ஒருநாள் கிரிக்கெட்டில் அதிக கேட்ச்சுகள்: ரிக்கி பாண்டிங்கை பின் தள்ளினார் விராட் கோலி!

ஆஸ்திரேலிய அணிக்கு எதிரான அரையிறுதி போட்டியின் மூலம் இந்திய வீரர் விராட் கோலி சர்வதேச கிரிக்கெட்டில் சில சாதனைகளை படைத்துள்ளார்.

ஒருநாள் கிரிக்கெட்டில் அதிக கேட்ச்சுகள்: ரிக்கி பாண்டிங்கை பின் தள்ளினார் விராட் கோலி! (Image Source: Google)

இந்தியா - ஆஸ்திரேலிய அணிகளுக்கு இடையேயான ஐசிசி சாம்பியன்ஸ் கோப்பை அரையிறுதி போட்டியானது இன்று துபாய் சர்வதேச கிரிக்கெட் மைதானத்தில் நடைபெற்று வருகிறது. இப்போட்டியில் டாஸ் வென்று முதலில் பேட்டிங் செய்த ஆஸ்திரேலிய அணி 49.3 ஓவர்களில் அனைத்து விக்கெட்டுகளையும் இழந்து 264 ரன்களுக்கு ஆல் அவுட்டானது. 

அந்த அணியில் அதிகபட்சமாக கேப்டன் ஸ்டீவ் ஸ்மித் 4 பவுண்டரி, ஒரு சிக்ஸர் என 73 ரன்களையும், அலெக்ஸ் கேரி 8 பவுண்டரி, ஒரு சிக்ஸர் என 61 ரன்களையும் சேர்த்தனர். இந்திய அணி தரப்பில் சிறப்பான பந்துவீச்சை வெளிப்படுத்திய முகமது ஷமி 3 விக்கெட்டுகளையும், வருண் சக்ரவர்த்தி மற்றும் ரவீந்திர ஜடேஜா தலா 2 விக்கெட்டுகளையும் கைப்பற்றினர்.

இதனையடுத்து இந்திய அணி இலக்கை நோக்கி விளையாடி வருகிறது. இந்நிலையில் இப்போட்டியின் மூலம் விராட் கோலி சர்வதேச கிரிக்கெட்டில் ஃபீல்டிங்கின் மூலம் சாதனை படைத்துள்ளார். அதன்படி இப்போட்டியில் ஆஸ்திரேலிய அணி வீரர்கள் ஜோஷ் இங்கிலிஸ் மற்றும் நாதன் எல்லிஸ் ஆகியோரின் கேட்ச்சுகளை விராட் கோலி பிடித்தார். இதன்மூலம் சர்வதேச கிரிக்கெட்டில் ஒரு பீல்டராக, இந்தியாவுக்காக அதிக கேட்சுகள் எடுத்ததன் அடிப்படையில் கோலி முதல் இடத்தை எட்டியுள்ளார்.

முன்னதாக ராகுல் டிராவிட் 509 போட்டிகளில் 334 கேட்ச்சுகளை பிடித்ததே சாதனையாக இருந்த நிலையில் தற்போது விராட் கோலி 549 போட்டிகளில் 336 கேட்ச்களை பிடித்து முதலிடத்தைப் பிடித்துள்ளார். இது தவிர்து சர்வதேச ஒருநாள் போர்ட்டிகளில் அதிக கேட்ச்சுகளை பிடித்த இரண்டாவது வீரர் எனும் பெருமையையும் பெற்றுள்ளார். முன்னதாக ரிக்கி பாண்டிங் 160 கேட்ச்சுகளுடன் இரண்டாம் இடத்தில் இருந்த நிலையில், தற்போது 161 கேட்ச்சுகளை பிடித்து அசத்தியுள்ளார். 

சர்வதேச கிரிக்கெட்டில் ஃபீல்டராக அதிக கேட்சுகள்

• மஹேல ஜெயவர்தன- 440 கேட்சுகள்
• ரிக்கி பாண்டிங்- 364 கேட்சுகள்
• ராஸ் டெரெல்- 351 கேட்சுகள்
• ஜாக் காலிஸ்- 338 கேட்சுகள்
• விராட் கோலி - 335 கேட்சுகள்

ஒருநாள் போட்டிகளில் பீல்டராக அதிக கேட்சுகள்

• 218 - மஹேல ஜயவர்தன
• 161-விராட் கோலி
• 160 - ரிக்கி பாண்டிங்
• 156 - முகமது அசாருதீன்

ஆஸ்திரேலியா பிளேயிங் லெவன்: கூப்பர் கோனொலி, டிராவிஸ் ஹெட், ஸ்டீவன் ஸ்மித் (கேப்டன்), மார்னஸ் லபுஷாக்னே, ஜோஷ் இங்கிலிஸ், அலெக்ஸ் கேரி, கிளென் மேக்ஸ்வெல், பென் துவார்ஷுயிஸ், நாதன் எல்லிஸ், ஆடம் ஸாம்பா, தன்வீர் சங்கா

இந்தியா பிளேயிங் லெவன்: ரோஹித் சர்மா (கேப்டன்), ஷுப்மான் கில், விராட் கோலி, ஸ்ரேயாஸ் ஐயர், அக்ஸர் படேல், கேஎல் ராகுல், ஹார்திக் பாண்டியா, ரவீந்திர ஜடேஜா, முகமது ஷமி, குல்தீப் யாதவ், வருண் சக்ரவர்த்தி

Win Big, Make Your Cricket Tales Now