சர்வதேச டி20 கிரிக்கெட்டில் சாதனை படைத்த ஜோஸ் பட்லர்!

சர்வதேச டி20 கிரிக்கெட்டில் சாதனை படைத்த ஜோஸ் பட்லர்! (Image Source: Google)

இந்தியா - இங்கிலாந்து அணிகளுக்கு இடையேயான முதல் டி20 போட்டி நேற்று கொல்கத்தாவில் உள்ள ஈடன் கார்டன் கிரிக்கெட் மைதானத்தில் நடைபெற்றது. இப்போட்டியில் இங்கிலாந்து கேப்டனும் நட்சத்திர பேட்ஸ்மேனுமான ஜோஸ் பட்லர் அரைசதம் அடித்து அசத்தினார். மூன்றாவது இடத்தில் பேட்டிங் செய்ய வந்த பட்லர் 44 பந்துகளில் 8 பவுண்டரிகள் மற்றும் 2 சிக்ஸர்களுடன் 68 ரன்கள் எடுத்தார்.

இந்நிலையில் இப்போட்டியில் ஜோஸ் பட்லர் அரைசதம் கடந்ததன் மூலம், இந்தியா-இங்கிலாந்து டி-20 சர்வதேசப் போட்டிகளில் அதிக முறை 50+ ஸ்கோரை பதிவுசெய்த வீரர்கள் பட்டியலில் கூட்டாக முதலிடத்தை எட்டியுள்ளார். இந்த பட்டியலில் இந்திய அணியின் முன்னாள் கேப்டன் விராட் கோலி 5 முறை 50+ ஸ்கோரை அடித்ததே சாதனையாக இருந்த நிலையில், தற்போது ஜோஸ் பட்லரும் 5 முறை 50+ ஸ்கோரை அடித்து அவரின் சாதனையை சமன்செய்துள்ளார்.

இந்தியா vs இங்கிலாந்து டி20 போட்டிகளில் அதிக முறை 50+ ரன்கள் எடுத்தவர்கள்

• 5 -ஜோஸ் பட்லர்*
• 5-விராட் கோலி
• 4-ரோஹித் சர்மா
• 3 - அலெக்ஸ் ஹேல்ஸ் 

இதுதவிர்த்து இப்போட்டியில் பட்லர் இரண்டு சிக்ஸர்களை அடித்ததன் மூலம், சர்வதேச கிரிக்கெட்டில் தனது 350 சிக்ஸர்களை பூர்த்தி செய்துள்ளார். இதன்மூலம் சர்வதேச கிரிக்கெட்டில் 350+ சிக்ஸர்கள் என்ற எண்ணிக்கையை எட்டிய முதல் இங்கிலாந்து கிரிக்கெட் வீரர் மற்றும் உலகின் எட்டாவது கிரிக்கெட் வீரர் என்ற பெருமையைப் ஜோஸ் பட்லர் பெற்றுள்ளார். பட்லர் இப்போது மூன்று வடிவங்களிலும் சேர்த்து 368 போட்டிகளில் 373 இன்னிங்ஸ்களில் 351 சிக்ஸர்களை அடித்துள்ளார்.

இந்தப் பட்டியலில் அவருக்கு முன்னால் இந்திய அணி கேப்டன் ரோஹித் சர்மா, வெஸ்ட் இண்டீஸ் ஜாம்பவான் கிறிஸ் கெய்ல், பாகிஸ்தான் முன்னாள் கேப்டன் ஷாஹித் அப்ரிடி, நியூசிலாந்து முன்னாள் வீரர் பிரெண்டன் மெக்கல்லம், மார்ட்டின் குப்தில், இந்திய அணியின் முன்னாள் கேப்டன் எம்எஸ் தோனி மற்றும் இலங்கை அணியின் முன்னாள் ஜாம்பவான் சனத் ஜெயசூர்யா ஆகியோர் சர்வதேச கிரிக்கெட்டில் 350+ சிக்ஸர்களை அடித்துள்ளனர்.

இந்தப் போட்டியில், இந்தியா அணி 7 விக்கெட் வித்தியாசத்தில் இங்கிலாந்தை வீழ்த்தி வெற்றிபெற்றதுடன், ஐந்து போட்டிகள் கொண்ட தொடரில் 1-0 என முன்னிலை பெற்றது. இதில் முதலில் பேட்டிங் செய்த இங்கிலாந்து அணி 20 ஓவர்களில் 132 ரன்களுக்கு ஆல் அவுட்டானது. அதன்பின் இலக்கை நோக்கி விளையாடிய இந்தியா அணி 12.5 ஓவர்களில் 3 விக்கெட்டுகளை மட்டுமே இழந்து வெற்றி பெற்றது குறிப்பிடத்தக்கது. 

Win Big, Make Your Cricket Tales Now