காபா டெஸ்ட்: சாதனைகளை குவித்த ஜஸ்பிரித் பும்ரா!

காபா டெஸ்ட்: சாதனைகளை குவித்த ஜஸ்பிரித் பும்ரா! (Image Source: Google)

ஆஸ்திரேலியா - இந்தியா அணிகளுக்கு இடையேயான மூன்றாவது டெஸ்ட் போட்டி பிரிஸ்பேனில் உள்ள காபா மைதானத்தில் நடைபெற்று வருகிறது. இப்போட்டியில் டாஸை இழந்து முதலில் பேட்டிங் செய்த ஆஸ்திரேலிய அணியானது டிராவிஸ் ஹெட், ஸ்டீவ் ஸ்மித் ஆகியோரது சதங்கள் காரணமாக முதல் இன்னிங்ஸில் 445 ரன்களைச் சேர்த்து அல் அவுட்டானது.

இதில் அதிகபட்சாமாக டிராவிஸ் ஹெட் 152 ரன்களையும், ஸ்டீவ் ஸ்மித் 101 ரன்களையும், அலெக்ஸ் கேசி 70 ரன்களையும் சேர்த்தனர். இந்திய அணி தரப்பில் வேகப்பந்து வீச்சாளர் ஜஸ்பிரித் பும்ரா 28 ஓவர்கள் வீசி 76 ரன்களுக்கு 6 விக்கெட்டுகளை வீழ்த்தினார். இதனையடுத்து முதல் இன்னிங்ஸைத் தொடங்கியுள்ள இந்திய அணியானது அஸ்திரேலிய அணியின் பந்துவீச்சை சமாளிக்க முடியாமல் அடுத்தடுத்து விக்கெட்டுகளை இழந்து தடுமாறி வருகிறது.

இந்நிலையில் இப்போட்டியில் ஜஸ்பிரித் பும்ரா 6 விக்கெட்டுகளை வீழ்த்தியதன் மூலம் சில சாதனைகளையும் படைத்துள்ளார். அதன்படி பிரிஸ்பேனில் நடைபெற்ற டெஸ்ட் இன்னிங்சில் 6 அல்லது அதற்கு மேற்பட்ட விக்கெட்டுகளை வீழ்த்திய இரண்டாவது இந்திய பந்துவீச்சாளர் என்ற பெருமையை பும்ரா பெற்றுள்ளார். இதற்கு முன்பு 1968ஆம் ஆண்டு சுழற்பந்து வீச்சாளர் ஈரப்பள்ளி பிரசன்னா 104 ரன்களுக்கு 6 விக்கெட்டுகளை வீழ்த்தியிருந்தார் என்பது குறிப்பிடத்தக்கது.

மேற்கொண்டு ஆஸ்திரேலிய மண்ணில் அதிக டெஸ்ட் விக்கெட்டுகளை வீழ்த்திய இந்திய பந்துவீச்சாளர்கள் பட்டியலில் அனில் கும்ப்ளேவை பின்னுக்கு தள்ளி ஜஸ்பிரித் பும்ரா இரண்டாவது இடத்திற்கு முன்னேறியுள்ளார். பும்ரா 10 டெஸ்ட் போட்டிகளில் 17.82 என்ற சராசரியில் 50 விக்கெட்டுகளை வீழ்த்தியுள்ளார். இதற்கு முன் அனில் கும்ப்ளே ஆஸ்திரேலியாவில் 10 டெஸ்டில் விளையாடி 49 விக்கெட்டுகளை வீழ்த்தி இரனடம் இடத்தில் இருந்த நிலையில், தற்சமயம் அவரது சாதனையை பும்ரா தகர்த்துள்ளார்.

இந்தப் பட்டியலில் இந்திய அணியின் முன்னாள் கேப்டன் கபில் தேவ் ஆஸ்திரேலியாவில் 11 டெஸ்ட் போட்டிகளில் விளையாடி 51 விக்கெட்டுகளை வீழ்த்தியதே இதுநாள் வரை சாதனையாக இருந்து வருகிறது.  இதுதவிர்த்து, ஆசியாவிற்கு வெளியே இந்தியாவின் வேகப்பந்து வீச்சாளராக, டெஸ்ட் கிரிக்கெட்டில் அதிக முறை ஒரு இன்னிங்ஸில் 5 விக்கெட்டுகளை வீழ்த்தியதன் அடிப்படையில் கபில் தேவின் சாதனையை ஜஸ்பிரித் பும்ரா முறியடித்துள்ளார்.

முன்னதாக ஆசியாவிற்கு வெளியே 9 முறை 5 விக்கெட்டுகளை வீழ்த்தி கபில் தேவ் முதலிடத்தில் இருந்த நிலையில், தற்போது ஜஸ்பிரித் பும்ரா 10ஆவது முறையாக 5 விக்கெட்டுகளை கைப்பற்றி இந்த பட்டியலில் முதலிடம் பிடித்துள்ளார். இது தவிர, சேனா நாடுகளில் (தென் ஆப்பிரிக்கா, இங்கிலாந்து, நியூசிலாந்து மற்றும் ஆஸ்திரேலியா) அதிக முறை ஒரு இன்னிங்ஸில் ஐந்து விக்கெட்டுகளை வீழ்த்திய இந்திய பந்துவீச்சாளராகவும் பும்ரா சாதனை படைத்துள்ளார். அதன்படி சேனா நாடுகளுக்கு எதிராக ஜஸ்பிரித் பும்ரா கைப்பற்றும் எட்டாவது 5 விக்கெட் ஹால் இதுவாகும்.