முத்தரப்பு டி20: இந்தியாவை வீழ்த்தி தொடரை வென்றது தென் ஆப்பிரிக்கா!

இந்திய மகளிர் அணிக்கெதிரான முத்தரப்பு டி20 தொடரின் இறுதிப்போட்டியில் தென் ஆப்பிரிக்க மகளிர் அணி 5 விக்கெட் வித்தியாசத்தில் வெற்றிபெற்று அசத்தியது.

A brilliant half-century from Chloe Tryon helps South Africa beat India in the final! (Image Source: Google)

இந்தியா, வெஸ்ட் இண்டீஸ், தென் ஆப்பிரிக்கா இடையேயான முத்தரப்பு டி20 தொடரில் இந்தியா மற்றும் தென் ஆப்பிரிக்கா அணிகள் இறுதிப்போட்டிக்கு முன்னேறின. இந்த போட்டியில் டாஸ் வென்ற இந்திய அணி பேட்டிங்கை தேர்வு செய்தது.

அதன்படி முதலில் பேட்டிங் செய்த இந்திய அணி வீராங்கனைகள் அடித்து ஆடி ஸ்கோர் செய்யமுடியாமல் திணறினர். டாப் ஆர்டர் வீராங்கனைகள் ஸ்மிரிதி மந்தனா (0) மற்றும் ஜெமிமா ரோட்ரிக்ஸ் (11) ஆகிய இருவருமே ஏமாற்றமளித்தனர். 3ஆம் வரிசையில் இறங்கிய ஹர்லீன் தியோல் தாக்குப்பிடித்து விளையாடி ஸ்கோரை கொஞ்சம் கொஞ்சமாக உயர்த்தினார்.

கேப்டன் ஹர்மன்ப்ரீத் கௌர் 22 பந்தில் 21 ரன் மட்டுமே அடித்தார். தீப்தி ஷர்மா 16 ரன்கள் அடித்தார். ஹர்லீன் தியோல் 46 ரன்கள் அடித்தார். எந்த வீராங்கனையுமே நல்ல ஸ்டிரைக் ரேட்டில் அடித்து விளையாடவில்லை. எளிதாக ரன் வழங்காமல் கட்டுக்கோப்பாக பந்துவீசி, இந்திய அணியை 20 ஓவரில் 109 ரன்களுக்கு சுருட்டியது தென் ஆப்பிரிக்க அணி. 

இதையடுத்து எளிய இலக்கை நோக்கி களமிறங்கிய தென் ஆப்பிரிக்க அணியின் டாப் ஆர்டர் வீராங்கனைகளும் அடுத்தடுத்து சொற்ப ரன்களுக்கு விக்கெட்டை இழந்தனர். இதில் லாரா வோல்வார்ட் 0, டஸ்மின் பிரிட்ஸ் 8, லாரா குட்ஆல் 7, சுனே லூஸ் 12 என அடுத்தடுத்து விக்கெட்டுகளை இழந்து ஏமாற்றமளித்தனர்.

இருப்பினும் நான்காவது விக்கெட்டுக்கு களமிறங்கிய சோலே ட்ரையான் அதிரடியாக விளையாடி அரைசதம் கடந்ததுடன் இறுதிவரை ஆட்டமிழக்காமல் அணிக்கு வெற்றியையும் தேடிக்கொடுத்தார். இதில் 32 பந்துகளை சந்தித்த அவர் 6 பவுண்டரி, 2 சிக்சர்கள் உள்பட 57 ரன்களைக் குவித்தார்.

இதன்மூலம் தென் ஆப்பிரிக்க மகளிர் அணி 18 ஓவர்களில் இலக்கை எட்டியதுடன், 5 விக்கெட் வித்தியாசத்தில் வெற்றிபெற்று கோப்பையை வென்றது. இப்போட்டியின் வெற்றிக்கு உதவியா சோலே ட்ரையான் ஆட்டநாயகியாகவும், இந்திய வீராங்கனை தீப்தி சர்மா தொடர் நாயகியாகவும் தேர்வுசெய்யப்பட்டனர்.

Win Big, Make Your Cricket Tales Now