ZIM vs AFG, 2nd Test: ஆஃப்கானிஸ்தானை 157 ரன்களில் சுருட்டியது ஜிம்பாப்வே!
ஆஃப்கானிஸ்தான் அணியானது தற்சமயம் ஜிம்பாப்வேவில் சுற்றுப்பயணம் செய்து இரண்டு போட்டிகள் கொண்ட டெஸ்ட் தொடரில் விளையாடி வருகிறது. இதில் நடந்து முடிந்துள்ள முதல் டெஸ்ட் போட்டியானது முடிவு எட்டப்படாமல் டிராவில் முடிந்ததாக அறிவிக்கப்பட்டதை தொடர்ந்து. இத்தொடரிலும் இரு அணியும் சமநிலையில் உள்ளன.
இதனையடுத்து ஜிம்பாப்வே - ஆஃப்கானிஸ்தான் அணிகளுக்கு இடையேயான புத்தாண்டு டெஸ்ட் போட்டியானது இன்று (ஜனவரி 02) புலவாயோவில் உள்ள குயின்ஸ் ஸ்போர்ட்ஸ் கிளப் மைதானத்தில் நடைபெற்றது. மழை காரணமாக இப்போட்டியின் டாஸ் நிகழ்வானது தாமதமானதுடன், முதல்நாள் உணவு இடைவேளையும் எடுக்கப்பட்டது. அதன்பின் தொடங்கிய இப்போட்டியில் டாஸ் வென்ற ஜிம்பாப்வே அணி முதலில் பந்துவீசுவதாக அறிவித்தது. இதனையடுத்து முதலில் பேட்டிங் செய்த ஆஃப்கானிஸ்தான் அணிக்கு அப்துல் மாலிக் மற்றும் ரியாஸ் ஹொசைன் இணை தொடக்கம் கொடுத்தனர்.
இதில் ரியாஸ் ஹொசைன் 12 ரன்களை மட்டுமே எடுத்திருந்த நிலையில் விக்கெட்டை இழந்து ஏமாற்றமளித்தார். அவரைத் தொடர்ந்து மற்றொரு தொடக்க வீரர் அப்துல் மாலிக் 17 ரன்களில் விக்கெட்டை இழக்க, கடந்த போட்டியில் இரட்டை சதமடித்த ரஹ்மத் ஷா மற்றும் கேப்டன் ஹஸ்மதுல்லா ஷாஹிதி இணை ஜோடி சேர்ந்தனர். இவர்கள் இருவர் மீதும் பெரும் எதிர்பார்ப்புகள் இருந்த நிலையில் ஹஸ்மதுல்லா ஷாஹிதி 13 ரன்களில் விக்கெட்டை இழக்க, மறுபக்கம் 19 ரன்களை எடுத்திருந்த ரஹ்மத் ஷாவும் தனது விக்கெட்டை இழந்தார். பின்னர் களமிறங்கிய அஃப்சர் ஸஸாய், ஷாஹிதுல்லா, இஸ்மத் அலாம் ஆகியோரும் சொற்ப ரன்களில் ஆட்டமிழந்தனர்.
அதன்பின் களமிறங்கிய வீரர்களில் ரஷித் கான் 25 ரன்களையும், ஃபரீத் அஹ்மத் 17 ரன்களையும் சேர்த்த நிலையில் மற்ற வீரர்கள் அனைவரும் அடுத்தடுத்து சொற்ப ரன்களில் விக்கெட்டுகளை இழந்து ஏமாற்றமளித்தனர். இதன்மூலம் ஆஃப்கானிஸ்தான் அணி 44.3 ஓவர்களிலேயே அனைத்து விக்கெட்டுகளையும் இழந்து 157 ரன்களில் ஆல் அவுட்டானது. ஜிம்பாப்வே அணி தரப்பில் அபாரமான பந்துவீச்சை வெளிப்படுத்திய சிக்கந்தர் ரஸா மற்றும் நியூமன் நியாம்ஹுரி ஆகியோர் தலா 3 விக்கெட்டுகளையும், பிளெஸ்ஸிங் முசரபானி 2 விக்கெட்டுகளையும் கைப்பற்றி அசத்தினர்.
Also Read: Funding To Save Test Cricket
இதனையடுத்து முதல் இன்னிங்ஸைத் தொடங்கிய ஜிம்பாப்வே அணிக்கு ஜெய்லார்ட் கும்பி மற்றும் பென் கரண் ஆகியோர் தொடக்கம் கொடுத்தனர். இதனால் முதல்நாள் ஆட்டநேர முடிவில் ஜிம்பாப்வே அணி விக்கெட் இழப்பின்றி 6 ரன்களை எடுத்துள்ளது. இதில் ஜெய்லார்ட் கும்பி 4 ரன்களுடனும், பென் கரண் ஒரு ரன்னுடனும் களத்தில் உள்ளனர். இதையடுத்து 151 ரன்கள் பின் தங்கிய நிலையில் ஜிம்பாப்வே அணி நாளை இரண்டாம் நாள் ஆட்டத்தை தொடரவுள்ளது.