இங்கிலாந்து அணி தற்சமயம் வெஸ்ட் இண்டீஸில் சுற்றுப்பயணம் செய்து 3 போட்டிகள் கொண்ட ஒருநாள் தொடரிலும், 5 போட்டிகள் கொண்ட டி20 தொடரிலும் விளையாடி வருகிறது. இதில் நடந்து முடிந்த மூன்று போட்டிகள் கொண்ட ஒருநாள் தொடரை வெஸ்ட் இண்டீஸ் அணியானது 2-1 என்ற கணக்கில் இங்கிலாந்தை வீழ்த்தி வெற்றிபெற்று அசத்தியது.
இதனைத்தொடர்ந்து வெஸ்ட் இண்டீஸ் - இங்கிலாந்து அணிகளுக்கு இடையேயான 5 போட்டிகள் கொண்ட டி20 தொடரின் முதல் போட்டியானது இன்று பார்படாஸில் உள்ள கென்ஸிங்டன் ஓவல் கிரிக்கெட் மைதானத்தில் நடைபெற்றது. இப்போட்டியில் டாஸ் வென்ற இங்கிலாந்து அணி முதலில் பந்துவீசுவதாக அறிவித்தது. இதனையடுத்து களமிறங்கிய வெஸ்ட் இண்டீஸ் அணிக்கு பிராண்டன் கிங் - எவின் லூயிஸ் இணை தொடக்கம் கொடுத்தனர். இதில் பிராண்டன் கிங் 3 ரன்களில் விக்கெட்டை இழக்க, அவரைத்தொடர்ந்து எவின் லூயிஸும் 13 ரன்களில் ஆட்டமிழந்தார்.
அவர்களைத்தொடர்ந்து களமிறங்கிய ஷிம்ரான் ஹெட்மையரும் முதல் பந்திலேயே விக்கெட்டை இழந்து ஏமாற்றமளித்தார். பின்னர் இணைந்த நிக்கோலஸ் பூரன் - கேப்டன் ரோவ்மன் பாவெல் இணை அதிரடியாக விளையாடி அணியின் ஸ்கோரை உயர்த்தினர். இதில் ரோவ்மன் பாவெல் ஒரு பவுண்டரி, 2 சிக்ஸர்கள் என 18 ரன்களில் விக்கெட்டை இழக்க, அடுத்து களமிறங்கிய ஷெர்ஃபேன் ரூதர்ஃபோர்ட் 2 ரன்களிலும் என ஆட்டமிழந்தனர். அதேசமயம் அரைசதம் அடிப்பார் என எதிர்பார்க்கப்பட்ட நிக்கோலஸ் பூரன் 2 பவுண்டரி, 3 சிக்ஸர்கள் என 38 ரன்களில் விக்கெட்டை இழந்து பெவிலியன் திரும்பினர்.
இறுதியில் ஆண்ட்ரே ரஸல் தனது பங்கிற்கு 4 சிக்ஸர்களை விளாசி 30 ரன்களையும், இறுதிவரை ஆட்டமிழக்காமல் இருந்த ரொமாரியோ ஷெஃபர்ட் 35 ரன்களையும், குடகேஷ் மோட்டி 33 ரன்களையும் சேர்த்து அணிக்கு ஃபினிஷிங்கைக் கொடுத்தனர். இதன்மூலம் வெஸ்ட் இண்டீஸ் அணி 20 ஓவர்கள் முடிவில் 9 விக்கெட்டுகளை இழந்தாலும் 182 ரன்களைச் சேர்த்தது. இங்கிலாந்து அணி தரப்பில் சாகிப் மஹ்மூத் 4 விக்கெட்டுகளையும், ஆதில் ரஷித் 3 விக்கெட்டுகளையும் கைப்பற்றி அசத்தினர். இதனைத்தொடர்ந்து இலக்கை நோக்கி களமிறங்கிய இங்கிலாந்து அணிக்கு பில் சால்ட் - வில் ஜேக்ஸ் இணை தொடக்கம் கொடுத்தனர்.
இதில் பில் சால்ட் அதிரடியாக விளையாடி அணியின் ஸ்கோரை மளமளவென உயர்த்தினார். அதேசமயம் மற்றொரு தொடக்க வீரரான வில் ஜேக்ஸ் 17 ரன்களுக்கு விக்கெட்டை இழக்க, அடுத்து களமிறங்கிய கேப்டன் ஜோஸ் பட்லர் முதல் பந்திலேயே ஆட்டமிழந்து ஏமாற்றமளித்தார். ஆனாலும் மறுபக்கம் தொடர்ந்து அதிரடியாக விளையாடிய பில் சால்ட் அடுத்தடுத்து பவுண்டரிகளையும் சிக்ஸர்களையும் பறக்கவிட்டு அசத்தினார். அவருடன் இணைந்த ஜேக்கப் பெத்தெலும் அதிரடியாக விளையாட இங்கிலாந்து அணியின் வெற்றியும் எளிதானது.
Also Read: Funding To Save Test Cricket
இப்போட்டியில் தொடர்ந்து அபாரமாக விளையாடிய பில் சால்ட் சர்வதேச டி20 கிரிக்கெட்டில் தனது 3ஆவது சதத்தை பதிவுசெய்ததுடன், இறுதிவரை ஆட்டமிழக்காமல் 103 ரன்களையும், மறுபக்கம் அரைசதம் கடந்திருந்த ஜேக்கப் பெத்தெல் 58 ரன்களையும் சேர்த்ததன் மூலம், இங்கிலாந்து அணி 16.5 ஓவர்களில் இலக்கை எட்டியதுடன் 8 விக்கெட் வித்தியாசத்தில் வெஸ்ட் இண்டீஸ் அணியை வீழ்த்தி அபார வெற்றியைப் பதிவுசெய்து அசத்தியது. இந்த போட்டியில் சதமடித்து அசத்திய பில் சால்ட் ஆட்டநாயகனாக தேர்வு செய்யப்பட்டார்.