BGT 2024: முதல் டெஸ்ட்டில் இருந்து விலகும் ஷுப்மன் கில்; சாய் சுதர்ஷன் (அ) படிக்கல்லிற்கு வாய்ப்பு!

இந்திய அணி அஸ்திரேலியாவில் சுற்றுப்பயணம் மேற்கொண்டு 5 போட்டிகள் கொண்ட பார்டர் கவாஸ்கர் கோப்பை கிரிக்கெட் தொடரில் விளையாடவுள்ளது. அதன்படி ஆஸ்திரேலியா - இந்தியா அணிகளுக்கு இடையேயான இந்த டெஸ்ட் தொடரானது வரும் நவம்பர் 22ஆம் தேதி தொடங்கவுள்ளது.

இத்தொடருக்கான இந்திய அணியையும் பிசிசிஐ சமீபத்தில் அறிவித்திருந்தது.  அதன்படி இந்திய அணியில் அறிமுக வீரர்கள், அபிமன்யூ ஈஸ்வரன், நிதீஷ் குமார் ரெட்டி, ஹர்ஷித் ரானா உள்ளிட்டோருக்கு வாய்ப்பு வழங்கப்பட்டுள்ளது. இவர்களுடன் பிரஷித் கிருஷ்ணாவுக்கும் இந்திய டெஸ்ட் அணியில் மீண்டும் சேர்க்கப்பட்டுள்ளனர். அதேசமயம் குல்தீப் யாதவ், அக்ஸர் படேல், முகமது ஷமி ஆகியோருக்கு இந்த அணியில் இடம் கிடைக்கவில்லை.

இந்நிலையில் ஆஸ்திரேலியா சென்றடைந்துள்ள இந்திய அணி வீரர்கள் தங்களது பயிற்சியை தொடங்கியுள்ளனர். அதன்படி இந்திய வீரர்களே இரு குழுக்களாக பிரிந்து தற்சமயம் பயிற்சியில் ஈடுபட்டு வருகின்றனர். இந்நிலையில் இந்த பயிற்சி ஆட்டத்தின் போது இந்திய அணியின் இளம் வீரர் ஷுப்மன் கில் விரல் பகுதியில் காயமடைந்துள்ளதாக தகவல்கள் வெளியாகியுள்ளன. மேலும் அவரது காயம் குறித்து ஸ்கேன் பரிசோதனையும் மேற்கொள்ளபடவுள்ளதாக தகவல் வெளியாகியுள்ளது.

ஒருவேளை அவரது காயம் தீவிரமடையும் பட்சத்தில் பெர்தில் நடைபெற இருக்கும் முதல் டெஸ்ட் போட்டியில் இருந்தும் அவர் விலகுவார் என்று கூறப்படுகிறது. இந்நிலையில், ஷுப்மன் கில் முதல் போட்டியில் இருந்து விலகும் பட்சத்தில் இப்போட்டிக்கான இந்திய அணியில் உள்ளூர் போட்டிகளில் சிறப்பாக செயல்பட்டு வரும் சாய் சுதர்ஷன் அல்லது தேவ்தத் படிக்கல் ஆகியோருக்கு வாய்ப்பு வழங்கப்படும் என்ற தகவல்கள் வெளியாகியுள்ளன. 

முன்னதாக இந்திய அணியின் நட்சத்திர வீரர்களான கேஎல் ராகுல் மற்றும் விராட் கோலி ஆகியோரும் காயத்தை சந்தித்ததாக தகவல்கள் வெளியான நிலையில், தற்சமயம் ஷுப்மன் கில்லும் காயமடைந்துள்ளதாக தகவல் வந்துள்ளது இந்திய அணிக்கு பெரும் பின்னடைவாக பார்க்கப்படுகிறது.  இதுதவிர்த்து முதல் போட்டியில் இருந்து ரோஹித் சர்மாவும் விலகவுள்ளதால் இந்திய அணி கடும் நெருக்கடியை சந்தித்துள்ளதும் குறிப்பிடத்தக்கது. 

Also Read: Funding To Save Test Cricket

இந்திய டெஸ்ட் அணி: ரோஹித் சர்மா (கே), ஜஸ்பிரித் பும்ரா, யஷஸ்வி ஜெய்ஸ்வால், அபிமன்யு ஈஸ்வரன், ஷுப்மான் கில், விராட் கோலி, கேஎல் ராகுல், ரிஷப் பந்த், சர்ஃப்ராஸ் கான், துருவ் ஜூரல், ரவிச்சந்திரன் அஸ்வின், ரவீந்திர ஜடேஜா, முகமது சிராஜ், ஆகாஷ் தீப், பிரசித் கிருஷ்ணா, ஹர்ஷித் ராணா, நிதிஷ் குமார் ரெட்டி, வாஷிங்டன் சுந்தர்.