ஐபிஎல் 2023: மீண்டும் மும்பையை வீழ்த்தி சிஎஸ்கே அபார வெற்றி!

மும்பை இந்தியன்ஸுக்கு எதிரான ஐபிஎல் லீக் ஆட்டத்தில் சென்னை சூப்பர் கிங்ஸ் அணி 6 விக்கெட் வித்தியாசத்தில் வெற்றிபெற்று அச்த்தியது.

IPL 2023: CSK won by 6 wickets against MI (Image Source: Google)

16ஆவது சீசன் ஐபிஎல் தொடரின் லீக் போட்டிகள் இறுதிக்கட்டத்தை நெருங்கி வருகின்றன. இந்நிலையில், இன்று சென்னை சேப்பாக்கம் மைதானத்தில் நடைபெற்ற ஆட்டத்தில் சென்னை சூப்பர் கிங்ஸ் மற்றும் மும்பை இந்தியன்ஸ் அணிகள் மோதின. இதில் டாஸ் வென்ற சென்னை அணி பந்துவீச்சைத் தேர்வு செய்தது. 

அதன்படி மும்பை அணியின் தொடக்க ஆட்டக்காரராக களமிறங்கிய கேமரூன் கிரீன் 2வது ஓவரிலேயே 6 ரன்களுடன் போல்டானார். அவருடன் பாட்னராக களமிறங்கிய இஷான் கிஷன் 7 ரன்களில் அவுட்டாக, அடுத்து களத்திற்கு வந்த கேப்டன் ரோஹித் சர்மா வழக்கம் போல ரன் எடுக்காமல் டக்அவுட்டானது அவரது ரசிகர்களுக்கு எந்தவித அதிர்ச்சியையும் ஏற்படுத்தவில்லை.

இதையடுத்து ஜோடி சேர்ந்த நேஹால் வதேரா - சூர்யகுமார் யாதவின் கூட்டணி 10 ஓவர் வரை விக்கெட் இழப்பில்லாமல் பார்த்துக்கொண்டது. 11ஆவது ஓவரில் ஜடேஜா வீசிய பந்துகள் சூர்யகுமார் யாதவுக்கு பின்னாலிருந்து ஸ்டெம்புகளை பதம் பார்க்க 26 ரன்களுடன் அவரும் கிளம்பினார். 

நேஹால் வதேரா ஒரு பக்கம் சிறப்பான ஆட்டத்தை வெளிப்படுத்தி சென்னை அணிகளின் பந்துகளை விளாசி மும்பை அணிக்கு ரன்களை சேர்த்துக் கொடுத்தார். டிரிஸ்டன் ஸ்டப்ஸ் அதற்கு துணை நின்றார். பின் நேஹால் வதேரா 64 ரன்களில் போல்டானார். 

அடுத்து வந்த டிம் டேவிட் 2 ரன்கள், அர்ஷாத் கான் 1 ரன்கள், டிரிஸ்டன் ஸ்டப்ஸ் 20 ரன்கள் என கடைசி 2 ஓவர்களில் மட்டும் 3 விக்கெட்டுகளை இழந்த மும்பை நிர்ணயிக்கப்பட்ட 20 ஓவர் முடிவில் 8 விக்கெட்டுகளை இழந்து 139 ரன்களைச் சேர்த்தது. சிஎஸ்கே அணி தரப்பில் மத்தீஷ பத்திரனா 3 விக்கெட்டுகளையும் தீபக் சஹார், துஷார் தேஷ்பாண்டே ஆகியோர் தலா 2 விக்கெட்டுகளையும் கைப்பற்றினர். 

இதையடுத்து எளிய இலக்கை நோக்கி களமிறங்கிய சென்னை சூப்பர் கிங்ஸ் அணிக்கு டெவான் கான்வே - ருதுராஜ் கெய்வாட் இணை அதிரடியான தொடக்கத்தைக் கொடுத்தனர். அதிலும் குறிப்பாக அர்ஷத் கான் வீசிய முதல் ஓவரிலேயே ருதுராஜ் கெய்க்வாட் அடுத்தடுத்து 2 சிக்சர், 2 பவுண்டரிகளை விளாசி அமர்களப்படுத்தினார். 

பின் தொடர்ந்து அதிரடியாக விளையாடிய ருதுராஜ் கெய்க்வாட் 16 பந்துகளி 20 ரன்களைச் சேர்த்திருந்த நிலையில், பியூஷ் சாவ்லா பந்துவீச்சில் விக்கெட்டை இழந்தார். அதன்பின் கான்வேவுடன் இணைந்த அஜிங்கியா ரஹானே 20 ரன்களைச் சேர்த்த நிலையில் பியூஷ் சாவ்லா பந்துவீச்சிலேயே விக்கெட்டை இழந்து பெவிலியன் திரும்பினார். 

அவரைத் தொடர்ந்து வந்த அம்பத்தி ராயூடுவும் 11 ரன்களில் ஆட்டமிழந்தார். பின்னர் வந்த ஷிவம் தூபே வழக்கம் போல் தனது அதிரடியான ஆட்டத்தை வெளிப்படுத்தி வானவேடிக்கையை நிகழ்த்தினார். ஆனால் மறுமுனையில் அரைசதம் கடப்பார் என எதிர்பார்க்கப்பட்ட டெவான் கான்வே 44 ரன்களில் தனது விக்கெட்டை இழந்தார். 

இருப்பினும், ஷிவம் தூபே இறுதிவரை களத்தில் இருந்து அணிக்கு வெற்றியைத் தேடிக்கொடுத்தார். இதன்மூலம் சென்னை சூப்பர் கிங்ஸ் அணி 17.3 ஓவர்களில் இலக்கை எட்டியதுடன், 6 விக்கெட் வித்தியாசத்தில் மும்பை இந்தியன்ஸை வீழ்த்தி அருமையான வெற்றியைப் பதிவுசெய்து அசத்தியது. 

Win Big, Make Your Cricket Tales Now