ஆஸ்திரேலியா அணி தற்சமயம் இலங்கையில் சுற்றுப்பயணம் மேற்கொண்டு 2 போட்டிகளைக் கொண்ட ஒருநாள் தொடரில் விளையாடி வருகிறது. இதில் நேற்று நடைபெற்று முடிந்த முதல் ஒருநாள் போட்டியில் இலங்கை அணி அபாரமான ஆட்டத்தை வெளிப்படுத்தியதுடன் 49 ரன்கள் வித்தியாசத்தில் ஆஸ்திரேலிய அணியை வீழ்த்தி வெற்றிபெற்றதுடன், 1-0 என்ற கணக்கில் தொடரில் முன்னிலைப் பெற்றது.
இதனையடுத்து இலங்கை - ஆஸ்திரேலிய அணிகளுக்கு இடையேயான ஒருநாள் தொடரின் வெற்றியாளரைத் தீர்மானிக்கும் இரண்டாவது மற்றும் கடைசி போட்டி இன்று (பிப்ரவரி 14) கொழும்புவில் உள்ள ஆர் பிரேமதாசா கிரிக்கெட் மைதானத்தில் நடைபெறவுள்ளது. இப்போட்டியிலும் டாஸை வென்ற இலங்கை அணியானது முதலில் பேட்டிங் செய்வதாக அறிவித்துள்ளது. இப்போட்டிக்கான இலங்கை அணியில் அவிஷ்கா ஃபெர்னாண்டோவுக்கு பதிலாக நிஷான் மதுஷ்கா லெவனில் இடம்பிடித்தார்.
அதேசமயம் ஆஸ்திரேலிய அணியில் கிளென் மேக்ஸ்வெல், டிராவிஸ் ஹெட், பென் துவார்ஷூயிஸ், தன்வீர் சங்கா மற்றும் ஜோஷ் இங்கிலிஸ் ஆகியோருக்கு பிளேயிங் லெவனில் வாய்ப்பு வழங்கப்பட்டுள்ளது. இதையடுத்து பேட்டிங் செய்ய களமிறங்கிய இலங்கை அணியில் தொடக்க வீரர் பதும் நிஷங்கா 6 ரன்கள் மட்டுமே எடுத்த நிலையில் விக்கெட்டை இழந்து பெவிலியனுக்கு நடையைக் கட்டினார்.
அதன்படி பதும் நிஷங்கா ஒரு பெரிய ஷாட்டை விளையாட முயற்சிக்கும்போது ஆரோன் ஹார்டியின் பந்துவீச்சில் க்ளீன் போல்டாகினார். இப்போட்டியில் ஆறாவது ஓவரை ஆரோன் ஹார்டி வீசிய நிலையில், அந்த ஓவரின் மூன்றாவது பந்தை நிஷங்கா அடிக்க முயன்று கிளீன் போல்டாகினார். இந்நிலையில் பதும் நிஷங்கா விக்கெட்டை இழந்த காணொளியானது ரசிகர்கள் மத்தியில் வைரலாகி வருகிறது.
அதன்பின் ஜோடி சேர்ந்த நிஷான் மதுஷ்கா மற்றும் குசால் மெண்டிஸ் இணை பொறுப்பான ஆட்டத்தை வெளிப்படுத்தி வருவதுடன் அணியின் விக்கெட் இழப்பையும் தடுத்துள்ளனர். இருவரும் இணைந்து இரண்டாவது விக்கெட்டிற்கு 50 ரன்களுக்கு மேல் பார்ட்னர்ஷிப் அமைத்துள்ளார். இதன்மூலம் இலங்கை அணி தற்போது வரை 20 ஓவர்களில் ஒரு விக்கெட் இழப்பிற்கு 86 ரன்களைச் சேர்த்துள்ளது.
ஆஸ்திரேலியா பிளேயிங் லெவன்: மேத்யூ ஷார்ட், டிராவிஸ் ஹெட், ஜேக் ஃபிரேசர்-மெக்குர்க், ஸ்டீவன் ஸ்மித்(கே), ஜோஷ் இங்கிலிஸ், ஆரோன் ஹார்டி, கிளென் மேக்ஸ்வெல், சீன் அபோட், பென் துவர்ஷூயிஸ், ஆடம் ஜம்பா, தன்வீர் சங்கா
Also Read: Funding To Save Test Cricket
இலங்கை பிளேயிங் லெவன்: பதும் நிஷங்க, நிஷான் மதுஷ்கா, குசல் மெண்டிஸ், கமிந்து மெண்டிஸ், சரித் அசலங்கா (கே), ஜனித் லியனகே, துனித் வெல்லாலகே, வனிந்து ஹசரங்க, மஹீஷ் தீக்ஷனா, எஷான் மலிங்கா, அசித்த ஃபெர்னாண்டோ