விராட் கோலியை ரோல் மாடலாக எடுத்துக் கொள்ளுங்கள் - பிரித்வி ஷாவுக்கு ஹர்பஜன் சிங் அறிவுரை!

விராட் கோலியை ரோல் மாடலாக எடுத்துக் கொள்ளுங்கள் - பிரித்வி ஷாவுக்கு ஹர்பஜன் சிங் அறிவுரை! (Image Source: Google)

இந்திய அணியின் தொடக்க வீரராக அறியப்பட்டபிருத்வி ஷா தற்போது தனது கேரியரில் மிக மோசமான நிலையை சந்தித்து வருகிறார். முதலில் மோசமான உடற்தகுதி காரணமாக மும்பை ரஞ்சி அணியில் இருந்து வெளியேற்றப்பட்டர். அதன்பின் நடந்து முடிந்த ஐபிஎல் 2025 மெகா ஏலத்தில் அவரை வாங்க எந்த அணியும் ஆர்வம் காட்டவில்லை. தற்போது, நடைபெற்று வரும் சையத் முஷ்டாக் அலி கோப்பை தொடரிலும் அவரால் சிறப்பாக செயல்பட முடியவில்லை.

இந்திய அண்டர்19 அணியின் கேப்டனாக செயல்பட்டு, யு19 உலகக்கோப்பை வென்றதன் மூலம் இந்திய அணிக்காக அறிமுகமான பிரித்வி ஷா, தொடக்கத்தில் சிறப்பான ஆட்டத்தை வெளிப்படுத்தியதன் காரணமாக சச்சினுடன் ஒப்பிட்டப்பட்டார். ஆனால் அதன்பின் மோசமான உடற்தகுதி, ஃபார்ம் இழப்பு என அடுத்தடுத்து பின்னடைவை சந்தித்து வந்த பிரித்வி ஷா தற்சமயம் உள்ளூர் போட்டிகளில் கூட ரன்களைச் சேர்க்க முடியாமல் தடுமாறுவதால் கடும் விமர்சனங்களை எதிர்கொண்டு வருகிறார். 

இந்நிலையில், விராட் கோலியை தனது உடற்தகுதியில் ரோல் மாடலாக மாற்றுமாறு பிரித்வி ஷாவுக்கு இந்திய அணியின் முன்னாள் கிரிக்கெட் வீரர் ஹர்பஜன் சிங் அறிவுறுத்தியுள்ளார். இதுகுறித்து பேசிய அவர், “பிரித்வி ஷாவுக்கு என்ன நடந்தது என்று எனக்குத் தெரியவில்லை. ஆனால் என்ன நடந்தது என்பதை புரிந்துகொண்டு அவர் தனது வாழ்க்கையை எவ்வாறு முன்னோக்கி கொண்டு செல்வது என்பதை முடிவு செய்ய வேண்டும் என்று நான் நினைக்கிறேன்.

இதுபோன்ற சம்பவங்கள் ஒருவரின் வாழ்க்கையை முற்றிலுமாக அழிக்கக்கூடும். அதனால் பிரித்வி ஷா எந்தப் பாதையைத் தேர்வு செய்கிறார் என்பதை அவர் தான் முடிவுசெய்ய் வேண்டும். ஐபிஎல் ஏலத்தில் விற்கப்படாமல் போனதை எந்த வீரரும் ஜீரணிப்பது மிகவும் கடினம். ஏனெனில் நாங்கள் அவரை டெண்டுல்கர் போன்ற பெரிய வீரர்களுடன் ஒப்பிட ஆரம்பித்தோம். அது அவருக்கு கூடுதல் அழுத்ததை கொடுத்ததாக நினைக்கிறோம். 

அவர் நலம் பெற வாழ்த்துகிறேன். இந்த பின்னடைவில் இருந்து அவர் வலுவாக வெளிவருவார் என நம்புகிறேன். அவரது உடற்தகுதிக்கு கடினமாக உழைக்கவும்; அவர் மிகவும் இளம் பையன். அவருக்கு தற்போது 24 அல்லது 25 வயது தான் இருக்கும். அதனால் அவர் த்னது உடற்தகுதியில் கவனம் செலுத்த வேண்டும். ஏனென்றால், ஆரம்பத்தில் நாம் பார்த்த பிருத்வி ஷாவுக்கும் இப்போது நாம் பார்க்கும் பிரித்வி ஷாவுக்கு மிகப்பெரும் வித்தியாசம் உள்ளது. அவர் தனது உடற்தகுதியை முழுமையாக புறக்கணித்துள்ளார்.

அதனால் அவர் தற்போதுள்ள இந்திய வீரர்களின் உடற்தகுதியை கருத்தில் கொண்டு உத்வேகம் பெற வேண்டும். அதன்படி அவர் உடற்தகுதியில் யாரையேனும் பின்பற்ற வேண்டும் என்றால் விராட் கோலியை உத்வேகமாக எடுத்துக்கொள்ளலாம். அடுத்த தலைமுறையும் அவரிடமிருந்து கற்றுக்கொள்ள பிரித்வி ஷாவுக்கு எனது வாழ்த்துக்கள்” என்று தனது அறிவுரையை வழங்கியுள்ளார்.