ஷுப்மன் கில் சில மாற்றங்களை செய்ய வேண்டும் - முகமது கைஃப்!

ஷுப்மன் கில் தனது ஃபுட்வொர்க் மற்றும் பேட்டிங்கில் சில மாற்றங்களை செய்தால் மட்டுமே அவரால் ரன்களைச் சேர்க்க முடியும் என முன்னாள் வீரர் முகமது கைஃப் ஆலோசனை கூறியுள்ளார்.

ஷுப்மன் கில் சில மாற்றங்களை செய்ய வேண்டும் - முகமது கைஃப்! (Image Source: Google)

இங்கிலாந்து அணி இந்தியாவில் சுற்றுப்பயணம் மேற்கொண்டு 5 போட்டிகள் கொண்ட டெஸ்ட் தொடரில் விளையாடி வருகிறது. இதில் ஹைதராபாத்தில் நடைபெற்ற முதலாவது டெஸ்ட் போட்டியில் இங்கிலாந்து அணி 28 ரன்கள் வித்தியாசத்தில் இந்திய அணியை வீழ்த்தி வெற்றிபெற்றதுடன், 1-0 என்ற கணக்கில் தொடரின் ஆரம்பத்திலேயே முன்னிலைப் பெற்றுள்ளது. இதையடுத்து இரு அணிகளுக்கும் இடையேயான இரண்டாவது டெஸ்ட் போட்டி வரும் பிப்ரவரி 02ஆம் தேதி முதல் விசாகபட்டினத்தில் நடைபெறவுள்ளது.

இந்நிலையில் இந்திய அணி சொந்த மண்ணில் முதல் போட்டியில் தோல்வியடைந்தது பல்வேறு விமர்சனங்களுக்கு வழிவகுத்துள்ளது. அதிலும் குறிப்பாக இந்திய அணியின் பேட்டர்கள் மீது கடுமையான குற்றச்சாட்டுகள் முன்வைக்கப்பட்டு வருகின்றனர். அதில் முக்கியமாக ஷுப்மன் கில் மற்றும் ஸ்ரேயாஸ் ஐயரின் ஃபார்ம் தொடர்ந்து விமர்சனம் செய்யப்பட்டு வருகிறது. இதில் தனது தொடக்க வீரர் இடத்தை விட்டு மூன்றாம் வரிசையில் களமிறங்கி வரும் ஷுப்மன் கில் தொடர்ந்து சொதப்பி வருகிறார்.

நடைபெற்று முடிந்த இந்த போட்டியில் கூட ஷுப்மன் கில் முதல் இன்னிங்ஸில் 23 ரன்களையும், இரண்டாவது இன்னிங்ஸில் ரன்கள் ஏதுமின்றியும் என விக்கெட்டை இழந்தது ஏமாற்றத்தைக் கொடுத்தார். மேலும் கடந்த 10 டெஸ்ட் போட்டிகளை எடுத்துக்கொண்டாலும் ஷுப்மன் கில்லின் பேட்டிங் ஃபார்ம் என்பது கேள்விக்குறியான ஒன்றாகவே உள்ளது. இந்நிலையில், ஷுப்மன் கில் டெஸ்ட் கிரிக்கெட்டிற்கு தேவையான மாற்றங்களை தனது பேட்டிங்கில் செய்ய வேண்டும் என முன்னாள் வீரர் முகமது கைஃப் கூறியுள்ளார். 

இதுகுறித்து பேசிய அவர், “ஷுப்மன் கில் மிக திறமையான பேட்ஸ்மேன் என்பதில் சந்தேகமில்லை. ஆனால் அவர் வெள்ளைப்பந்து கிரிக்கெட்டில் பிளாட்டான பிட்சுகளில் மட்டுமே சிறப்பான ஆட்டத்தை வெளிப்படுத்தியுள்ளார். ஆனால் டெஸ்ட் கிரிக்கெட்டில் நீங்கள் எதிபார்ப்பது போன்ற பிளாட் பிட்சுகள் கிடைக்காது. இங்கு பந்து பவுன்ஸ் மற்றும் ஸ்விங்காகும் என்பதை நீங்கள் மனதில் வைத்துக்கொள்ள வேண்டும். அதனால் ஷுப்மன் கில் தனது ஃபுட்வொர்க் மற்றும் பேட்டிங்கில் சில மாற்றங்களை செய்தால் மட்டுமே அவரால் ரன்களைச் சேர்க்க முடியும். 

இப்போட்டியின் முதல் இன்னிங்ஸில் பெரும்பாலான இந்திய வீரர்கள் பேட்டிங் சிறப்பாக தொடக்கங்களைப் பெற்றனர். ஆனால் டெஸ்ட் கிரிக்கெட்டை பொறுத்தவரையில் நீங்கள் சூழ்நிலையைப் பொறுத்து விக்கெட்டை இழக்காமல் விளையாட வேண்டும். இதுகுறித்து தலைமை பயிற்சியாளர் ராகுல் டிராவிட் நிச்சயம் வீரர்களுடன் ஆலோசிப்பார் என நினைக்கிறேன்” என்று தெரிவித்துள்ளார். 

Win Big, Make Your Cricket Tales Now