உடல் நலம் பாதித்தும் சதமடித்த கோலி? - அனுஷ்கா சர்மாவின் தகவலால் ரசிகர்கள் நெகிழ்ச்சி!

ஆஸ்திரேலியாவுக்கு எதிரான நான்காவது டெஸ்ட் போட்டியில் இந்திய அணியின் முன்னாள் கேப்டன் விராட் கோலி 186 ரன்கள் விளாசி அசத்தினார். விராட் கோலியின் இமாலய இன்னிங்ஸ் மூலம் தற்போது ஆஸ்திரேலியாவை விட இந்திய அணி 91 ரன்கள் முன்னிலை பெற்றது. இதன் மூலம் இந்திய அணி இந்த டெஸ்ட் போட்டியில் வெற்றி பெற கொஞ்சம் வாய்ப்பு ஏற்பட்டிருக்கிறது.

கடைசி நாளில் ஆஸ்திரேலிய அணியை 150 ரன்களில் இந்தியா சுருட்டி விட்டால், எஞ்சியிருக்கும் 60 ரன்களை இந்திய அணி தங்களுடைய இரண்டாவது இன்னிங்ஸில் எட்டி விடலாம். இந்த நிலையில் விராட் கோலி இன்றைய ஆட்டத்தின் போது கொஞ்சம் சோர்வாக காணப்பட்டார். 59 ரன்கள் உடன் நான்காவது நாள் ஆட்டத்தை தொடங்கிய விராட் கோலி ஒரு முறை கூட பவுண்டரி அடிக்காமல் சிங்கிள்ஸ் மற்றும் டபுள்ஸ் ஓடியே சதத்தை எட்டினார்.

அதன் பிறகு கூட விராட் கோலி தன்னுடைய விக்கெட்டை இழக்காமல் பொறுப்பான ஆட்டத்தை மீண்டும் வெளிப்படுத்தினார். ஒரு முனையில் விராட் கோலி நங்கூரம் போல் நின்று ரன்கள் சேர்க்க மறுமுனையில் அக்சர்பட்டேல் அதிரடியாக விளையாடினார். இதனால் இந்தியாவின் ஸ்கோர் மெல்ல மெல்ல உயர்ந்தது.ஒரு கட்டத்தில் வெயிலில் தாக்கம் அதிகமாக இருந்ததால், தண்ணீர் சத்து குறைந்து விராட் கோலிக்கு காலில் வலி ஏற்பட்டது. இதனை அடுத்து அணி மருத்துவர்கள் விராட் கோலிக்கு சிகிச்சை அளித்தார்கள்.

இந்த நிலையில் தான் விராட் கோலியின் மனைவி அனுஷ்கா சர்மா சமூக வலைத்தளத்தில் ஒரு பதிவை போட்டுள்ளார். அதில் உடல்நலம் பாதிப்பையும் மீறி விளையாடி வருவதாகவும், எனக்கு எப்போதும் உத்வேகம் அளிக்கும் மனிதனாகவும் விராட் கோலி இருக்கிறார் என்று அவர் எழுதியுள்ளார். இதன் மூலம் விராட் கோலி உடல் நலம் பாதிக்கப்பட்டு அதனையும் மீறி இன்று விளையாடி இருக்கிறார்.

இந்த செய்தி பார்த்ததும் விராட் கோலியை ரசிகர்கள் அனைவரும் பாராட்டி வருகின்றனர். நமக்கு பல்வேறு தடைகள் வந்தாலும் அதனை போராடி குறிக்கோளை நோக்கி ஓடி வெற்றி பெற வேண்டும் என்பதற்கு விராட் கோலி ஒரு நல்ல பாடமாக இருக்கிறார். விராட் கோலி சதம் அடித்ததற்கு சேவாக் வாழ்த்து தெரிவித்துள்ளார். ரசிகர்கள் வெல்கம் பேக் கிங் என்று ட்விட்டரில் ட்ரெண்ட் செய்து வருகிறார்கள்.