சர்வதேச டெஸ்டில் சாதனைகளை குவித்த ஜோ ரூட்!

சர்வதேச டெஸ்ட் கிரிக்கெட்டில் அதிக ரன்களைக் குவித்த வீரர்கள் பட்டியலில் இங்கிலாந்தின் ஜோ ரூட் மூன்றாம் இடத்திற்கு முன்னேறி அசத்தியுள்ளார்.

Joe Root Records: மான்செஸ்டர் டெஸ்ட் போட்டியில் சிறப்பான ஆட்டத்தை வெளிப்படுத்தி வரும் இங்கிலாந்தின் ஜோ ரூட் சர்வதேச டெஸ்ட் கிரிக்கெட்டில் அதிக ரன்களைக் குவித்த வீரர்கள் பட்டியலில் ராகுல் டிராவிட், ஜாக் காலில் ஆகியோரைப் பின்னுக்குத் தள்ளியுள்ளார். 

இங்கிலாந்து - இந்தியா அணிகளுக்கு இடையேயான நான்காவது டெஸ்ட் போட்டி மான்செஸ்டரில் உள்ள ஓல்ட் டிராஃபோர்ட் மைதானத்தில் நடைபெற்று வருகிறது. இப்போட்டியில் டாஸை இழந்து முதலில் பேட்டிங் செய்த இந்திய அணி முதல் இன்னிங்ஸில் 358 ரன்களைச் சேர்த்து ஆல் அவுட்டானது. இதில் அதிகபட்சமாக சாய் சுதர்ஷன் 61 ரன்களையும், யஷஸ்வி ஜெய்ஸ்வால் 58 ரன்களையும், ரிஷப் பந்த் 54 ரன்களையும் சேர்த்தனர். இங்கிலாந்து தரப்பில் பென் ஸ்டோக்ஸ் 5 விக்கெட்டுகளை வீழ்த்தினார்.

அதன்பின் முதல் இன்னிங்ஸைத் தொடங்கிய இங்கிலாந்து அணியில் பென் டக்கெட் 94 ரன்களையும், ஸாக் கிரௌலி 84 ரன்களையும் சேர்த்து ஆட்டமிழந்தனர். பின்னர் இணைந்த ஜோ ரூட் மற்றும் ஒல்லி போப் இணை சிறப்பான ஆட்டத்தை வெளிப்படுத்தியதுடன் தங்களது அரைசதங்களையும் பதிவுசெய்து விளையாடி வருகின்றனர். இந்நிலையில் இப்போட்டியில் ஜோ ரூட் அரைசதம் கடந்ததன் மூலம் சர்வதேச கிரிக்கெட்டில் சில சாதனைகளைப் படைத்துள்ளார். 

சர்வதேச டெஸ்டில் அதிக ரன்கள்

இப்போட்டியில் ஜோ ரூட் அரைசதம் கடந்ததன் மூலம் சர்வதேச டெஸ்ட் கிரிக்கெட்டில் 13,290 ரன்களைச் சேர்த்தார். இதன்மூலம் சர்வதேச டெஸ்டில் அதிக ரன்களைக் குவித்த வீரர் பட்டியலில் ராகுல் டிராவிட், ஜாக் காலிஸ் ஆகியோரைப் பின்னுக்கு தள்ளி மூன்றாம் இடத்திற்கு முன்னேறியுள்ளார். இந்த பட்டியலில் இந்திய அணியின் சச்சின் டெண்டுல்கர் முதலிடத்திலும், ஆஸ்திரேலியாவின் ரிக்கி பாண்டிங் இரண்டாம் இடத்திலும் உள்ளனர். 

டெஸ்ட் கிரிக்கெட்டில் அதிக ரன்கள்

• 1,5921 - சச்சின் டெண்டுல்கர் (329 இன்னிங்ஸ்)
• 13,378 - ரிக்கி பாண்டிங் (287 இன்னிங்ஸ்)
• 13,290* - ஜோ ரூட் (286 இன்னிங்ஸ்)
• 13,289 - ஜாக் காலிஸ் (280 இன்னிங்ஸ்)
• 13,288 - ராகுல் டிராவிட் (286 இன்னிங்ஸ்)

டெஸ்டில் அதிக அரைசதங்கள்

இப்போட்டியின் மூலம் ஜோ ரூட் சர்வதேச கிரிக்கெட்டில் தனது 67ஆவது அரைசதத்தைப் பதிவுசெய்து அசத்தினார். இதன்மூலம் சர்வதேச டெஸ்ட் கிரிக்கெட்டில் அதிக அரைசதங்களைக் கடந்த இரண்டாவது வீரர் எனும் பெருமையைப் பெற்றுள்ளார். முன்னதாக ஜோ ரூட் மற்றும் சந்தர்பால் இருவரும் 66 சாதங்களுடன் இரண்டாம் இடத்தை பகிர்ந்த நிலையில், தற்போது ஜோ ரூட் புதிய மைல் கல்லை எட்டியுள்ளார். 

டெஸ்ட் வரலாற்றில் அதிக அரைசதங்கள்

• 68 - சச்சின் டெண்டுல்கர்.
• 67* - ஜோ ரூட்
• 66 - ஷிவ்நரேன் சந்தர்பால்
• 63 - ராகுல் டிராவிட்
• 63 - ஆலன் பார்டர்

அதிக 50+ ஸ்கோர்கள்

இப்போட்டியில் ஜோ ரூட் அரைசதம் கடந்து விளையாடி வரும் நிலையில், சர்வதேச டெஸ்டில் அதிக முறை 50+ ஸ்கோரை பதிவுசெய்த வீரர்கள் வரிசையில் இரண்டாம் இடத்திற்கு முன்னேறியுள்ளார். இதற்கு முன் ஆஸ்திரேலியாவின் ரிக்கி பாண்டிங் 103 முறை 50+ ஸ்கோரை பதிவுசெய்து இரண்டாம் இடத்தில் இருந்த நிலையில், ஜோ ரூட் 104 முறை 50+ ஸ்கோரை பதிவுசெய்து இரண்டாம் இடத்தைப் பிடித்துள்ளார். 

டெஸ்ட் போட்டிகளில் அதிக முறை 50+ ரன்கள் எடுத்தவர்கள்

• 119 - சச்சின் டெண்டுல்கர்
• 104* - ஜோ ரூட்
• 103 - ரிக்கி பாண்டிங்
• 103 - ஜாக் காலிஸ்
• 99 - ராகுல் டிராவிட்

இங்கிலாந்து பிளேயிங் லெவன்: ஜாக் கிரௌலி, பென் டக்கெட், ஒல்லி போப், ஜோ ரூட், ஹாரி ப்ரூக், பென் ஸ்டோக்ஸ் (கேப்டன்), ஜேமி ஸ்மித், லியாம் டௌசன், கிறிஸ் வோக்ஸ், பிரைடன் கார்ஸ், ஜோஃப்ரா ஆர்ச்சர்.

இந்தியா பிளேயிங் லெவன்: கேஎல் ராகுல், யஷஸ்வி ஜெய்ஸ்வால், சாய் சுதர்ஷன், ஷுப்மன் கில்(கேப்டன்), ரிஷப் பந்த், ரவீந்திர ஜடேஜா, வாஷிங்டன் சுந்தர், ஷர்துல் தாக்கூர். ஜஸ்பிரித் பும்ரா, அன்ஷுல் கம்போஜ், முகமது சிராஜ்.