BAN vs PAK, 1st T20: பாகிஸ்தானுக்கு அணிக்கு எதிரான முதல் டி20 போட்டியில் வங்கதேச அணி பேட்டர்கள் மற்றும் பந்துவீச்சாளர்கள் சிறப்பாக செயல்பட்டு அணிக்கு வெற்றியைத் தேடிக்கொடுத்தனர்.
வங்கதேசத்தில் சுற்றுப்பயணம் மேற்கொண்டுள்ள பாகிஸ்தான் அணி மூன்று போட்டிகள் கொண்ட டி20 தொடரில் விளையாடி வருகிறது. இதில் இரு அணிகளுக்கும் இடையேயான முதல் டி20 போட்டி இன்று தாக்காவில் ஷேர் பங்களா கிரிக்கெட் மைதானத்தில் நடைபெற்ற நிலையில் டாஸ் வென்ற வங்கதேச அணி முதலில் பந்துவீசுவதாக அறிவித்தது. அதன்படி களமிறங்கிய பாகிஸ்தான் அணிக்கு ஃபகர் ஸமான் மற்றும் சைம் அயுப் இணை தொடக்கம் கொடுத்தனர். இதில் ஃபகர் ஸமான பொறுப்பான ஆட்டத்தை வெளிப்படுத்தி அணியின் ஸ்கோரை உயர்த்தும் முயற்சியில் இறங்கினார்.
அதேசமயம் மறுபக்கம் சைம் அயுப் 6 ரன்களில் விக்கெட்டை இழக்க, அடுத்து களமிறங்கிய முகமது ஹாரிஸ் 3 ரன்களுக்கும், கேப்டன் சல்மான் அலி ஆகா 3 ரன்னிலும், ஹசன் நவாஸ் ரன்கள் ஏதுமின்றியும், முகமது நவாஸ் 3 ரன்னிலும் என விக்கெட்டுகளை இழந்து ஏமற்றமாளித்தனர். அதன்பின் இப்போட்டியில் அரைசத அடிப்பார் என எதிர்பார்க்கப்பட்ட ஃபகர் ஸமானும் 6 பவுண்டரி, ஒரு சிக்ஸர் என 44 ரன்களில் ஆட்டமிழந்து பெவிலியனுக்கு நடையைக் கட்டினார். இதையடுத்து ஜோடி சேர்ந்த குஷ்தில் ஷா மற்றும் அப்பாஸ் அஃப்ரிடி இணை ஓரளவு தாக்குப்பிடித்து ஸ்கோரை உயர்த்தினர்.
இதில் குஷ்தில் ஷா 18 ரன்களுக்கும், அப்பாஸ் அஃப்ரிடி மூன்று சிக்ஸர்களுடன் 22 ரன்னிலும் என விக்கெட்டை இழக்க, அடுத்து களமிறங்கிய வீரர்களும் சோபிக்க தவறினர். இதன் காரணமாக பாகிஸ்ஹான் அணி 19.3 ஓவர்களிலேயே அனைத்து விக்கெட்டுகளையும் இழந்து 110 ரன்களுக்கு ஆல் அவுட்டானது. வங்கதேச அணி தரப்பில் சிறப்பான பந்துவீச்சை வெளிப்படுத்திய தஸ்கின் அஹ்மத் 3 விக்கெட்டுகளையும், முஸ்தஃபிசூர் ரஹ்மான் 2 விக்கெட்டுகளையும் கைப்பற்றினர். இதனையடுத்து 111 ரன்கள் எடுத்தால் வெற்றி என்ற இலக்கை நோக்கி வங்கதேச அணி விளையாடியது.
இதில் தன்ஸித் ஹசன் ஒரு ரன்னிலும், அடுத்து களமிறங்கிய கேப்டன் லிட்டன் தாஸ் ஒரு ரன்னிலும் என விக்கெட்டுகளை இழந்தனர். பின்னர் ஜோடி சேர்ந்த பர்வேஸ் ஹொசைன் மற்றும் தாவ்ஹித் ஹிரிடோய் இணை சிறப்பான ஆட்டத்தை வெளிப்படுத்தி ஸ்கோரை உயர்த்தினர். இதில் இரரும் இணைந்து 70 ரன்களுக்கு மேல் பார்ட்னர்ஷிப் அமைத்திருந்த நிலையில், 2 பவுண்டரி, 2 சிக்ஸர்கள் என 36 ரன்களைச் சேர்த்திருந்த தாவ்ஹித் ஹிரிடோய் விக்கெட்டை இழந்தார். அதேசமயம் மறுமுனையில் சிறப்பான ஆட்டத்தை வெளிப்படுத்திய பர்வேஸ் ஹொசைன் அரைசதம் கடந்தார்.
Also Read: LIVE Cricket Score
மேற்கொண்டு இந்த போட்டியில் இறுதிவரை ஆட்டமிழக்காமல் இருந்த பர்வேஸ் ஹொசைன் எமன் 3 பவுண்டரி, 5 சிக்ஸர்கள் என 56 ரன்களையும், ஜகர் அலி 3 பவுண்டரிகளுடன் 15 ரன்களையும் சேர்த்து அணிக்கு வெற்றியைத் தேடிக்கொடுத்தனர். இதன்மூலம் வங்கதேச அணி 15.3 ஓவர்களில் இலக்கை எட்டியதுடன் 7 விக்கெட் வித்தியாசத்தில் பாகிஸ்தான் அணியை வீழ்த்தியது. இந்த வெற்றியின் மூலம் வங்கதேச அணி 1-0 என்ற கணக்கில் தொடரில் முன்னிலையும் பெற்றுள்ளது. இப்போட்டியில் சிறப்பான ஆட்டத்தை வெளிப்படுத்திய பர்வேஸ் ஹொசைன் ஆட்டநாயகன் விருதை வென்றார்.