வெஸ்ட் இண்டீஸ் மகளிர் அணி இங்கிலாந்தில் சுற்றுப்பயணம் மேற்கொண்டு 3 போட்டிகள் கொண்ட டி20 மற்றும் ஒருநாள் தொடரில் விளையாடி வருகிறது. இதில் நடந்து முடிந்த டி20 தொடரில் இங்கிலாந்து மகளிர் அணி 3-0 என்ற கணக்கில் வெஸ்ட் இண்டீஸை மகளிர் அணியை வீழ்த்தி தொடரை வென்று அசத்தியுள்ளது.
இதனையடுத்து இங்கிலாந்து மகளிர் - வெஸ்ட் இண்டீஸ் மகளிர் அணிகளுக்கு இடையேயான மூன்று போட்டிகள் கொண்ட ஒருநாள் தொடரானது நாளை (மே 30) முதல் நடைபெறவுள்ளது. இதில் இரு அணிகாளுக்கும் இடையேயான முதல் ஒருநாள் போட்டி நாளை டெர்பில் உள்ள கவுண்டி கிரிக்கெட் மைதானத்தில் நடைபெறவுள்ளது. இதில் ஏற்கெனவே இங்கிலாந்து அணி டி20 தொடரை வென்றுள்ள நிலையில் ஒருநாள் தொடரையும் கைப்பற்றும் முயற்சியில் உள்ளது.
அதேசமயம் டி20 தொடரை இழந்துள்ள வெஸ்ட் இண்டீஸ் அணி ஒருநாள் தொடரில் அதற்கான பதிலடியைக் கொடுக்க காத்திருக்கிறது. இதனால் இப்போட்டி மீதான எதிர்பார்ப்புகள் அதிகரித்துள்ளன. இந்நிலையில் இத்தொடருக்கு முன்னதாக இங்கிலாந்து அணி பெரும் பின்னடைவை சந்தித்துள்ளது. அந்த அணியின் முன்னாள் கேப்டனும் நட்சத்திர வீராங்கனையுமான ஹீதர் நைட் ஒருநாள் தொடரிலிருந்து விலகுவதாக அறிவிக்கப்பட்டுள்ளது.
முன்னதாக வெஸ்ட் இண்டீஸ் டி20 தொடரின் போது ஹீதர் நைட் காயத்தை சந்தித்ததாகவும், அதற்கான சிகிச்சையை பெற்று வருவதாகவும் தகவல்கள் வெளியாகின. இந்நிலையில் அவருடைய காயம் தீவிரமடைந்ததை அடுத்து, வெஸ்ட் இண்டீஸ் ஒருநாள் தொடர் மற்றும் தி ஹன்ட்ரட் தொடர்களிலிருந்து விலகியதாக அறிவிக்கப்பட்டுள்ளது. இருப்பினும் ஒருநாள் உலகக்கோப்பை தொடருக்கு முன்னதாக அவர் காயத்திலிருந்து மீள்வார் என எதிர்பார்க்கப்படுகிறது.
மேற்கொண்டு ஹீதர் நைட் தொடரிலிருந்து விலகும் நிலையில் அவருக்கு மாற்றாக அலிஸ் கேப்ஸி ஏற்கெனவே இங்கிலாந்து ஒருநாள் அணியில் சேர்க்கப்பட்டிருந்தார். இதனால் இத்தொடரில் அவரது இடத்தை அலிஸ் கேப்ஸி நிரப்புவார் என்பது உறுதியாகிவுள்ளது. அதேசமயம் காயத்திலிருந்து மீண்டுள்ள லாரன் ஃபிலர் இங்கிலாந்து ஒருநாள் அணியில் மீண்டும் சேர்க்கப்பட்டார் என்பதும் குறிப்பிடத்தக்கது.
இங்கிலாந்து மகளிர் ஒருநாள் அணி: நாட் ஸ்கைவர்-பிரண்ட் (கே), எமிலி ஆர்லாட், டாமி பியூமண்ட், லாரன் பெல், ஆலிஸ் கேப்ஸி, கேட் கிராஸ், ஆலிஸ் டேவிட்சன்-ரிச்சர்ட்ஸ், சார்லி டீன், சோபியா டங்க்லி, லாரன் ஃபிலர், மஹிகா கவுர், சாரா க்ளென், ஆமி ஜோன்ஸ், எம்மா லாம்ப், லின்சி ஸ்மித்.
Also Read: LIVE Cricket Score
வெஸ்ட் இண்டீஸ் மகளிர் அணி: ஹீலி மேத்யூஸ் (கே), ஷெமைன் காம்பெல் (துணைக்கேப்டன்), ஆலியா அலீன், ஜஹ்ஸாரா கிளாக்ஸ்டன், அஃபி பிளெட்சர், செர்ரி ஆன் ஃப்ரேசர், ஷபிகா கஜ்னபி, ஜன்னில்லியா கிளாஸ்கோ, ரியலினா கிரிம்மண்ட், ஸைதா ஜேம்ஸ், கியானா ஜோசப், மாண்டி மங்ரு, அஷ்மினி முனிசர், கரிஷ்மா ராம்ஹராக், ஸ்டெஃபானி டெய்லர்.