ஜஸ்பிரித் பும்ராவைக் கண்டு இங்கிலாந்து பயப்படவில்லை -பென் ஸ்டோக்ஸ்
பும்ரா உலகத் தரம் வாய்ந்த பந்து வீச்சாளராக இருந்தாலும், இந்தியாவுக்காக டெஸ்ட் தொடரை வெல்லும் திறன் இல்லை என்று இங்கிலாந்து கேப்டன் பென் ஸ்டோக்ஸ் கூறியுள்ளார்.
இந்திய அணி தற்சமயம் இங்கிலாந்தில் சுற்றுப்பயணம் செய்து 5 போட்டிகளைக் கொண்ட டெஸ்ட் தொடரில் விளையாடவுள்ளது. இதில் இரு அணிகளுக்கும் இடையேயான முதல் டெஸ்ட் போட்டி ஜூன் 20ஆம் தேதி நடைபெற இருக்கும் நிலையில், இரு அணி வீரர்களும் தீவிரமாக தயாராகி வருகின்றனர். ரோஹித் சா்மா, விராட் கோலி போன்ற ஜாம்பவான்கள் இல்லாத நிலையில், இளம் வீரா் ஷுப்மன் கில் தலைமையில் இந்திய அணி தற்போது இங்கிலாந்து சென்றுள்ளது.
மேற்கொண்டு சாய் சுதர்ஷன், அர்ஷ்தீப் சிங், குல்தீப் யாதவ், கருண் நாயர் மற்றும் ஷர்தூல் தாக்கூர் உள்ளிட்டோருக்கும் இந்த அணியில் வாய்ப்பு வழங்கப்பட்டுள்ளது. இதனால் இத்தொடரில் இந்திய அணியின் செயல்பாடுகள் எவ்வாறு இருக்கும் என்ற எதிர்பார்ப்புகள் அதிகரித்துள்ளன. அதேசமயம் மறுபக்கம் பென் ஸ்டோக்ஸ் தலைமையிலான இங்கிலாந்து அணியும் சொந்த மன்னில் டெஸ்ட் தொடரை கைப்பற்றி சாதிக்குமா என்ற கேள்விகளும் உள்ளன.
இந்நிலையில் இப்போட்டிக்கு முன்னதாக செய்தியாளர்களிடம் பேசிய பென் ஸ்டோக்ஸ், உலகத் தரம் வாய்ந்த பந்து வீச்சாளராக இருந்தாலும், இந்தியாவுக்காக டெஸ்ட் தொடரை வெல்லும் திறன் பும்ராவிடம் இல்லை என்று கூறியுள்ளார். இதுகுறித்து பேசிய அவர், “எங்களுக்கு பயம் இல்லை. சர்வதேச கிரிக்கெட்டில், நீங்கள் எப்போதும் சிறந்த எதிரிகளை எதிர்கொள்ள வேண்டும். பும்ராவின் தரத்தையும், அவர் எந்த அணிக்காக விளையாடுகிறார் என்பதையும் நாங்கள் அறிவோம்.
ஆனால் பயத்தின் அடிப்படையில், நிச்சயமாக இல்லை. எந்தவொரு அணிக்கும் தனியாக எந்த ஒரு பந்து வீச்சாளரும் தொடரை வெல்லப் போவதில்லை என்று நான் நினைக்கிறேன். 11 வீரர்களும் எழுந்து நிற்க வேண்டும். எந்த அணியிலும் வெற்றிக்கு ஒரே ஒரு நபர் மட்டுமே காரணமாக இருப்பார் என்று நான் நினைக்கவில்லை" என கூறியுள்ளார். பென் ஸ்டோக்ஸின் இந்த கருத்து இந்திய ரசிகர்களை சற்று கோபப்படுத்தியுள்ளது.
Also Read: LIVE Cricket Score
இங்கிலாந்துக்கு எதிராக ஜஸ்பிரித் பும்ராவின் ஃபார்ம் சிறப்பாக இருந்துள்ளது. அவர் இங்கிலாந்துக்கு எதிராக விளையாடிய 14 போட்டிகளில், அவர் 60 விக்கெட்டுகளை வீழ்த்தியுள்ளார். குறிப்பாக, இங்கிலாந்து மண்ணில் 9 டெஸ்ட் போட்டிகளில் விளையாடி 26.27 என்ற சராசரியில் 37 விக்கெட்டுகளை வீழ்த்தியுள்ளார். அதுமட்டுமில்லாமல் இங்கிலாந்து கேப்டன் பென் ஸ்டோக்ஸுக்கு எதிராகவும் பும்ரா அற்புதமான பந்துவீச்சை வெளிப்படுத்தியுள்ளார் என்பது குறிப்பிடத்தக்கது.
Win Big, Make Your Cricket Tales Now
