ஆஃப்கானிஸ்தான் - அயர்லாந்து அணிகளுக்கு இடையேயான மூன்று போட்டிகள் கொண்ட ஒருநாள் தொடரின் முதல் போட்டி நேற்று ஷார்ஜாவில் நடைபெற்றது. இப்போட்டியில் டாஸ் வென்ற அயர்லாந்து அணி முதலில் பந்துவீசுவதாக அறிவித்தது. அதன்படி களமிறங்கிய ஆஃப்கானிஸ்தான் அணிக்கு ரஹ்மனுல்லா குர்பாஸ் - இப்ராஹிம் ஸத்ரான் இணை தொடக்கம் கொடுத்தனர். ஆரம்பம் முதலே பொறுப்பான ஆட்டத்தை வெளிப்படுத்திய இந்த இணை அணிக்கு தேவையான அடித்தளத்தை அமைத்துக்கொடுத்தனர்.
இருவரும் இப்போட்டியில் அரைசதம் கடக்க, முதல் விக்கெட்டிற்கு 150 ரன்கள் பார்ட்னர்ஷிப் அமைத்தும் அசத்தினர். இதில் 4 பவுண்டரி 2 சிக்சர்கள் என 60 ரன்கள் சேர்த்த நிலையில் இப்ராஹிம் ஸத்ரான் தனது விக்கெட்டை இழக்க, அடுத்து வந்த அஸ்மதுல்லா ஒமர்ஸாய் 19 ரன்களுக்கு தனது விக்கெட்டை இழந்தார். அதேசமயம் மறுபக்கம் அபார ஆட்டத்தை வெளிப்படுத்திய ரஹ்மனுல்லா குர்பாஸ் சதமடித்து அசத்தினார்.
அதன்பின் அபார ஆட்டத்தை வெளிப்படுத்தி வந்த ரஹ்மனுல்லா குர்பாஸ் 8 பவுண்டரி, 6 சிக்சர்கள் என 121 ரன்கள் எடுத்திருந்த நிலையில் ஆட்டமிழந்து பெவிலியன் திரும்பினார். அவரைத் தொடர்ந்து களமிறங்கிய ரஹ்மத் ஷாவும் 2 ரன்கள் மட்டுமே எடுத்த நிலையில் ஆட்டமிழந்தார். அதேசமயம் அரைசதம் அடிப்பார் என எதிர்பார்க்கப்பட்ட முகமது நபி 3 பவுண்டரி, 2 சிக்சர்கள் என 40 ரன்களைச் சேர்த்து விக்கெட்டை இழந்தார்.
ஆனாலும் இப்போட்டியில் இறுதிவரை ஆட்டமிழக்காமல் இருந்த கேப்டன் ஹஸ்மதுல்லா ஷாஹிதி தனது அரைசதத்தைப் பதிவுசெய்து அணிக்கு ஃபினீஷிங்கை கொடுத்தார். இதன்மூலம் 50 ஓவர்கள் முடிவில் ஆஃப்கானிஸ்தான் அணி 6 விக்கெட்டுகளை இழந்து 310 ரன்களை குவித்தது. அயர்லாந்து அணி தரப்பில் சிறப்பாக பந்துவீசிய தியோ வான் வொர்காம் 3 விக்கெட்டுகளை கைப்பற்றி அசத்தினார்.
இதையடுத்து கடின இலக்கை நோக்கி விளையாடிய அயர்லாந்து அணிக்கு எதிர்பார்த்த தொடக்கம் கிடைக்கவில்லை. அந்த அணியின் டாப் ஆர்டர் வீரர்கள் ஆண்ட்ரூ பால்பிர்னி 4 ரன்களிலும், கேப்டன் பால் ஸ்டிர்லிங் 5 ரன்களிலும், கர்டிஸ் காம்பேர் 9 ரன்களிலும் என விக்கெட்டுகளை இழந்து பெவிலியனுக்கு நடையைக் கட்டினர். இதையடுத்து ஜோடி சேர்ந்த ஹாரி டெக்டர் - லோர்கன் டக்கர் இணை சிறப்பான ஆட்டத்தை வெளிப்படுத்து விக்கெட் இழப்பை தடுத்தனர்.
இதில் அபார ஆட்டத்தை வெளிப்படுத்திய இருவரும் அரைசதம் கடந்து அசத்தினர். அதன்பின் தொடர்ந்து சிறப்பான ஆட்டத்தை வெளிப்படுத்தி வந்த ஹாரி டெக்டர் தனது சதத்தைப் பதிவுசெய்து அசத்தினார். இதன்மூலம் இருவரும் இணைந்து நான்காவது விக்கெட்டிற்கு பார்ட்னர்ஷிப் முறையில் 163 ரன்களைச் சேர்த்தனர். பின் 9 பவுண்டரி, 3 சிக்சர்கள் என 138 ரன்கள் சேர்த்த நிலையில் ஹாரி டெக்டர் தனது விக்கெட்டை இழந்தார்.
அதேசமயம் மறுபக்கம் சதத்தை நெருங்கிக்கொண்டிருந்த லோர்கன் டக்கர் 8 பவுண்டரி, 2 சிக்சர்கள் என 85 ரன்களைச் சேர்த்து விக்கெட்டை இழந்ததுடன், சதமடிக்கும் வாய்ப்பையும் தவறவிட்டார். அதன்பின் களமிறங்கிய வீரர்களும் அடுத்தடுத்து சொற்ப ரன்களில் தங்களது விக்கெட்டுகளை இழந்து பெவிலியன் திரும்பினர். இதனால் அயர்லாந்து அணி 50 ஓவர்கள் முடிவில் 8 விக்கெட்டுகளை இழந்து 275 ரன்களுக்கு ஆல் அவுட்டானது.
ஆஃப்கானிஸ்தான் அணி தரப்பில் சிறப்பாக பந்துவீசிய ஃபசல்ஹக் ஃபரூக்கி 4 விக்கெட்டுகளையும், அஸ்மதுல்லா ஒமர்ஸாய் 2 விக்கெட்டுகளையும் கைப்பற்றி வெற்றிக்கு உதவினர். இதன்மூலம் ஆஃப்கானிஸ்தான் அணி 35 ரன்கள் வித்தியாசத்தில் அயர்லாந்து அணியை வீழ்த்தி வெற்றிபெற்றது. இந்த வெற்றியின் மூலம் மூன்று போட்டிகள் கொண்ட ஒருநாள் தொடரில் ஆஃப்கானிஸ்தான் அணி 1-0 என்ற கணக்கில் முன்னிலைப் பெற்றுள்ளது.