சச்சின், ரிக்கி பாண்டிங் சாதனைகளை முறியடித்த விராட் கோலி!

இங்கிலாந்து அணிக்கு எதிரான மூன்றாவது ஒருநாள் போட்டியில் இந்திய வீரர் விராட் கோலி அரைசதம் கடந்து அசத்தியதன் மூலம் சில சாதனைகளையும் படைத்துள்ளார்.

சச்சின், ரிக்கி பாண்டிங் சாதனைகளை முறியடித்த விராட் கோலி! (Image Source: Google)

இந்தியா - இங்கிலாந்து அணிகளுக்கு இடையேயான மூன்றாவது மற்றும் கடைசி ஒருநாள் போட்டி அகமதாபாத்தில் உள்ள நரேந்திர மோடி மைதானத்தில் இன்று நடைபெற்று வருகிறது. இந்த போட்டியில் டாஸை இழந்து முதலில் பேட்டிங் செய்துவரும் இந்திய அணியில் நட்சத்திர வீரர் விராட் கோலி தனது அரைசதத்தைப் பதிவுசெய்து அசத்தியதுடன் 7 பவுண்டரி, ஒரு சிக்ஸர் என 52 ரன்கள் எடுத்திருந்த நிலையில் விக்கெட்டை இழந்தார். இந்நிலையில் இப்போட்டியில் அவர் சில சாதனைகளையும் படைத்துள்ளார்.

ஆசியாவில் வேகமாக 16000 ரன்கள் எடுத்தவர்

இப்போட்டியில் விராட் கோலி அரைசதம் கடந்ததன் மூலம், ஆசியாவில் தனது 16,000 ரன்களை பூர்த்தி செய்ததுடன், அதிவேகமாக இந்த மைல் கல்லை எட்டிய வீரர் சச்சின் டெண்டுல்கரின் சாதனையையும் விராட் கோலி முறியடித்துள்ளார். முன்னதாக இந்திய அணியின் முன்னாள் ஜாம்பவான் சச்சின் டெண்டுல்கர் 353 இன்னிங்ஸ்களில் இந்த சாதனையை எட்டிய நிலையில், தற்போது விராட் கோலி 340 இன்னிங்ஸ்களில் இந்த மைல் கல்லை எட்டி அசத்தியுள்ளார்.

ஆசியாவில் அதிவேகமாக 16000 ரன்களை எட்டிய வீரர்கள்

• 340 இன்னிங்ஸ் – விராட் கோலி*
• 353 இன்னிங்ஸ் - சச்சின் டெண்டுல்கர்
• 360 இன்னிங்ஸ் - குமார் சங்கக்காரா
• 401 இன்னிங்ஸ் - மஹேலா ஜெயவர்த்தனே

ஒரு அணிக்கு எதிராக அதிக ரன்கள்: 4000

இப்போட்டியில் அரைசதம் கடந்த விராட் கோலி, இங்கிலாந்துக்கு எதிராக சர்வதேச கிரிக்கெட்டில் தனது 4000 ரன்களையும் நிறைவு செய்தார். இதன்மூலம் சர்வதேச கிரிக்கெட்டில் அதிக எண்ணிக்கையிலான நாடுகளுக்கு எதிராக 4000 அல்லது அதற்கு மேற்பட்ட ரன்கள் எடுத்த முதல் வீரர் என்ற பெருமையை அவர் பெற்றுள்ளார். இதற்கு முன் ஆஸ்திரேலியா, இலங்கைக்கு எதிராக விராட் கோலி இந்த சாதனையைச் செய்துள்ளார். இதன்மூலம் அவர் ஆஸ்திரேலியாவின் ரிக்கி பாண்டிங் சாதனையையும் சமன்செய்துள்ளார். இதற்கு முன் ரிக்கி பாண்டிங் இங்கிலாந்து, இந்தியா மற்றும் தென் ஆப்பிரிக்காவுக்கு எதிராக சர்வதேச கிரிக்கெட்டில் 4000 ரன்களை அடித்துள்ளார். 

ஒரு அணிக்கு எதிராக 4000+ ரன்கள்

• 3- விராட் கோலி (ஆஸ்திரேலியா, இலங்கை, இங்கிலாந்து)*
• 3-ரிக்கி பாண்டிங் (இங்கிலாந்து, இந்தியா, தென் ஆப்பிரிக்கா)
• 2 - சச்சின் டெண்டுல்கர் (ஆஸ்திரேலியா, இலங்கை)
• 2- குமார் சங்கக்காரா (இந்தியா, பாகிஸ்தான்)
• 2 - விவியன் ரிச்சர்ட்ஸ் (ஆஸ்திரேலியா, இங்கிலாந்து)

இருப்பினும், ஒருநாள் போட்டிகளில் அதிவேகமாக 14,000 ரன்கள் எடுத்த வீரர் எனும் உலக சாதனையை விராட் கோலி 27 ரன்கள் வித்தியாசத்தில் தவறவிட்டார். முன்னதாக காயம் காரணமாக முதல் ஒருநாள் போட்டியில் விளையாடாத விராட் கோலி, அதன்பின் நடைபெற்ற இரண்டாவது போட்டியிலும் 5 ரன்களை மட்டுமே எடுத்திருந்த நிலையில் ஆட்டமிழந்தார். இந்நிலையில் அவர் தற்போது மீண்டும் பேட்டிங்கில் சிறப்பாக செயல்பட்டது ரசிகர்களை மகிழ்ச்சியில் ஆழ்த்தியுள்ளது. 

இந்தியா பிளேயிங் லெவன்: ரோஹித் சர்மா(கேப்டன்), ஷுப்மான் கில், விராட் கோலி, ஸ்ரேயாஸ் ஐயர், கேஎல் ராகுல் (கேப்டன்), ஹர்திக் பாண்டியா, அக்ஸர் படேல், வாஷிங்டன் சுந்தர், ஹர்ஷித் ராணா, குல்தீப் யாதவ், அர்ஷ்தீப் சிங்

இங்கிலாந்து பிளேயிங் லெவன்: பிலிப் சால்ட், பென் டக்கெட், ஜோ ரூட், ஹாரி புரூக், ஜோஸ் பட்லர்(கேப்டன்), டாம் பான்டன், லியாம் லிவிங்ஸ்டோன், கஸ் அட்கின்சன், ஆதில் ரஷீத், மார்க் வுட், சாகிப் மஹ்மூத்

Win Big, Make Your Cricket Tales Now