இந்திய டெஸ்ட் அணியில் மீண்டும் ஷர்தூல் தாக்கூர்!

இங்கிலாந்து டெஸ்ட் தொடரில் இந்திய அணியின் நான்காவது வேகப்பந்து வீச்சாளராக ஷர்துல் தாக்கூர் இடம்பிடிப்பார் என்ற தகவல் வெளியாகியுள்ளது.

இந்திய டெஸ்ட் அணியில் மீண்டும் ஷர்தூல் தாக்கூர்! (Image Source: Google)

இங்கிலாந்து சுற்றுப்பயணத்திற்கான இந்திய கிரிக்கெட் அணி விரைவில் அறிவிக்கப்பட உள்ளது. இந்நிலையில் இந்திய அணியின் நட்சத்திர வீரர்கள் கேப்டன் ரோஹித் சர்மா மற்றும் முன்னாள் கேப்டன் விராட் கோலி ஆகியோர் ஓய்வை அறிவித்துள்ளது இந்திய அணிக்கு பின்னடைவை ஏற்படுத்தியுள்ளது.

இதனால் அணியின் புதிய கேப்டன் யார், ரோஹித் சர்மா மற்றும் விராட் கோலி ஆகியோரின் இடங்களை யார் நிரப்புவார்கள் என்ற எதிர்பார்ப்புகள் அதிகரித்துள்ளது. ஆனால் அதே நேரத்தில் இந்த சுற்றுப்பயணத்தில் இன்னும் பல வீரர்களும் இந்திய அணிக்கு திரும்புவார்கள் என்றும் எதிர்பார்க்கப்படுகிறது. அதில் கிட்டத்தட்ட 18 மாதங்கள் டெஸ்ட் அணியில் இருந்து விலகி இருந்த வேகப்பந்து வீச்சு ஆல்ரவுண்டர் ஷர்துல் தாக்கூர் இத்தொடரில் இடம்பிடிப்பார் என்று கூறப்படுகிறது,

முன்னதாக நடந்து முடிந்த ரஞ்சி கோப்பை கிரிக்கெட் தொடரில் மும்பை அணிக்காக விளையாடிய ஷர்தூல் தாக்கூர் பந்துவீச்சு மட்டுமின்றி பேட்டிங்கிலும் சிறப்பான ஆட்டத்தை வெளிப்படுத்தியதன் மூலம் ரசிகர்களின் கவனத்தை ஈர்த்துள்ளார். இதன் காரணமாக நடந்து முடிந்த ஆஸ்திரேலிய அணிக்கு எதிரான பார்டர்-கவாஸ்கர் கோப்பை தொடரின் போதே அவர் இந்திய டெஸ்ட் அணியில் சேர்க்கப்படுவார் என்று எதிர்பார்க்கப்பட்டது. 

ஆனால் அவருக்கு அதில் வாய்ப்பு கிடைக்கவில்லை. இந்நிலையில் தான் தற்போது இங்கிலாந்து டெஸ்ட் தொடரில் இந்திய அணியின்  நான்காவது வேகப்பந்து வீச்சாளராக ஷர்துல் தாக்கூர் இடம்பிடிப்பார் என்று எதிர்பார்க்கப்படுகிறது. இதுபோன்ற சூழ்நிலையில், ஜஸ்பிரித் பும்ரா, முகமது ஷமி, முகமது சிராஜ் மற்றும் பிரசித் கிருஷ்ணா போன்ற பிற வீரர்களுடன் சேர்ந்து, வேகப்பந்து வீச்சை வலுப்படுத்தும் நோக்கில் ஷர்தூல் தாக்கூரும் முக்கிய பங்கு வகிப்பார் என்று கூறப்படுகிறது. 

முன்னதாக ஐபிஎல் தொடரின் 18ஆவது சீசனுக்கான வீரர்கள் மெகா ஏலத்தில் பங்கேற்றிருந்த ஷர்தூல் தாக்கூரை எந்த அணியும் ஏலம் எடுப்பதற்கு முன் வரவில்லை. ஆனால் அதன்பின் ல்க்னோ சூப்பர் ஜெயண்ட்ஸ் அணி மாற்று வீரராக ஷர்தூல் தாக்கூரை ஒப்பந்தம் செய்தது. பின் முதல் சில போட்டிகளில் தனது பந்துவீச்சால் அனைவரையும் ஈர்த்த ஷர்தூல் தாக்கூர் அதன்பின் அடுத்தடுத்த போட்டிகளில் ரன்களை கொடுத்ததன் காரணமாக லெவனில் இருந்து நீக்கப்பட்டார் என்பது குறிப்பிடத்தக்கது.