இங்கிலாந்து - வெஸ்ட் இண்டீஸ் அணிகளுக்கு இடையேயான முதல் டி20 போட்டி நேற்று செஸ்டர் லீ ஸ்ட்ரீட்டில் நடைபெற்றது. இப்போட்டியில் இங்கிலாந்து அணி 21 ரன்கள் வித்தியாசத்தில் வெஸ்ட் இண்டீஸ் அணியை வீழ்த்தியதுடன் 1-0 என்ற கணக்கில் தொடரில் முன்னிலையும் பெற்றுள்ளது.
மேலும் இப்போட்டியில் இங்கிலாந்து அணியின் நட்சத்திர பேட்டர் ஜோஸ் பட்லர் 59 பந்துகளில் 6 பவுண்டரிகல், 4 சிக்ஸர்கள் என 96 ரன்களைச் சேர்த்து அணியின் வெற்றியில் பங்காற்றினார். அதேசமயம் பந்துவீச்சில் சிறப்பாக செயல்பட்ட லியாம் டௌசன் 4 விக்கெட்டுகளை வீழ்த்தி ஆட்டநாயகன் விருதை வென்றார். இந்நிலையில் இப்போட்டியின் மூலம் ஜோஸ் பட்லர் சர்வதேச கிரிக்கெட்டில் விராட் கோலி மற்றும் பாபர் ஆசாம் ஆகியோரின் சாதனைகளையும் முறியடித்து அசத்தியுள்ளார்.
அதன்படி வெஸ்ட் இண்டீஸுக்கு எதிரான சர்வதேச டி20 போட்டிகளில் அதிக ரன்களை குவித்த வீரர்கள் பட்டியலில் விராட் கோலி மற்றும் பாபர் ஆசமின் சாதனை ஜோஸ் பட்லர் முறியடித்துள்ளார். முன்னதாக விராட் கோலி 570 ரன்களையும், பாபர் ஆசம் 540 ரன்களையும் சேர்த்து 4 மற்றும் 5ஆம் இடத்தில் இருந்த நிலையில் தற்போது ஜோஸ் பட்லர் 611 ரன்களைச் சேர்த்து 4ஆம் இடத்திற்கு முன்னேறியுள்ளார். இந்த பட்டியலில் ரோஹித் சர்மா 693 ரன்களுடன் முதலிடத்தில் உள்ளார்.
வெஸ்ட் இண்டீஸுக்கு எதிராக அதிக டி20 ரன்கள்
- 693 - ரோஹித் சர்மா (22 இன்னிங்ஸ்)
- 662 - டேவிட் வார்னர் (15 இன்னிங்ஸ்)
- 640 - பில் சால்ட் (13 இன்னிங்ஸ்)
- 611* - ஜோஸ் பட்லர் (21 இன்னிங்ஸ்)
- 570 - விராட் கோலி (13 இன்னிங்ஸ்)
- 540- பாபர் ஆசாம் (14 இன்னிங்ஸ்)
இப்போட்டி குறித்து பேசினால், டாஸ் வென்று முதலில் பேட்டிங் செய்த இங்கிலாந்து அணியானது 20 ஓவர்கள் முடிவில் 6 விக்கெட்டுகளை இழந்து 188 ரன்களைச் சேர்த்தது. அந்த அணியில் அதிகபட்சமாக ஜோஸ் பட்லர் 96 ரன்களையும், ஜேமி ஸ்மித் 38 ரன்களையும், ஜேக்கப் பெத்தல் 23 ரன்களையும் சேர்த்ததை தவிர்த்து மற்ற வீரர்கள் சோபிக்க தவறினர். வெஸ்ட் இண்டீஸ் தரப்பில் ரொமாரியோ ஷெஃபர்ட் 2 விக்கெட்டுகளை கைப்பற்றினார்.
Also Read: LIVE Cricket Score
இதையடுத்து இலக்கை நோக்கிவிளையாடிய வெஸ்ட் இண்டீஸ் அணியில் எவின் லூயிஸ் 39 ரன்களையும், ரோஸ்டன் சேஸ் 24 ரன்களையும் சேர்த்த நிலையில் மற்ற வீரர்கள் சோபிக்க தவறியதால் அந்த அணி 20 ஓவர்கள் முடிவில் 167 ரன்களை மட்டுமே சேர்த்தது. இங்கிலாந்து தரப்பில் லியாம் டௌசன் 4 விக்கெட்டுகளை வீழ்த்தினார். இதன்மூலம் இங்கிலாந்து அணி 21 ரன்கள் வித்தியாசத்தில் வெற்றிபெற்று அசத்தியது.