டி20 உலகக்கோப்பை தொடரில் விளையாட போவதில்லை - சுனில் நரைன் திட்டவட்டம்!

ஐபிஎல் தொடரின் 17ஆவது சீசன் விறுவிறுப்பாக நடைபெற்றுவருகிறது. இதில் கொல்கத்தா நைட் ரைடர்ஸ் அணிக்காக விளையாடிவரும் சுனில் நரைன் இந்த ஐபிஎல் தொடரில் அபாரமான ஆட்டத்தை வெளிப்படுத்தி வருகிறார். அதிலும் குறிப்பாக ராஜஸ்தான் ராயல்ஸ் அணிக்கு எதிரான போட்டியில் தனது முதல் டி20 சதத்தையும் பதிவுசெய்து அசத்தியுள்ளார். அதுமட்டுமின்றி பந்துவீச்சிலும் சிறப்பாக செயல்பட்டு எதிரணி பேட்டர்களை தொடர்ந்து அழுத்தத்தில் வைத்துள்ளார். 

இதன் காரணமாக வரவுள்ள டி20 உலகக்கோப்பை தொடருக்கான வெஸ்ட் இண்டீஸ் அணியிலும் சுனில் நரைன் இடம்பிடிப்பார் என்ற எதிர்பார்ப்புகள் அதிகரித்துள்ளன. ஏனெனில் பேட்டிங், பவுலிங்கில் அசத்திவரும் சுனில் நரைன் வெஸ்ட் இண்டீஸ் அணியில் இடம்பிடித்தால் அது கூடுதல் பலமாகவும் இருக்கும் என கூறப்படுகிறது. இதுகுறித்து அந்த அணியின் கேப்டன் ரோவ்மன் பாவெலும், சுனில் நரைனிடம் பேசியுள்ளதாகவும் சமீபத்தில் தகவல்கள் வெளியாகின. 

இந்நிலையில் எதிர்வரும் டி20 உலகக் கோப்பை தொடரில் வெஸ்ட் இண்டீஸ் அணிக்காக விளையாடப் போவதில்லை என சுனில் நரைன் தெரிவித்துள்ளார். இதுகுறித்து பேசிய அவர், “எதிர்வரும் டி20 உலகக்கோப்பை தொடரில் வெஸ்ட் இண்டீஸ் அணிக்காக விளையாட வேண்டும் என அழைப்புகள் வந்தன. நான் ஓய்வில் இருந்து திரும்ப வந்து டி20 உலகக்கோப்பையில் விளையாட வேண்டும் என சிலர் சொல்கிறார்கள்.

ஆனால் அந்த கதவை நான் ஏற்கனவே மூடிவிட்டேன். வெஸ்ட் இண்டீஸ் அணி வீரர்களை தொடர்ந்து ஆதரிப்பேன். கடந்த சில மாதங்களாக கடினமாக உழைத்து, மற்றொரு பட்டத்தை வெல்லும் திறன் கொண்டவர்கள் என்பதை எங்கள் அற்புதமான ரசிகர்களுக்குக் காட்டத் தகுதியான நண்பர்களே, உங்களுக்கு என் வாழ்த்துக்கள்” என்று தெரிவித்துள்ளார். 

வெஸ்ட் இண்டீஸ் அணியின் தலைசிறந்த சுழற்பந்து வீச்சாளராக இருந்து வந்த சுனில் நரைன், 6 டெஸ்ட், 65 ஒருநாள் மற்றும் 51 டி20 போட்டிகளில்  விளையாடி 550 ரன்களையும், 165 விக்கெட்டுகளையும் கைப்பற்றியுள்ளார். அதேபோல் ஐபிஎல் தொடரில் 169 போட்டிகளில் விளையாடி 172 விக்கெட்டுகளையும், 1,332 ரன்களையும் சேர்த்துள்ளார். முன்னதாக கடந்த 2023ஆம் ஆண்டு அவர் சர்வதேச கிரிக்கெட்டில் இருந்து ஓய்வை அறிவித்தார் என்பது குறிப்பிடத்தக்கது.