ஐசிசி ஒருநாள் உலகக்கோப்பை கிரிக்கெட் தொடர் இறுதிக்கட்டத்தை எட்டியுள்ளது. இதில் இன்று நடைபெற்ற 40ஆவது லீக் போட்டியில் இங்கிலாந்து மற்றும் நெதர்லாந்து அணிகள் பலப்பரீட்சை நடத்தின. மகாராஷ்டிரா கிரிக்கெட் சங்க மைதானத்தில் நடைபெற்ற இப்போட்டியில் டாஸ் வென்ற இங்கிலாந்து அணி கேப்டன் ஜோஸ் பட்லர் முதலில் பேட்டிங் செய்வதாக அறிவித்தார்.
அதன்படி களமிறங்கிய இங்கிலாந்து அணிக்கு டேவிட் மாலன் - ஜானி பேர்ஸ்டோவ் இணை தொடக்கம் கொடுத்தனர். இதில் ஜானி பேர்ஸ்டோவ் 15 ரன்களில் ஆட்டமிழந்து பெவிலியனுக்கு நடையைக் கட்டினார். அதன்பின் வந்த ஜோ ரூட் ஒருபக்கம் நிதான ஆட்டத்தை வெளிப்படுத்த, மற்றொரு தொடக்க வீரரான டேவிட் மாலன் அதிரடியான ஆட்டத்தை வெளிப்படுத்தி அரைசதம் கடந்து அசத்தினர்.
அதன்பின் 28 ரன்கள் எடுத்திருந்த ஜோ ரூட் ஆட்டமிழக்க, மறுபக்கம் சதமடிப்பார் என எதிர்பார்க்கப்பட்ட டேவிட் மாலன் 10 பவுண்டரி, 2 சிக்சர்கள் என 87 ரன்கள் எடுத்த நிலையில் ஆட்டமிழந்து சதமடிக்கும் வாய்ப்பை தவறவிட்டார். இதையடுத்து களமிறங்கிய ஹாரி ப்ரூக் 11, ஜோஸ் பட்லர் 5 , மொயீன் அலி 4 என அடுத்தடுத்து சொற்ப ரன்களுக்கு விக்கெட்டை இழந்து ஏமாற்றமளித்தனர்.
அதனைத்தொடர்ந்து ஜோடி சேர்ந்த பென் ஸ்டோக்ஸ் - கிறிஸ் வோக்ஸ் இணை சிறப்பான ஆட்டத்தை வெளிப்படுத்தி விக்கெட் இழப்பை தடுத்ததுடன் அணியின் ஸ்கோரையும் மளமளவென உயர்த்தினர். இதில் அதிரடியான ஆட்டத்தை வெளிப்படுத்திய பென் ஸ்டோக்ஸ் 78 பந்துகளில் தனது முதல் உலகக்கோப்பை சதத்தைப் பதிவுசெய்து அசத்தினார். அவரைத்தொடர்ந்து கிறிஸ் வோக்ஸும் தனது அரைசதத்தைப் பதிவுசெய்து அசத்தினார்.
அதன்பின் அரைசதம் கடந்த கையோடு கிறிஸ் வோக்ஸ் 51 ரன்களுக்கு விக்கெட்டை இழக்க, மறுபக்கம் இறுதிவரை சதமடித்து அசத்திய பென் ஸ்டோக்ஸ் 6 பவுண்டரி, 6 சிக்சர்கள் என 108 ரன்களை எடுத்து விக்கெட்டை இழந்தார். இதன்மூலம் இங்கிலாந்து அணி 50 ஓவர்கள் முடிவில் 9 விக்கெட்டுகளை இழந்து 339 ரன்களைச் சேர்த்துள்ளது.
இதையடுத்து இலக்கை நோக்கி களமிறங்கிய நெதர்லாந்து அணிக்கு மேக்ஸ் ஓடவுட் - வெஸ்லி பரேஸி இணை தொடக்கம் கொடுத்தனர். இதில் மேக்ஸ் ஓடவுட் 5 ரன்களுக்கு ஆட்டமிழக்க, அடுத்து களமிறங்கிய காலின் அக்கர்மோன் ரன்கள் ஏதுமின்றியும் என விக்கெட்டை இழந்தனர். அதன்பின் பரோஸியுடன் இணைந்த ஏங்கல்பெர்ட் அதிரடியாக விளையாடி ஸ்கோரை உயர்த்தினார்.
இதில் அரைசதம் அடிப்பார் என எதிர்பார்க்கப்பட்ட வெஸ்லி பரேஸி 37 ரன்களுக்கு ஆட்டமிழந்து அரைசதம் அடிக்கும் வாய்ப்பை தவறவிட்டார். அதன்பின் ஏங்கல்பெர்ட் 33 ரன்களுக்கும், கேப்டன் ஸ்காட் எட்வர்ட்ஸ் 38 ரன்களுக்கும், தேஜா நிடமனுரு 41 ரன்களையும் சேர்த்து ஆட்டமிழக்க, அடுத்து களமிறங்கிய வீரர்களும் சொற்ப ரன்களுக்கு ஆட்டமிழந்தனர்.
இதனால் நெதர்லாந்து அணி 37.2 ஓவர்களில் அனைத்து விக்கெட்டுகளையும் இழந்து 179 ரன்களுக்கு ஆல் அவுட்டானது. இங்கிலாந்து அணி தரப்பில் மொயீன் அலி, ஆதில் ரஷித் ஆகியோர் தலா 3 விக்கெட்டுகளையும் கைப்பற்றினர். இதன் மூலம் இங்கிலாந்து அணி 160 ரன்கள் வித்தியாசத்தில் நெதர்லாந்து அணியை வீழ்த்தி வெற்றிபெற்றதுடன், நடப்பு உலகக்கோப்பை கிரிக்கெட் தொடரில் தங்களது இரண்டாவது வெற்றியைப் பதிவுசெய்துள்ளது.