Shubman Gill Records: இங்கிலாந்து அணிக்கு எதிரான கடைசி டெஸ்ட் போட்டியில் இந்திய அணி கேப்டன் ஷுப்மன் கில் சிறப்பு சாதனையைப் படைக்கும் வாய்ப்பை பெற்றுள்ளார்.
இங்கிலாந்து - இந்தியா அணிகளுக்கு இடையேயான ஐந்தாவது டெஸ்ட் போட்டி எதிர்வரும் ஜூலை 31ஆம் தேதி லண்டனில் உள்ள கெனிங்ஸ்டன் ஓவல் கிரிக்கெட் மைதானத்தில் நடைபெறவுள்ளது. இதில் இந்திய அணி வெற்றி பெற்றால் மட்டுமே டெஸ்ட் தொடரை சமன்செய்ய முடியும் என்ற நிலையில் இப்போட்டியை எதிர்கொள்கிறது. இதற்காக இந்திய அணி வீரர்கள் தீவிரமாக தயாராகி வருகின்றனர். இந்நிலையில் இப்போட்டியின் மூலம் ஷுப்மன் கில் சில சாதனைகளைப் படைக்கும் வாய்ப்பை பெற்றுள்ளார்.
அந்தவகையில் இப்போட்டியில் ஷுப்மன் கில் ஒரு ரன் எடுக்கும் பட்சத்தில் சேனா நாடுகளில் ஒரு டெஸ்ட் தொடரில் அதிக ரன்களைக் குவித்த வீரர்கள் பட்டியலில் இரண்டாம் இடத்திற்கு முன்னேறுவர். தற்சமயம் வெஸ்ட் இண்டீஸின் முன்னாள் வீரர் கேரி சோபர்ஸ் மற்றும் இந்திய அணி கேப்டன் ஷுப்மன் கில் ஆகியோர் தலா 722 ரன்களுடன் சேனா நாடுகளில் அதிக ரன்களைக் குவித்த கேப்டன்கள் பட்டியலில் இரண்டாம் இடத்தைப் பகிர்ந்துள்ளனர்.
இதுதவிர்த்து ஷுப்மன் கில் 89 ரன்களைச் சேர்க்கும் பட்சத்தில் ஆஸ்திரேலியாவின் முன்னாள் ஜாம்பவான் டான் பிராட்மேனின் சாதனையை முறியடித்து புதிய உலக சாதனையைப் படைப்பார். தற்போது சேனா நாடுகளில் ஒரு டெஸ்ட் தொடரில் அதிக ரன்களைக் குவித்த வீரராக டான் பிராட்மேன் உள்ளார். அவர் கடந்த 1936-37ஆம் ஆண்டுகளில் இங்கிலாந்துக்கு எதிராக 810 ரன்களைக் குவித்துள்ளதே இதுநாள் வாரை சாதனையாக உள்ளது குறிப்பிடத்தக்கது.
சேனா நாடுகளில் ஒரு டெஸ்ட் தொடரில் அதிக ரன்களைக் குவித்த கேப்டன்கள்
- 810 ரன்கள் - டான் பிராட்மேன், இங்கிலாந்து, 1936-37
- 722 ரன்கள் - கேரி சோபர்ஸ், இங்கிலாந்து, 1966
- 722* ரன்கள் - ஷுப்மான் கில், இங்கிலாந்து, 2025
- 593 ரன்கள் - விராட் கோலி, இங்கிலாந்து, 2018
- 531 ரன்கள் - பிரையன் லாரா, தென்னாப்பிரிக்கா, 2003
- 497 ரன்கள் - கேரி சோபர்ஸ், ஆஸ்திரேலியா, 1968
Also Read: LIVE Cricket Score
நடப்பு இங்கிலாந்து தொடரில் ஷுப்மன் கில் அபாரமான ஃபார்மில் உள்ளார். அவர் இதுவரை இத்தொடரில் 8 இன்னிங்ஸ்களில் விளையாடி ஒரு இரட்டை சதம், 3 சதங்களுடன் 90 என்ற சராசரியில் 722 ரன்களைக் குவித்து அசத்தியுள்ளார். மேலும் இத்தொடரில் அதிக ரன்களைக் குவித்த வீரர்கள் பட்டியலிலும் ஷுப்மன் கில் முதலிடத்தில் உள்ளார். இதனால் இந்த போட்டியில் அவர் கேரி சோபர்ஸ் மற்றும் டான் பிராட்மேன் ஆகியோரது சாதனைகளை முறியடிப்பார் என்று எதிர்பர்க்கப்படுகிறது.