ஐசிசி சாம்பியன்ஸ் கோப்பை தொடரில் இன்று நடைபெற்று வரும் இரண்டாவது லீக் போட்டியில் வங்கதேசம் மற்றும் இந்திய அணிகள் பலப்பரீட்சை நடத்தின. துபாய் சர்வதேச கிரிக்கெட் மைதானத்தில் நடைபெற்ற இப்போட்டியில் டாஸ் வென்று முதலில் பேட்டிங் செய்த வங்கதேச அணி தாவ்ஹித் ஹிரிடோய் - ஜக்கர் அலியின் சிறப்பான ஆட்டத்தின் மூலம் 49.4 ஓவர்களில் அனைத்து விக்கெட்டுகளையும் இழந்து 228 ரன்களுக்கு ஆல் அவுட்டானது.
அந்த அணியில் அதிகபட்சமாக தாவ்ஹித் ஹிரிடோய் 100 ரன்களையும், ஜக்கர் அலி 68 ரன்களையும் சேர்த்தனர். இந்திய அணி தரப்பில் முகமது ஷமி 5 விக்கெட்டுகளையும், ஹர்ஷித் ரானா 3 விக்கெட்டுகளையும், அக்ஸர் படேல் 2 விக்கெட்டுகளையும் கைப்பற்றினர். இதனையடுத்து இலக்கை நோக்கி களமிறங்கிய இந்திய அணிக்கு கேப்டன் ரோஹித் சர்மா - ஷுப்மன் கில் இணை அதிரடியாஅன தொடக்கத்தைக் கொடுத்து அணிக்கு தேவையான அடித்தளத்தை அமைத்துக் கொடுத்தனர்.
இதில் இருவரும் இணைந்து முதல் விக்கெட்டிற்கு 69 ரன்கள் பார்ட்னர்ஷிப் அமைத்த நிலையில், அரைசதத்தை நெருங்கிய ரோஹித் சர்மா 7 பவுண்டரிகளுடன் 41 ரன்களைச் சேர்த்த கையோடு விக்கெட்டை இழந்தார். இந்நிலையில் இப்போட்டியின் மூலம் ரோஹித் சர்மா சிறப்பு சாதனை ஒன்றையும் படைத்துள்ளார். அதன்படி அவர் இப்போட்டியில் 13 ரன்களைச் சேர்த்ததன் மூலம் சர்வதேச ஒருநாள் கிரிக்கெட்டில் தனது 11ஆயிரம் ரன்களைக் கடந்து அசத்தினார்.
இதன்மூலம் சர்வதேச ஒருநாள் கிரிக்கெட்டில் அதிவேகமாக 11ஆயிரம் ரன்களைக் கடந்த இரண்டாவது வீரர் எனும் சாதனையை ரோஹித் சர்மா படைத்தார். அவருக்கு முன் இந்திய அணியின் முன்னால் ஜாம்பவான் சச்சின் டெண்டுல்கர் தனது 276ஆவது இன்னிங்ஸில் 11ஆயிரம் ரன்களை எட்டியதே சாதனையாக இருந்த நிலையில் தற்போது ரோஹித் சர்மா 261ஆவது இன்னிங்ஸில் இந்த மைல் கல்லை எட்டியுள்ளார். இந்தப் பட்டியலில் வீரர் விராட் கோலி 222 இன்னிங்ஸ்களுடன் முதலிடத்தில் உள்ளார்.
ஒருநாள் போட்டிகளில் அதிவேகமாக 11,000 ரன்களை எட்டிய வீரர்
- விராட் கோலி - 222 இன்னிங்ஸ்
- ரோஹித் சர்மா - 261 இன்னிங்ஸ்
- சச்சின் டெண்டுல்கர் - 276 இன்னிங்ஸ்
- ரிக்கி பாண்டிங் - 286 இன்னிங்ஸ்
- சவுரவ் கங்குலி - 288 இன்னிங்ஸ்
இதுதவிர்த்து ஒருநாள் கிரிக்கெட்டில் இந்த மைல் கல்லை எட்டிய 4ஆவது இந்திய வீரர் மற்றும் உலகளவில் 10ஆவது வீரர் எனும் பெருமையையும் பெற்றுள்ளார். இதுவரை, இந்தியாவுக்காக முன்னால் ஜாம்பவான் சச்சின் டெண்டுல்கர் (18,426 ரன்கள்), விராட் கோலி (13,963 ரன்கள்) மற்றும் சவுரவ் கங்குலி (11,363 ரன்கள்) ஆகியோர் மட்டுமே இந்த சாதனையை நிகழ்த்தியுள்ளனர் என்பது குறிப்பிடத்தக்கது.
Also Read: Funding To Save Test Cricket
ஒருநாள் போட்டிகளில் 11,000 ரன்கள் எடுத்த இந்திய வீரர்கள்
- சச்சின் டெண்டுல்கர் - 18,426 ரன்கள் (452 இன்னிங்ஸ்)
- விராட் கோலி - 13,963 ரன்கள் (285 இன்னிங்ஸ்)
- சவுரவ் கங்குலி - 11,363 ரன்கள் (311 இன்னிங்ஸ்)
- ரோஹித் சர்மா - 11,000* ரன்கள் (261 இன்னிங்ஸ்)