ஐபிஎல் தொடரில் இன்று நடைபெற்ற லீக் போட்டியில் டெல்லி கேப்பிட்டல்ஸ் மற்றும் குஜராத் டைட்டன்ஸ் அணிகள் பலப்பரீட்சை நடத்தின. டெல்லியில் உள்ள அருண் ஜெட்லி கிரிக்கெட் மைதானத்தில் நடைபெற்ற இப்போட்டியில் டாஸ் வென்ற குஜராத் டைட்டன்ஸ் அணி முதலில் பந்துவீசுவதாக அறிவித்தது.
இதனையடுத்து பேட்டிங் செய்ய களமிறங்கிய டெல்லி கேப்பிட்டல்ஸ் அணியில் ஃபாஃப் டூ பிளெசிஸ் 5 ரன்னிலும், ஆபிஷேக் போரல் 30 ரன்களிலும், அக்ஸர் படேல் 25 ரன்னிலும் என அடுத்தடுத்து விக்கெட்டுகளை இழந்தனர். ஒருபக்கம் விக்கெட்டுகள் சரிந்தாலும் மறுமுனையில் தொடர்ந்து அபாரமாக விளையாடி வந்த கேஏல் ராகுல் ஐபிஎல் தொடரில் தன்னுடைய 5ஆவது சதத்தைப் பூர்த்தி செய்து அசத்தினார்.
இப்போட்டியில் இறுதிவரை ஆட்டமிழக்காமல் இருந்த கேஎல் ராகுல் 14 பவுண்டரி, 4 சிக்ஸர்கள் என 112 ரன்களையும், டிரிஸ்டன் ஸ்டப்ஸ் 2 சிக்ஸர்களுடன் 21 ரன்களையும் சேர்த்து அணிக்கு ஃபினிஷிங்கைக் கொடுத்தனர். இதன்மூலம் டெல்லி கேப்பிட்டல்ஸ் அணி 20 ஓவர்கள் முடிவில் 3 விக்கெட்டுகளை இழந்து 199 ரன்களைச் சேர்த்தது. குஜராத் தரப்பில் அர்ஷத் கான், சாய் கிஷோர், பிரசித் கிருஷ்ணா தலா ஒரு விக்கெட்டை கைப்பற்றினர்.
இந்நிலையில் இப்போட்டியில் கேஎல் ராகுல் சதமடித்ததன் மூலம் சில சாதனைகளையும் படைத்துள்ளார். அதன்படி இப்போட்டியில் கேஎல் ராகுல் 33 ரன்களைச் சேர்த்ததன் மூலம் டி20 கிரிக்கெட்டில் 8ஆயிரம் ரன்களைக் கடந்த 6ஆவது இந்திய வீரர் எனும் பெருமையைப் பெற்றுள்ளார். இதற்கு முன்னதாக இந்திய அணியின் விராட் கோலி, ரோஹித் சர்மா, ஷிகர் தவான், சுரேஷ் ரெய்னா மற்றும் சூர்யகுமார் யாதவ் ஆகியோர் மட்டுமே இந்த சாதனையை படைத்துள்ளனர்.
டி20 கிரிக்கெட்டில் அதிக ரன்கள் எடுத்த இந்திய வீரர்
- விராட் கோலி - 13,391 ரன்கள்
- ரோஹித் சர்மா - 12,130 ரன்கள்
- ஷிகர் தவான் - 9,797 ரன்கள்
- சுரேஷ் ரெய்னா - 8,654 ரன்கள்
- சூர்யகுமார் யாதவ் - 8,413 ரன்கள்
- கே.எல். ராகுல் - 8,003* ரன்கள்
மேற்கொண்டு கேஎல் ராகுல் இந்த போட்டியிலேயே 8ஆயிரம் ரன்களை கடந்ததன் மூலம், டி20 கிரிக்கெட்டில் அதிவேகமாக 8ஆயிரம் ரன்களை கடந்த இந்திய வீரர் எனும் விராட் கோலியின் சாதனையையும் முறியடிக்கவுள்ளார். முன்னதாக விராட் கோலி 243 இன்னிங்ஸ்களில் 8ஆயிரம் ரன்களைக் கடந்ததே சாதனையாக இருந்த நிலையில், கேஎல் ராகுல் 224 இன்னிங்ஸ்களில் 8000 ரன்களை எடுத்து புதிய சாதனை படைத்துள்ளார் என்பது குறிப்பிடத்தக்கது.
டி20 கிரிக்கெட்டில் அதிவேகமாக 8000 ரன்கள் எடுத்த வீரர்கள் (இன்னிங்ஸ்)
- கிறிஸ் கெய்ல் - 213 இன்னிங்ஸ்கள்
- பாபர் அசாம் - 218 இன்னிங்ஸ்
- விராட் கோலி - 243 இன்னிங்ஸ்கள்
- முகமது ரிஸ்வான் - 244 இன்னிங்ஸ்
- ஆரோன் பின்ச் - 254 இன்னிங்ஸ்
Also Read: LIVE Cricket Score
இதுதவிர்த்து டெல்லி கேப்பிட்டல்ஸ் அணிக்காக கேஎல் ராகுல் சதமடித்து அசத்தியதன் மூலம் இபிஎல் தொடர் வரலாற்றில் மூன்று வெவ்வேறு அணிகளுக்காக சதமடித்த வீரர் எனும் சாதனையையும் கேஎல் ராகுல் படைத்துள்ளார். இதற்கு முன்னதாக அவர் பஞ்சாப் கிங்ஸ் மற்றும் லக்னோ சூப்பர் ஜெயண்ட்ஸ் அணிகளுக்காக ஐபிஎல் தொடரில் சதமடித்து அசத்தியுள்ளார் என்பது குறிப்பிடத்தக்கது.