WIW vs BANW, 1st ODI: மேத்யூஸ், ஜோசப் அதிரடியில் வங்கதேசத்தைப் பந்தாடியது விண்டீஸ்!

வங்கதேச மகளிர் அணிக்கு எதிரான முதல் ஒருநாள் போட்டியில் வெஸ்ட் இண்டீஸ் அணி கேப்டன் ஹீலி மேத்யூஸ் சதமடித்து அணிக்கு வெற்றியைத் தேடிக்கொடுத்தார்.

WIW vs BANW, 1st ODI: மேத்யூஸ், ஜோசப் அதிரடியில் வங்கதேசத்தைப் பந்தாடியது விண்டீஸ்! (Image Source: Google)

வங்கதேச மகளிர் அணி வெஸ்ட் இண்டீஸில் சுற்றுப்பயணம் செய்து மூன்று போட்டிகள் கொண்ட ஒருநாள் மற்றும் டி20 தொடர்களில் விளையாடி வருகிறது. இதில் இன்று இவ்விரு அணிகளுக்கும் இடையேயான முதல் ஒருநாள் போட்டியானது செயின்ட் கிட்ஸில் நடைபெற்றது. இப்போட்டியில் டாஸ் வென்ற வெஸ்ட் இண்டீஸ் மகளிர் அணி முதலில் பந்துவீசுவதாக அறிவித்து வங்கதேச அணியை பேட்டிங் செய்ய அழைத்தது. 

அதன்படி களமிறங்கிய வங்கதேச மகளிர் அணிக்கு ஃபர்கானா ஹக் - முர்ஷிதா கதும் இணை தொடக்கம் கொடுத்தனர். இதில் ஃபர்கானா 10 ரன்களில் விக்கெட்டை இழந்தார். பின்னர் முர்ஷிதாவுடன் இணைந்த ஷமின் அக்தர் இணை பொறுப்புடன் விளையாடி அணியின் ஸ்கோரை உயர்த்தினர். தொடர்ந்து சிறப்பான ஆட்டத்தை வெளிப்படுத்தியதுடன் இரண்டாவது விக்கெட்டிற்கு 40 ரன்களுக்கு மேல் பார்ட்னர்ஷிப் அமைத்து அசத்தினர். அதன்பின் அரைசதம் அடிப்பார் என எதிர்பார்க்கப்பட்ட முர்ஷிதா கதும் 40 ரன்களிலும், ஷமின் அக்தர் 42 ரன்களிலும் ஆட்டமிழந்தனர். 

பின்னர் களமிறங்கிய கேப்டன் நிகர் சுல்தானா 14 ரன்களில் விக்கெட்டை இழக்க, மறுமுனையில் நிதானமாக விளையாடி வந்த ஷோபனா மொஸ்ட்ரி 35 ரன்களிலும் ஆட்டமிழந்தனர். பின்னர் களமிறங்கிய வீராங்கனைகாளில் ஷொர்னா அக்தர் 29 ரன்களைச் சேர்த்ததை தவிர்த்து மற்ற வீராங்கனைகள் அனைவரும் அடுத்தடுத்து சொற்ப ரன்களுக்கு விக்கெட்டுகளை இழந்தனர். இதனால் வங்கதேச மகளிர் அணி 50 ஓவர்கள் முடிவில் 9 விக்கெட்டுகளை இழந்து 198 ரன்களைச் சேர்தது. விண்டீஸ் தரப்பில் டியாண்டிரா டோட்டின் 3 விக்கெட்டுகளை கைப்பற்றினார். 

இதனையடுத்து இலக்கை நோக்கி விளையாடிய வெஸ்ட் இண்டீஸ் மகளிர் அணிக்கு கேப்டன் ஹீலி மெத்யூஸ் மற்றும் கியானா ஜோசப் இணை தொடக்கம் கொடுத்தனர். இருவரும் ஆரம்பம் முதலே அதிரடியாக விளையாடி அணியின் ஸ்கோரை மளமளவென உயர்த்தினர். இப்போட்டியில் தொடர்ந்து அபாரமான ஆட்டத்தை வெளிப்படுத்தி வந்த இருவரும் தங்கள் அரைசதங்களை பதிவுசெய்து அசத்தியதுடன், முதல் விக்கெட்டிற்கு 163 ரன்கள் பார்ட்னர்ஷிப் அமைத்து அணியின் வெற்றியை உறுதிசெய்தனர். பின் கியானா ஜோசப் 6 பவுண்டரி, 4 சிக்ஸர்கள் என 70 ரன்களை எடுத்து ஆட்டமிழந்தார். 

இருப்பினும் இப்போட்டியில் இறுதிவரை ஆட்டமிழக்காமல் இருந்த ஹீலி மேத்யூஸ் சதமடித்து அசத்தியதுடன் 16 பவுண்டரிகளுடன் 104 ரன்களைச் சேர்த்து அணிக்கு வெற்றியைத் தேடிக்கொடுத்தனர். இதன்மூலம் வெஸ்ட் இண்டீஸ் மகளிர் அணி 31.4 ஓவர்களில் இலக்கை எட்டியதுடன் 9 விக்கெட் வித்தியாசத்தில் வங்கதேச மகளிர் அணியை வீழ்த்தி அபாரமான வெற்றியைப் பதிவுசெய்தது. இந்த வெற்றியின் மூலம் இந்த ஒருநாள் தொடரில் வெஸ்ட் இண்டீஸ் அணி 1-0 என்ற கணக்கில் முன்னிலையும் பெற்றுள்ளது. 

Win Big, Make Your Cricket Tales Now