கிரிக்கெட் விளையாடுவதற்கு இது எளிதான இடம் அல்ல - ஜஸ்பிரித் பும்ரா!

பிரிஸ்பேனில் நடைபெற்று வரும் மூன்றாவது டெஸ்டில் இந்திய அணி தடுமாறி வரும் நிலையில் ரசிகர்கள் பொறுமையைக் காட்ட வேண்டும் என்று வேகப்பந்து வீச்சாளர் ஜஸ்பிரித் பும்ரா கூறியுள்ளார்.

கிரிக்கெட் விளையாடுவதற்கு இது எளிதான இடம் அல்ல - ஜஸ்பிரித் பும்ரா! (Image Source: Google)

ஆஸ்திரேலியா - இந்தியா அணிகளுக்கு இடையேயான மூன்றாவது டெஸ்ட் போட்டி பிரிஸ்பேனில் உள்ள காபா மைதானத்தில் நடைபெற்று வருகிறது. இப்போட்டியில் டாஸை இழந்து முதலில் பேட்டிங் செய்த ஆஸ்திரேலிய அணியானது டிராவிஸ் ஹெட், ஸ்டீவ் ஸ்மித் ஆகியோரது சதங்கள் காரணமாக முதல் இன்னிங்ஸில் 445 ரன்களைச் சேர்த்து அல் அவுட்டானது.

இதில் அதிகபட்சாமாக டிராவிஸ் ஹெட் 152 ரன்களையும், ஸ்டீவ் ஸ்மித் 101 ரன்களையும், அலெக்ஸ் கேசி 70 ரன்களையும் சேர்த்தனர். இந்திய அணி தரப்பில் வேகப்பந்து வீச்சாளர் ஜஸ்பிரித் பும்ரா 28 ஓவர்கள் வீசி 76 ரன்களுக்கு 6 விக்கெட்டுகளை வீழ்த்தினார். இதனையடுத்து முதல் இன்னிங்ஸைத் தொடங்கியுள்ள இந்திய அணியானது அஸ்திரேலிய அணியின் பந்துவீச்சை சமாளிக்க முடியாமல் அடுத்தடுத்து விக்கெட்டுகளை இழந்து தடுமாறி வருகிறது.

இதில் யஷஸ்வி ஜெய்ஸ்வால் 4 ரன்னிலும், ஷுப்மன் கில் ஒரு ரன்னிலும், விராட் கோலி 3 ரன்னிலும் என விக்கெட்டுகளை இழந்தனர். அவர்களைத் தொடர்ந்து பெரிதும் எதிர்பார்க்கப்பட்ட ரிஷப் பந்தும் 9 ரன்களை மட்டுமே எடுத்த நிலையில் விக்கெட்டை இழந்தார். அதன்பின் தொடர் மழை காரணமாக மூன்றாம் நாள் ஆட்டம் முன்கூட்டியே முடிவடைந்ததாக அறிவிக்கப்பது. இதனால் இந்திய அணி 4 விக்கெட் இழப்பிற்கு 51 ரன்களை மட்டுமே சேர்த்து தடுமாறி வருகிறது. 

இந்நிலையில் இப்போட்டி முடிந்து செய்தியாளர்களிடம் பேசிய ஜஸ்பிரித் பும்ரா, “புதிய வீரர்கள் வருவதால், ஒரு அணியாக நாங்கள் ஒரு மாற்றத்தை சந்தித்து வருகிறோம், மேலும் கிரிக்கெட் விளையாடுவதற்கு இது எளிதான இடம் அல்ல. அணியில் உள்ள மற்றவர்களுக்கு உதவுவது என் வேலை. நான் அவர்களை விட சற்று அதிகமாக விளையாடியுள்ளேன், அதனால் அவர்களுக்கு உதவ முயற்சிக்கிறேன். ஏனெனில் நாங்கள் ஒரு புதிய அணி, புதிய வீரர்கள் அணிக்கு வந்துள்ளனர்.

அவர்கள் அனுபவத்தில் இருந்து கற்றுக் கொள்வார்கள் என்பதை நாம் கருத்தில் கொள்ள வேண்டும். ஆனால் ஒவ்வொரு அணியும் கடந்து செல்லும் பயணம் இது. இந்த அனுபவங்கள் அனைத்தும் அவர்கள் முன்னோக்கிச் செல்வதற்கு உதவும். இது அனைத்து வீரர்களும் கடந்து செல்லும் விஷயம். யாரும் எல்லா அனுபவங்களுடனும், திறமைகளுடனும் பிறக்கவில்லை. ஒவ்வொரு நாளும் நீங்கள் கற்றுக்கொண்டே தான் இருக்கிறீர்கள்.

மேலும் சிறப்பாக செயல்படுவதற்கான புதிய வழிகளைக் கண்டுபிடித்துக்கொண்டே இருக்கிறீர்கள். அதனல் நீங்கள் சிறப்பாக வருவீர்கள் என்று நான் நம்புகிறேன்” என்று தெரிவித்துள்ளார். ஆஸ்திரேலிய அணிக்கு எதிரான மூன்றாவது டெஸ்ட் போட்டியில் இந்திய அணியின் மற்ற பந்துவீச்சாளர்கள் விக்கெட்டுகளை வீழ்த்த தடுமாறிய நிலையில் ஜஸ்பிரித் பும்ரா 28 ஓவர்களில் 6 விக்கெட்டுகளை கைப்பற்றி அசத்தினார் என்பது குறிப்பிடத்தக்கது.