2024ஆம் ஆண்டில் அதிக டெஸ்ட் விக்கெட்டுகளை வீழ்த்திய டாப் 5 வீரர்கள்; இரு இந்திய வீரர்களுக்கு இடம்!

2024 ஆம் ஆண்டு டெஸ்ட் கிரிக்கெட்டுக்கு சிறப்பான ஒரு ஆண்டாக இருந்துள்ளது. அந்தவகையில் கடந்துள்ள 2024ஆம் ஆண்டில் பல சிறந்த பந்துவீச்சும் பதிவாகியுள்ளது. இதில் இந்திய அணி ஆண்டின் இறுதியில் அடுத்தடுத்து தோல்விகளைச் சந்தித்திருந்தாலும், பந்துவீச்சு துறையானது உலகின் வலிமை வாய்ந்த ஒன்றாக இருந்துள்ளது. இந்நிலையில் 2024ஆம் ஆண்டில் டெஸ்ட் கிரிக்கெட்டில் அதிக விக்கெட்டுகளை வீழ்த்திய முதல் 5 பந்துவீச்சாளர்கள் பற்றி இப்பதிவில் பார்ப்போம்.

ஜஸ்பிரித் பும்ரா

இந்திய வேகப்பந்து வீச்சாளர் ஜஸ்பிரித் பும்ரா 2024 ஆம் ஆண்டின் மிகவும் வெற்றிகரமான டெஸ்ட் பந்துவீச்சாளராக உள்ளார். அவர் இந்த ஆண்டு 13 டெஸ்ட் போட்டிகளில் 26 இன்னிங்ஸ்களில் விளையாடி 71 விக்கெட்டுகளை வீழ்த்தியுள்ளார். அதில் 45 ரன்களுக்கு 6 விக்கெட்டுகளை கைப்பற்றியது அவரது சிறந்த செயல்திறனாக உள்ளது. அதிலும் நடைபெற்று வரும் பார்டர் கவாஸ்கர் கோப்பை தொடரின் நான்கு டெஸ்ட் போட்டிகளில் மட்டுமே அவர் 30 விக்கெட்டுகளை வீழ்த்தினார் என்பது குறிப்பிடத்தக்கது.

கஸ் அட்கின்சன்

இங்கிலாந்து அணிக்காக 2024ஆம் ஆண்டில் அறிமுகமான கஸ் அட்கின்சன் அதிக டெஸ்ட் விக்கெட்டுகளை வீழ்த்திய வீரர்கள் அடிப்படையில் இரண்டாவது இடத்தில் உள்ளார். அவர் 11 டெஸ்ட் போட்டிகளில் 21 இன்னிங்ஸில் விளையாடி 52 விக்கெட்டுகளை எடுத்துள்ளார். மேலும் டெஸ்ட் வரலாற்றில் அறிமுகமான ஆண்டிலேயே 50 விக்கெட்டுகளை வீழ்த்திய இரண்டாவது பந்துவீச்சாளர் என்ற சாதனையையும் படைத்துள்ளார். மேலும் இதில் அவர் ஒரு இன்னிங்ஸில் மூன்று முறை ஐந்து விக்கெட்டுகளை வீழ்த்தியுள்ளார்.

சோயப் பஷீர்

இங்கிலாந்து சுழற்பந்து வீச்சாளர் சோயிப் பஷீர் 2024 ஆம் ஆண்டில் 15 டெஸ்ட் போட்டிகளில் 25 இன்னிங்ஸ்களில் விளையாடி 49 விக்கெட்டுகளை வீழ்த்தி இந்த பட்டியலில் மூன்றாம் இடத்தைப் பிடித்துள்ளார். மேற்கொண்டு 2024ஆம் ஆண்டில் அதிக டெஸ்ட் போட்டிகளில் விளையாடிய பந்து வீச்சாளர் எனும் பெருமையையும் அவர் பெற்றுள்ளார். இந்த காலகட்டத்தில் அவர் ஒரு இன்னிங்ஸில் மூன்று முறை ஐந்து விக்கெட்டுகளை வீழ்த்தியுள்ளார் என்பது குறிப்பிடத்தக்கது.

மாட் ஹென்றி

நியூசிலாந்து வேகப்பந்து வீச்சாளர் மேட் ஹென்றி 2024ஆம் ஆண்டில் 9 டெஸ்ட் போட்டிகளில் 18 இன்னிங்ஸ்களில் விளையாடி 48 விக்கெட்டுகளை வீழ்த்தி அதிக விக்கெட்டுகள் வீழ்த்திய நான்காவது வீரராக இடம்பிடித்துள்ளார். இந்த காலகட்டத்தில் அவர் ஒரு இன்னிங்ஸில் மூன்று முறை ஐந்து விக்கெட்டுகளை வீழ்த்தியுள்ளார். 

ரவீந்திர ஜடேஜா

Also Read: Funding To Save Test Cricket

இந்த பட்டியலில் இந்திய ஆல்ரவுண்டர் ரவீந்திர ஜடேஜா ஐந்தாவது இடத்தில் உள்ளார். ஜடேஜா 2024ஆம் ஆண்டில் 12 டெஸ்டில் 21 இன்னிங்ஸ்களில் விளையாடி 48 விக்கெட்டுகளை எடுத்துள்ளார். ஆனால் அவர் இந்த ஆண்டில் ஒரு இன்னிங்ஸில் மட்டுமே 5 விக்கெட்டுகளை வீழ்த்தியுள்ளார் என்பது குறிப்பிடத்தக்கது.