ஆதில் ரஷித், ஜோ ரூட், ஜேமி ஸ்மித், லுக் வுட்.

Read More