தனது உடற்தகுதி குறித்து அப்டேட் கொடுத்த மிட்செல் ஸ்டார்க்!

ஆஸ்திரேலிய அணி இந்தியாவில் சுற்றுப்பயணம் செய்து 4 டெஸ்டுகள், 3 ஒருநாள் ஆட்டங்களில் விளையாடுகிறது. ஆஸ்திரேலியாவுக்கு எதிரான முதல் டெஸ்டை ஒரு இன்னிங்ஸ் மற்றும் 132 ரன்கள் வித்தியாசத்தில் வெற்றி பெற்றது இந்திய அணி. இந்நிலையில் இரு அணிகளுக்கும் இடையேயான 2ஆவது டெஸ்ட், டெல்லியில் நாளை மறுநாள் தொடங்குகிறது. 

காயம் காரணமாக முதல் டெஸ்டில் ஆஸ்திரேலிய வேகப்பந்து வீச்சாளர் மிட்செல் ஸ்டார்க் விளையாடவில்லை. தென் ஆப்பிரிக்காவுக்கு எதிரான பாக்ஸிங் டே டெஸ்டில் காயமடைந்ததால் இந்நிலை ஏற்பட்டது. இந்நிலையில் இரண்டாவது டெஸ்ட் போட்டியில் மிட்செல் ஸ்டார்க் விளையாடுவாரா என்ற சந்தேகம் ரசிகர்கள் மத்தியில் அதிகரித்துள்ளது. 

இந்நிலையில் இதுகுறித்து பேசிய மிட்செல் ஸ்டார்க், “என்னுடைய பந்துவீச்சில், உடற்தகுதியில் இன்னும் சில கட்டுப்பாடுகள் உள்ளன. உடலில் இன்னும் வலு தேவைப்படுகிறது. மெல்ல மெல்ல முன்னேற்றம் கண்டு வருகிறேன். நான் நினைத்தது போல முன்னேற்றம் வேகமாக நடைபெறவில்லை. ஆனால் மருத்துவக் குழுவினர் திட்டமிட்டபடி முன்னேற்றம் கண்டு வருகிறேன். 

இன்னும் சில விஷயங்களை நான் அடையவேண்டும். ஆனால் முன்னேறி வருகிறேன் என்பது உண்மை. 2ஆவது டெஸ்டில் நான் விளையாட வாய்ப்புள்ளது. ஒவ்வொரு நாளின் இறுதியிலும் நான் எப்படி பந்துவீசுகிறேன் என அலச வேண்டும். மருத்துவக் குழுவினர் எப்படி அணுகுகிறார்கள், என்னுடைய உடற்தகுதி பற்றி கேப்டன் கம்மின்ஸும் தேர்வுக்குழுவினரும் என்ன நினைக்கிறார்கள் போன்றவை முக்கியம்.

இரண்டாவது டெஸ்டுக்கு என்னைத் தேர்வு செய்வதற்கான அனைத்து பணிகளையும் நான் செய்வேன். அதற்குப் பிறகு அணியினருடன் இணைந்து பேசி முடிவெடுக்கப்படும்” என்று கூறியுள்ளார்.