WC Qualifier: வங்கதேசத்தையும் வீழ்த்தி தொடர் வெற்றியில் பாகிஸ்தான்!
மகளிர் ஒருநாள் உலகக்கோப்பை தொடருக்கான தகுதிச்சுற்று போட்டிகள் பாகிஸ்தானில் நடைபெற்று வருகின்றன. இதில் இன்று லாகூரில் நடைபெற்ற 14ஆவது லீக் போட்டியில் பாகிஸ்தான் மற்றும் வங்கதேச மகளிர் அணிகள் பலப்பரீட்சை நடத்தின. இப்போட்டியில் டாஸ் வென்ற வங்கதேச மகளிர் அணி பேட்டிங்கைத் தேர்வு செய்தது.
அதன்படி களமிறங்கிய வங்கதேச அணிக்கு தொடக்கம் சிறப்பானதாக அமையவில்லை. அணியின் டாப் ஆர்டர் வீராங்கனைகள் ஃபர்ஹான ஹக் ரன்கள் ஏதுமின்றி விக்கெட்டை இழக்க, மற்றொரு தொடக்க வீராங்கனை திலாரா அக்தர் 13 ரன்களுக்கும் என விக்கெட்டுகளை இழந்தனர். மேற்கொண்டு களமிறங்கிய ஷர்மின் அக்தர் 24 ரன்களுக்கும், கேப்டன் நிகர் சுல்தானா ஒரு ரன்னிலும், நஹிதா அக்தர் 19 ரன்னிலும் என விக்கெட்டுகளை இழந்து ஏமாற்றமளித்தானர். அதன்பின் ஜோடி சேர்ந்த ரிது மோனி மற்றும் பஹிமா கதும் இணை பொறுப்புடன் விளையாடி ஸ்கோரை உயர்த்தினர்.
இதில் அரைசதம் அடிப்பார் என எதிர்பார்க்கப்பட்ட ரிது மோனி 48 ரன்களில் விக்கெட்டை இழந்த நிலையில், இறுதிவரை ஆட்டமிழக்காமல் இருந்த பஹிமா கதும் 44 ரன்களைச் சேர்த்ததை தவிர்த்து மற்ற வீராங்கனைகள் அனைவரும் அடுத்தடுத்து சொற்ப ரன்களில் விக்கெட்டை இழந்தனர். இதனால் வங்கதேச மகளிர் அணி 50 ஓவர்கள் முடிவில் 9 விக்கெட்டுகளை இழந்து 179 ரன்களை மட்டுமே எடுத்திருந்தது. பாகிஸ்தான் மகளிர் அணி தரப்பில் சிறப்பான பந்துவீச்சை வெளிபடுத்திய சதியா இக்பால் 3 விக்கெட்டுகளையும், ஃபாத்திமா சனா மற்றும் டையானா பைக் தலா 2 விக்கெட்டுகளையும் வீழ்த்தினர்
இதனையடுத்து இலக்கை நோக்கி களமிறங்கிய பாகிஸ்தான் அணியில் தொடக்க வீராங்கனை ஷவ்வால் ஜுல்ஃபிகர் 2 ரன்களில் ஆட்டமிழந்து ஏமாற்றமளித்தார். பின்னர் இணைந்த முனீபா அலி மற்றும் சித்ரா அமீன் இணை பொறுப்புடன் விளையாடி அணியின் ஸ்கோரை மளமளவென உயர்த்தினர். இதில் முனீபா அலி தனது அரைசதத்தை பூர்த்தி செய்து அசத்தினார். இதன்மூலம் இருவரின் பார்ட்னர்ஷிப்பும் 80 ரன்களை எட்டிய நிலையில் சித்ரா அமீன் 37 ரன்களில் ஆட்டமிழக்க, அவரைத்தொடர்ந்து 69 ரன்களுடன் முனீபா அலியும் தனது விக்கெட்டை இழந்தர்.
Also Read: Funding To Save Test Cricket
பின்னர் களமிறங்கிய அலியா ரியாஸ் மற்றும் நடாலியா பர்வேஸ் இணை சிறப்பான ஆட்டத்தை வெளிப்படுத்த அணியின் வெற்றியும் எளிதானது. இதில் இறுதிவரை ஆட்டமிழக்காமல் இருந்த அலியா ரியாஸ் அரைசதம் கடந்ததுடன் 52 ரன்களையும், நடாலியா பர்வேஸ் 13 ரன்களையும் சேர்த்து அணிக்கு வெற்றியைத் தேடிக்கொடுத்தனர். இதன்மூலம் பாகிஸ்தான் மகளிர் அணி 39.4 ஓவர்களில் இலக்கை எட்டியதுடன் 7 விக்கெட் வித்தியாசத்தில் வங்கதேச மகளிர் அணியை வீழ்த்தி இந்த தொடரில் தொடர்ச்சியாக 5ஆவது பெற்றியைப் பதிவுசெய்து அசத்தியுள்ளது.