இங்கிலாந்து அணி தற்சமயம் வெஸ்ட் இண்டீஸில் சுற்றுப்பயணம் செய்து 3 போட்டிகள் கொண்ட ஒருநாள் தொடரிலும், 5 போட்டிகள் கொண்ட டி20 தொடரிலும் விளையாடி வருகிறது. இதில் நடந்து முடிந்த மூன்று போட்டிகள் கொண்ட ஒருநாள் தொடரை வெஸ்ட் இண்டீஸ் அணியானது 2-1 என்ற கணக்கில் இங்கிலாந்தை வீழ்த்தி வெற்றிபெற்று அசத்தியது.
இதனைத்தொடர்ந்து வெஸ்ட் இண்டீஸ் - இங்கிலாந்து அணிகளுக்கு இடையேயான 5 போட்டிகள் கொண்ட டி20 தொடரானது நாளை முதல் தொடங்கவுள்ளது. அதன்படி இரு அணிகளுக்கும் இடையேயான முதல் டி20 போட்டியானது நாளை பார்படாஸில் உள்ள கென்ஸிங்டன் ஓவல் கிரிக்கெட் மைதானத்தில் நடைபெறவுள்ளது. இதில் இங்கிலாந்து அணி ஏற்கெனவே ஒருநாள் தொடரை இழந்துள்ள நிலையில் அதற்கான பதிலடியை டி20 தொடரில் கொடுக்கும் என எதிர்பார்க்கப்படுகிறது.
அதேசமயம் ஒருநாள் தொடரை வென்றுள்ள வெஸ்ட் இண்டீஸ் அணி டி20 தொடரையும் கைப்பற்றுமா என ரசிகர்கள் ஆவலுடன் காத்திருக்கின்றனர். இரு அணியிலும் அதிரடி வீரர்கள் நிறைந்துள்ளதால் இப்போட்டியில் எந்த அணி வெற்றிபெற்று தொடரில் முன்னிலைப் பெறும் என்ற எதிர்பார்ப்பு அதிகரித்துள்ளது. இந்நிலையில் இப்போட்டிக்கான இரு அணியின் கணிப்பட்ட பிளேயிங் லெவனை இப்பதிவில் பார்ப்போம்.
வெஸ்ட் இண்டீஸ்
டி20 கிரிக்கெட்டிற்கு பெயர்போன வெஸ்ட் இண்டீஸ் அணியானது சமீப காலங்களில் பெரிதளவில் சோபிக்காமல் தடுமாறி வருகிறது. கடைசியாக இலங்கை அணிக்கு எதிரான டி20 தொடரையும் அந்த அணி இழந்துள்ளதால் விமர்சனங்களும் எழத்தொடங்கியுள்ளன. இதன் காரணமாகவே இங்கிலாந்து தொடரில் நட்சத்திர வீரர்களான நிக்கோலஸ் பூரன், ஷிம்ரான் ஹெட்மையர் மற்றும் ஆண்ட்ரே ரஸல் ஆகியோர் மீண்டும் டி20 அணியில் சேர்க்கப்பட்டுள்ளனர். இதனால் இத்தொடரில் வெஸ்ட் இண்டீஸ் அணி நிச்சயம் விமர்சனங்களுக்கு பதிலடி கொடுக்கும் என எதிர்பார்க்கப்படுகிறது.
வெஸ்ட் இண்டீஸ் உத்தேச லெவன்: பிராண்டன் கிங், எவின் லூயிஸ், ஷாய் ஹோப், நிக்கோலஸ் பூரன், ஷிம்ரோன் ஹெட்மையர், ரோவ்மேன் பவல் (கே), ஆண்ட்ரே ரஸல், ரோஸ்டன் சேஸ், அகில் ஹொசைன்/குடாகேஷ் மோட்டி, மேத்யூ ஃபோர்டு, ஷமார் ஜோசப்.
இங்கிலாந்து அணி
இங்கிலாந்து அணியும் சமீபத்தில் சொந்த மண்ணில் நடைபெற்ற ஆஸ்திரேலியாவுக்கு எதிரான டி20 தொடரை 1-1 என்ற கணக்கில் சமன்செய்திருந்தது. இருப்பினும் அந்த அணியின் சமீபத்திய ஃபார்ம் கவலையளிக்கும் வகையில் உள்ளது. மேலும் அணியின் கேப்டன் ஜோஸ் பட்லரும் காயத்திற்கு பிறகு இத்தொடரில் கம்பேக் கொடுக்க உள்ளதால் அவர் மீதான எதிர்பார்ப்புகள் அதிகரித்துள்ளன. இதுதவிர்த்து இளம் வீரர்கள் இந்த தொடரில் சோபிக்கும் பட்சத்தில் இங்கிலாந்து அணி நிச்சயம் வெஸ்ட் இண்டீஸுக்கு கடும் சவாலை வழங்கும் என்று எதிர்பார்க்கப்படுகிறது.
Also Read: Funding To Save Test Cricket
இங்கிலாந்து உத்தேச லெவன்: பில் சால்ட், வில் ஜாக், ஜோஸ் பட்லர் (கேப்டன்), லியாம் லிவிங்ஸ்டோன், ஜேக்கப் பெத்தேல், சாம் கரன், ஜோஃப்ரா ஆர்ச்சர், ஜேமி ஓவர்டன், ஆதில் ரஷித், ஷாகிப் மஹ்மூத், ரீஸ் டாப்லி.