ஓய்வு பெறும் எண்ணம் இல்லை - ஜேம்ஸ் ஆண்டர்சன்!

சீக்கிரம் ஓய்வு பெறுவேன் என்ற எண்ணத்தில் இப்போதெல்லாம் தம்மை பார்க்கும் அனைவரும் வாழ்த்து தெரிவிப்பதாக இங்கிலாந்து வேகப்பந்து வீச்சாளர் ஆண்டர்சன் கூறியுள்ளார்

ஓய்வு பெறும் எண்ணம் இல்லை - ஜேம்ஸ் ஆண்டர்சன்! (Image Source: Google)

இந்தியாவில் சுற்றுப்பயணம் மேற்கொள்ளும் இங்கிலாந்து கிரிக்கெட் அணி அங்கு 5 போட்டிகள் கொண்ட டெஸ்ட் தொடரில் விளையாடுகிறது. இதில் கடந்த 12 வருடங்களாக உலகின் எந்த அணிக்கு எதிராகவும் சொந்த மண்ணில் தோற்காமல் இருந்து வரும் இந்தியாவை பென் ஸ்டோக்ஸ் தலைமையிலான இங்கிலாந்து அதிரடியாக விளையாடி வீழ்த்தி சாதனை படைக்கும் முனைப்புடன் விளையாட உள்ளது.

இந்த தொடரில் நட்சத்திர அனுபவ வேகப்பந்து வீச்சாளர் ஜேம்ஸ் ஆண்டர்சன் இந்தியாவுக்கு பெரிய சவாலை கொடுப்பார் என்று உறுதியாக நம்பப்படுகிறது. ஆரம்ப காலங்களில் சாதாரண பவுலராகவே வலம் வந்த அவர் நாள்கள் செல்ல செல்ல பழைய சரக்கை போல அனுபவத்தால் முன்னேற்றத்தைக் கண்டு சமீபத்திய வருடங்களில் இரு மடங்கு சிறப்பாக செயல்பட்டு வருகிறார்.

அந்த வகையில் இதுவரை 690 விக்கெட்களை எடுத்துள்ள அவர் உலகிலேயே டெஸ்ட் போட்டிகளில் அதிக விக்கெட்களை எடுத்த வேகப்பந்து வீச்சாளர் என்ற மாபெரும் சாதனை படைத்துள்ளார். இருப்பினும் அந்த சாதனையை படைத்து 41 வயது கடந்தும் கடினமான டெஸ்ட் கிரிக்கெட்டில் அவர் இன்னும் ஓய்வு பெறாமல் விளையாடுவது ரசிகர்களுக்கு ஆச்சரியமாகவே இருக்கிறது.

சொல்லப்போனால் அவருடைய பார்ட்னரான ஸ்டூவர்ட் பிராட் 38 வயதில் கடந்த ஆஷஸ் தொடருடன் ஓய்வு பெற்றார். அப்போது அவருக்கு இரு புறங்களிலும் நின்று கை கொடுத்த ஸ்டீவ் ஸ்மித் போன்ற ஆஸ்திரேலிய வீரர்கள் “நீங்களும் இப்போதே ஓய்வு பெறுங்கள்” என்ற வகையில் ஆண்டர்சனுக்கு கை கொடுத்தனர். ஆனால் இப்போதைக்கு நான் ஓய்வு பெறவில்லை என்று ஆண்டர்சன் அவர்களிடம் கைகொடுக்க மறுப்பு தெரிவித்தது ரசிகர்களை வியப்படைய வைத்தது. 

இந்நிலையில் சீக்கிரம் ஓய்வு பெறுவேன் என்ற எண்ணத்தில் இப்போதெல்லாம் தம்மை பார்க்கும் அனைவரும் வாழ்த்து தெரிவிப்பதாக ஆண்டர்சன் கூறியுள்ளார். ஆனால் இப்போதைக்கு அந்த எண்ணமே இல்லை என தெரிவிக்கும் அவர், இதுகுறித்து பேசுகையில், “இப்படி சொல்வது வேடிக்கையாக இருக்கலாம். ஆனால் ஓய்வு பெறும் எண்ணம் என்னுடைய மனதில் இப்போதில்லை. நிறைய பேர் என்னிடம் வந்து சிறந்த கேரியர்காக வாழ்த்துவதாக தெரிவிக்கின்றனர். அவர்களிடம் நான் ஸ்டுவர்ட் பிராட் கிடையாது என்று விளக்கம் கொடுத்து வருகிறேன்.

ஏனெனில் இப்போதும் என்னால் அணிக்காக பங்காற்ற முடியும் என்று கருதுகிறேன். குறிப்பாக டெஸ்ட் கிரிக்கெட்டில் இன்னும் இங்கிலாந்துக்கு வெற்றிகளை பெற்றுக் கொடுக்கும் திறமையை கொண்டிருப்பதாக நம்புகிறேன். வயது காரணமாக கேரியரை முடிக்க நான் விரும்பவில்லை. இதற்கு முன் விளையாடாத பவுலர்கள் இம்முறை விளையாடுகின்றனர். எனவே இந்தியாவில் உள்ள பல்வேறு சூழ்நிலைகள் மற்றும் சவால்களைப் பற்றிய தகவல்களை அவர்களுக்கு கொடுப்பது என்னுடைய கடமையாகும்” என்று தெரிவித்துள்ளார்.