ஐபிஎல் ஃபார்ம் ஒரு பொருட்டல்ல: மேக்ஸ்வெல் குறித்து கவாஜா கருத்து!

ஐபிஎல் ஃபார்ம் ஒரு பொருட்டல்ல: மேக்ஸ்வெல் குறித்து கவாஜா கருத்து! (Image Source: Google)

ஐபிஎல் தொடரின் 17ஆவது சீசன் ரசிகர்களின் பெரும் எதிர்பார்ப்புகளை பூர்த்தி செய்து நிறைவடைந்துள்ளது. இத்தொடரில் இந்திய வீரர்கள் மட்டுமின்றி உலகின் பல்வேறு வீரர்களும் அபார ஆட்டத்தை வெளிப்படுத்தி ரசிகர்களை மகிழ்வித்துள்ளனர். அதேசமயம் ஒரு சில நட்சத்திர வீரர்கள் படுமோசமான ஆட்டத்தை வெளிப்படுத்தி ரசிகர்களுக்கு ஏமாற்றத்தையும் கொடுத்துள்ளனர். அந்தவகையில் இதில் முதலிடம் பிடிப்பராக ஆஸ்திரேலிய அணி வீரர் கிளென் மேக்ஸ்வெல் உள்ளார். 

நடப்பு ஐபிஎல் தொடரில் ராயல் சேல்ஞ்சர்ஸ் பெங்களூரு அணிக்காக விளையாடி வந்த கிளென் மேக்ஸ்வெல் 10 போட்டிகளில் விளையாடி பேட்டிங்கில் 52 ரன்களையும், பந்துவீச்சில் 6 விக்கெட்டுகளையும் மட்டுமே கைப்பற்றினார். அதிலும் குறிப்பாக அணிக்கு தேவைப்படும் நேரங்களில் கூட ரன்கள் ஏதுமின்றியும், அல்லது அதிக பந்துகளை எதிர்கொண்டு ரன்கள் அடிக்க முடியாமலும் என விக்கெட்டை இழந்து ஏமாற்றத்தைக் கொடுத்துள்ளார். 

இந்நிலையில் நடைபெறவுள்ள ஐசிசி டி20 உலகக்கோப்பை தொடருக்கான ஆஸ்திரேலிய அணியிலும் கிளென் மேக்ஸ்வெல் இடம்பிடித்துள்ளதால் அவருடைய தற்போதைய ஃபார்ம் அணிக்கு பெரும் பின்னடைவாக பார்க்கப்படுகிறது. இந்நிலையில், ஆஸ்திரேலிய வீரர்களுக்கு ஐபிஎல் ஃபார்ம் ஒன்றும் பெரிதல்ல, எனவே மேக்ஸ்வெல் சர்வதேச கிரிக்கெட்டில் அபார ஆட்டத்தை வெளிப்படுத்துவார் என அந்த அணி வீரர் உஸ்மான் கவாஜா தெரிவித்துள்ளார். 

இதுகுறித்து பேசிய அவர், "ஐபிஎல் ஃபார்ம் ஒரு பொருட்டல்ல. மேக்ஸ்வெல் தன்னை மீண்டும் மீண்டும் நிரூபித்துள்ளார். நீண்ட காலமாக விளையாடிய எந்த வீரரும் ஒவ்வொரு முறையும் வெளியே சென்று சிறப்பாக செயல்பட முடியாது என்பதை புரிந்துகொள்ள வேண்டும். நீங்கள் சில நேரங்களில் சிறப்பாக செயல்பட முடியாது. அதிலும் குறிப்பாக நீங்கள் மிடில் ஆர்டரில் பேட் செய்தால், டி20 கிரிக்கெட்டில் விளையாடுவது எளிதானது அல்ல.

அதேசமயம் சர்வதேச கிரிக்கெட்டில் நீங்கள் ஃபார்முக்கு திரும்ப ஒரே ஒரு நல்ல இன்னிங்ஸ் போது.  கடந்த காலத்தில் என்ன நடந்தது என்பது முக்கியமில்லை. அவர் தனது விளையாட்டை மாற்றப் போவதில்லை, மாற்றவும் இல்லை. கிளென் மேக்ஸ்வெல் தனது அதிரடியான ஆட்டத்தை நிச்சயம் தொடர்வார். அவர் தனது ஃபார்மை நிச்சயம் மீட்டெடுப்பார்” என நம்பிக்கை தெரிவித்துள்ளார். 

ஆஸ்திரேலிய அணி: மிட்செல் மார்ஷ் (கேப்டன்), ஆஷ்டன் அகர், பாட் கம்மின்ஸ், டிம் டேவிட், நாதன் எல்லிஸ், கேமரூன் கிரீன், ஜோஷ் ஹேசில்வுட், டிராவிஸ் ஹெட், ஜோஷ் இங்கிலிஸ், கிளென் மேக்ஸ்வெல், மிட்செல் ஸ்டார்க், மார்கஸ் ஸ்டோய்னிஸ்,மேத்யூ வேட், டேவிட் வார்னர், ஆடம் ஸாம்பா.

ரிஸர்வ் வீரர்கள் - ஜேக் ஃபிரேசர் மெக்குர்க், மேத்யூ ஷார்ட்

Win Big, Make Your Cricket Tales Now