இன்னும் ஒரு வாரத்தில் இந்தியா, ஆஸ்திரேலியா பங்கேற்கும் 4 போட்டிகள் கொண்ட பார்டர் கவாஸ்கர் டெஸ்ட் தொடர் தொடங்கி நடைபெறவுள்ளது. பிப்ரவரி 9-13, 17-21 மற்றும் மார்ச் 1-5, 9-13 ஆகிய தேதிகளில் போட்டிகள் நடைபெறவுள்ளன. இதற்கான ஆஸ்திரேலிய அணி சமீபத்தில் அறிவிக்கப்பட்டது. 18 பேர் இடம்பிடித்துள்ளனர்.
கேப்டனாக வழக்கம்போல் பாட் கம்மின்ஸ் இடம்பெற்றுள்ளார். காயம் காரணமாக அவதிப்பட்டு வரும் மிட்செல் ஸ்டார்க்கிற்கு அணியில் இடம் வழங்கப்பட்டுள்ளது. இவர் முதல் டெஸ்ட் போட்டியில் மட்டும் பங்கேற்க மாட்டார் என அறிவிக்கப்பட்டது. இந்நிலையில் தற்போது, இந்த 4 டெஸ்ட் போட்டிகளில், முதல் இரண்டு டெஸ்ட்களில் இடம்பிடிக்கும் இந்திய வீரர்கள் பட்டியலை பிசிசிஐ வெளியிட்டுள்ளது. சூர்யகுமார் யாதவ், இஷான் கிஷன் இருவரும் அறிமுக வீரர்களாக இடம்பெற்றுள்ளனர்.
இத்தொடரில் இந்திய அணி 3-0 அல்லது 3-1 என்ற கணக்கில் வென்றாக வேண்டும். கடந்த இரண்டுமுறை ஆஸ்திரேலிய மண்ணில் இந்திய அணி டெஸ்ட் தொடரைக் கைப்பற்றியதால், இம்முறை இந்திய மண்ணில் டெஸ்ட் தொடரை கைப்பற்றி பதிலடி கொடுக்க ஆஸ்திரேலிய அணி கடுமையாக போராடும் எனக் கருதப்படுகிறது.
இத்தொடரில் இந்திய அணி இரண்டு வெற்றிகளை பெறும் பட்சத்தில், மூன்றுவிதமான தரவரிசையிலும் நம்பர் 1 இடத்தை பிடித்துவிடும். இதனால், இத்தொடர் மிகுந்த எதிர்பார்ப்பை ஏற்படுத்தியுள்ளது.
இந்நிலையில், கிரிக்கெட் வர்ணனையாளர் பிரிவில் தினேஷ் கார்த்திக் திடீரென்று சேர்க்கப்பட்டுள்ளார். இதற்குமுன் சுனில் கவாஸ்கர், ரவி சாஸ்திரி, முரளி கார்த்திக், அஜித் அகார்கர், ஹர்ஷா போக்லே, மேத்யூ ஹெய்டன், மஞ்சுரேக்கர் ஆகியோர் மட்டும்தான் சேர்க்கப்பட்டிருந்தனர். இந்நிலையில், தினேஷ் கார்த்திக் புதிதாக இணைந்துள்ளார்.
கடந்த ஆண்டில் இந்தியா, இங்கிலாந்து டெஸ்ட் தொடரின்போதும் தினேஷ் கார்த்திக் சிறப்பாக கமெண்ட்ரி செய்து அசத்தியிருந்தார். இந்நிலையில், மீண்டும் வாய்ப்பு கிடைத்துள்ளது என்பது குறிப்பிடத்தக்கது.
இந்திய டெஸ்ட் அணி: ரோஹித் ஷர்மா (கேப்டன்), கேஎல் ராகுல் (துணைக் கேப்டன்), ஷுப்மன் கில், சட்டேஷ்வர் புஜாரா, விராட் கோலி, ஷ்ரேயஸ் ஐயர், கேஎஸ் பரத், இஷான் கிஷன், ரவிச்சந்திரன் அஸ்வின், அக்சர் படேல், குல்தீப் யாதவ், ரவீந்திர ஜடேஜா, முகமது ஷமி, முகமது சிராஜ், உமேஷ் யாதவ், ஜெய்தேவ் உனாத்கட், சூர்யகுமார் யாதவ்.