பாக்ஸிங் டே டெஸ்ட்: கார்பின் போஷ் அசத்தல்; முன்னிலை நோக்கி நகரும் பாகிஸ்தான்!

தென் ஆப்பிரிக்காவில் சுற்றுப்பயணம் செய்துவரும் பாகிஸ்தான் அணி தற்சமயம் 2 போட்டிகள் கொண்ட டெஸ்ட் தொடரில் விளையாடி வருகிறது. இதில் இரு அணிகளுக்கும் இடையேயான முதல் டெஸ்ட் போட்டி செஞ்சூரியனில் உள்ள சூப்பர்ஸ்போர்ட் பார்க் மைதானத்தில் தொடங்கியது. இப்போட்டியில் டாஸ் வென்ற தென் ஆப்பிரிக்க அணி கேப்டன் டெம்பா பவுமா முதலில் பந்துவீசுவதாக அறிவித்தார். 

இதனையடுத்து முதலில் பேட்டிங் செய்த பாகிஸ்தா அணியில் காம்ரன் குலாம் அரைசதம்  கடந்த நிலையில் மற்ற வீரர்கள் எதிரணி பந்துவீச்சுக்கு ஈடுகொடுக்க முடியாஅமல் அடுத்தடுத்து விக்கெட்டுகளை இழந்தனர். இதனால் பாகிஸ்தான் அணி 57.3 ஓவரில் 211 ரன்களுக்கு ஆல் அவுட்டானது. அந்த அணியில் அதிகபட்சமாக கம்ரான் குலாம் ஓரளவு தாக்குப்பிடித்து 54 ரன்களைச் சேர்த்தார். தென் ஆப்பிரிக்கா சார்பில் டேன் பேட்டர்சன் 5 விக்கெட்டும், கார்பின் போஷ் 4 விக்கெட்டும் வீழ்த்தினர். பின்னர் முதல் இன்னிங்ஸைத் தொடங்கிய தென் ஆப்பிரிக்க அணிக்கு ஐடன் மார்க்ரம் மற்றும் டோனி டி ஸோர்ஸி இணை தொடக்கம் கொடுத்தனர். 

இதில் டோனி டி ஸோர்ஸி 2 ரன்களிலும், அடுத்து களமிறங்கிய ரியான் ரிக்கெல்டன் 8 ரன்களுக்கும், டிரிஸ்டன் ஸ்டப்ஸ் 9 ரன்களிலும் என அடுத்தடுத்து விக்கெட்டுகளை இழந்து ஏமாற்றமளித்தனர். இதனால் தென் ஆப்பிரிக்க அணி முதல்நாள் ஆட்டநேர முடிவில் 3 விக்கெட் இழப்பிற்கு 82 ரன்களை மட்டுமே சேர்த்தது. இதனையடுத்து 129 ரன்கள் பின் தங்கிய நிலையில் தென் ஆப்பிரிக்க அணி இன்று இரண்டாம் நாள் ஆட்டத்தை தொடர்ந்தது. இதில் ஐடன் மார்க்ரம் 47 ரன்களுடனும், கேப்டன் டெம்பா பவுமா 4 ரன்களுடனும் இன்னிங்ஸைத் தொடர்ந்தனர். 

இதில் ஐடன் மார்க்ரம் தனது அரைசதத்தைப் பதிவுசெய்தார். அதேசமயம் மறுபக்கம் கேப்டன் டெம்பா பவுமா 31 ரன்களில் விக்கெட்டை இழக்க, அடுத்து களமிறங்கிய டேவிட் பெட்டிங்ஹாமும் 30 ரன்களிலும், கைல் வெர்ரைன் மற்றும் மார்கோ ஜான்சென் ஆகியோர் தலா 2 ரன்களிலும் என விக்கெட்டை இழந்து பெவிலியனுக்கு நடையைக் கட்டினர். அதன்பின் நிதான ஆட்டத்தை வெளிப்படுத்தி வந்த ஐடன் மார்க்ரமும் 89 ரன்களைச் சேர்த்த கையோடு ஆட்டமிழந்து இப்போட்டியில் சதமடிக்கும் வாய்ப்பினை தவறவிட்டார். பின் அறிமுக வீரர் கார்பின் போஷ் சிறப்பாக விளையாடிய அணியின் முன்னிலை நோக்கி அழைத்துச் சென்றார். 

இப்போட்டியில் இறுதிவரை ஆட்டமிழக்காமல் இருந்த கார்பின் போஷ் 15 பவுண்டரிகளுடன் 81 ரன்களைச் சேர்க்க மற்ற வீரர்கள் சொற்ப ரன்களில் நடையைக் கட்டினர். இதனால் தென் ஆப்பிரிக்க அணி முதல் இன்னிங்ஸில் அனைத்து விக்கெட்டுகளையும் இழந்து 301 ரன்களில் ஆல் அவுட்டானது. பாகிஸ்தான் தரப்பில் குர்ராம் ஷஷாத் மற்றும் நசீம் ஷா ஆகியோர் தலா 3 விக்கெட்டுகளையும், அமீர் ஜமால் 2 விக்கெட்டுகளையும் கைப்பற்றினர். பின்னர் 90 ரன்கள் பின் தங்கிய நிலையில் இரண்டாம் இன்னிங்ஸைத் தொடர்ந்த பாகிஸ்தான் அணிக்கு சைம் அயூப் - ஷான் மசூத் தொடக்கம் கொடுத்தனர். 

Also Read: Funding To Save Test Cricket

இதில் சைம் அயூப் 27 ரன்களிலும், மற்றொரு தொடக்க வீரார் ஷான் மசூத் 28 ரன்களிலும் என விக்கெட்டை இழக்க, முதல் இன்னிங்ஸில் சிறப்பாக செயல்பட்ட காம்ரன் குலாம் 4 ரன்களுடன் நடையைக் கட்டினார். இதனால் பாகிஸ்தான் அணி இரண்டாம் நாள் ஆட்டநேர முடிவில் 3 விக்கெட்டுகளை இழந்து 88 ரன்களை எடுத்துள்ளது. இதில் பாபர் ஆசாம் 16 ரன்களுடனும், சௌத் ஷகீல் 8 ரன்களுடனும் களத்தில் உள்ளனர். தென் ஆப்பிரிக்க தரப்பில் மார்கோ ஜான்சென் 2 விக்கெட்டுகளை கைப்பற்றினார். இதனையடுத்து 2 ரன்கள் பின் தங்கிய நிலையில் பாகிஸ்தான் அணி நாளை மூன்றாம் நாள் ஆட்டத்தை தொடரவுள்ளது.