WC Qualifier: ஸ்காட்லாந்தை வீழ்த்தி பாகிஸ்தான் அசத்தல் வெற்றி!

ஸ்காட்லாந்து மகளிர் அணிக்கு எதிரான உலகக்கோப்பை தகுதிச்சுற்று ஆட்டத்தில் பாகிஸ்தான் மகளிர் அணி 6 விக்கெட் வித்தியாசத்தில் வெற்றிபெற்று அசத்தியது.

WC Qualifier: ஸ்காட்லாந்தை வீழ்த்தி பாகிஸ்தான் அசத்தல் வெற்றி! (Image Source: Google)

மகளிர் ஒருநாள் உலகக்கோப்பை தொடருக்கான தகுதிச்சுற்று போட்டிகள் பாகிஸ்தானில் நடைபெற்று வருகின்றன. இதில் இன்று லாகூரில் நடைபெற்ற 4ஆவது லீக் போட்டியில் பாகிஸ்தான் மற்றும் ஸ்காட்லாந்து மகளிர் அணிகள் பலப்பரீட்சை நடத்தின. மழை காரணமாக இப்போட்டி 32 ஓவர்கள் கொண்ட ஆட்டமாக நடைபெற்றது.

இதில் டாஸ் வென்ற பாகிஸ்தான் மகளிர் அணி முதலில் பந்துவீசுவதாக அறிவித்தது. இதையடுத்து களமிறங்கிய ஸ்காட்லாந்து அணியில் தொடக்க வீராங்கனைகள் அபி ஐட்கென் ஒரு ரன்னிலும் பிப்பா ஸ்ப்ரூல் 9 ரன்னிலும் என விக்கெட்டை இழந்து ஏமாற்றமளித்தனர். அதன்பின் களமிறங்கிய கேப்டன் கேத்ரின் பிரைஸ் - சாரா பிரைஸ் இணை சிறப்பான ஆட்டத்தை வெளிப்படுத்தி அணியின் ஸ்கோரை உயர்த்தும் முயற்சியில் இறங்கினர்.

இதில் சரா பிரைஸ் 21 ரன்னில் விக்கெட்டை இழந்து ஏமாற்றமளித்தார். பின்னர் களமிறங்கிய ஐல்சா லிஸ்டர் அதிரடியாக விளையாடி 5 பவுண்டரிகளுடன் 31 ரன்களில் விக்கெட்டை இழந்தார். அதேசமயம் மறுமுனையில் தொடர்ந்து சிறப்பாக விளையாடிய கேத்ரின் பிரைஸ் அரைசதம் கடந்து அசத்தியதுடன் 10 பவுண்டரி, ஒரு சிக்ஸர் என 91 ரன்களில் ஆட்டமிழந்து சதமடிக்கும் வாய்ப்பை தவறவிட்டார்.

அதேசமயம் மற்ற வீராங்கனைகள் அடுத்தடுத்து சொற்ப ரன்களில் விக்கெட்டுகளை இழந்து பெவிலியனுக்கு திரும்பினார். இதனால் இன்னிங்ஸின் முடிவில் ஸ்காட்லாந்து மகளிர் அணி 9 விக்கெட்டுகளை இழந்து 186 ரன்களைச் சேர்த்தது. பாகிஸ்தான் தரப்பில் கேப்டன் ஃபாத்திமா சனா 4 விக்கெட்டுகளை கைப்பற்றினர். பின்னர் இலக்கை நோக்கி விளையாடிய பாகிஸ்தான் அணியிலும் தொடக்கம் சிறப்பாக அமையவில்லை.

அணியின் டாப் ஆர்டர் வீரர்கள் குல் ஃபெரோசா 2 ரன்னில்லும், சித்ரா அமீன் 7 ரன்களிலும் என விக்கெட்டை இழந்தனர். பின்னர் இணைந்த முனீபா அலி மற்றும் அலியா ரியாஸ் இணை சிறப்பான ஆட்டத்தை வெளிப்படுத்தி அணியின் ஸ்கோரை உயர்த்தினர். இதில் சிறப்பாக விளையாடிய முனீபா அலி அரைசதம் கடந்து அசத்தினார். மேற்கொண்டு இருவரும் இணைந்து 90 ரன்களுக்கு மேல் பார்ட்னர்ஷிப் அமைத்து அசத்திசத்தினர். 

அதன்பின் 71 ரன்கள் எடுத்திருந்த முனீபா அலி விக்கெட்டை இழக்க, அடுத்து வந்த ஃபாதிமா சனாவும் 7 ரன்களுடன் நடையைக் கட்டினார். இருப்பினும் இறுதிவரை ஆட்டமிழக்காமல் இருந்த அலியா ரியாஸ் 68 ரன்களைச் சேர்த்து அணிக்கு வெற்றியைத் தேடிக்கொடுத்தனர். இதன்மூலம் பாகிஸ்தான் மகளிர் அணி 30.4 ஓவர்களில் இலக்கை எட்டியதுடன் 6 விக்கெட் வித்தியாசத்தில் ஸ்காட்லாந்து மகளிர் அணியை வீழ்த்தி வெற்றிபெற்றது. 

Win Big, Make Your Cricket Tales Now