India vs England Test Series 2025: இங்கிலாந்து - இந்தியா அணிகளுக்கு இடையேயான ஐந்து டெஸ்ட் போட்டிகள் கொண்ட தொடர் ஜூன் 20 முதல் தொடங்க இருக்கும் நிலையில், இத்தொடரின் மூலம் இங்கிலாந்தின் நட்சத்திர வீரர் ஜோ ரூட் சில சாதனைகளை படைக்கும் வாய்ப்பை பெற்றுள்ளார்.
இங்கிலாந்து - இந்தியா அணிகளுக்கு இடையேயான ஐந்து போட்டிகள் கொண்ட டெஸ்ட் தொடர் வரும் ஜூன் 20ஆம் தேதி முதல் நடைபெற இருக்கும் நிலையில், ஷுப்மன் கில் தலைமையிலான இந்திய அணி இங்கிலாந்து சென்று பயிற்சி மேற்கொண்டு வருகிறது. இந்த நிலையில் இத்தொடரின் மூலம் இங்கிலாந்து அணியின் நட்சத்திர வீரர் ஜோ ருட் சர்வதேச கிரிக்கெட்டில் சில சாதனைகளை படைக்கும் வாய்ப்பினைப் பெற்றுள்ளார்.
இந்தியா-இங்கிலாந்து டெஸ்ட் தொடரில் 3000 ரன்கள்
அதன்படி இந்திய அணிக்கு எதிரான இந்த தொடர் ஜோ ரூட் 154 ரன்களைச் சேர்க்கும் பட்சத்தில், இந்தியா - இங்கிலாந்து அணிகளுக்கு இடையேயான டெஸ்ட் தொடரில் 3000 ரன்களை எடுத்த முதல் வீரர் எனும் பெருமையைப் பெறுவார். ஜோ ரூட் இதுவரையிலும் இந்தியாவுக்கு எதிராக 30 போட்டிகளில் 55 இன்னிங்ஸ்களில் விளையாடி 2846 ரன்கள் எடுத்துள்ளார். அதேசமயம் இதுவரை இந்தியாவுக்கு எதிராக இந்த வடிவத்தில் எந்த வீரரும் 3000 ரன்களை எடுக்கவில்லை என்பது குறிப்பிடத்தக்கது.
சர்வதேச டெஸ்ட் கிரிக்கெட்டில் அதிக ரன்கள்
ஐந்து போட்டிகள் கொண்ட இந்த டெஸ்ட் தொடரில் ஜோ ரூட் மேலும் 373 ரன்களைச் சேர்க்கும் பட்சத்தில் சர்வதேச டெஸ்ட் கிரிக்கெட்டில் அதிக ரன்களைக் குவித்த இரண்டாவது வீரர் எனும் பெருமையைப் பெறுவார். தற்சமயம் அவருக்கு முன்னாள் ரிக்கி பாண்டிங் (13378 ரன்கள்), ஜாக் காலிஸ் (13289 ரன்கள்) மற்றும் ராகுல் டிராவிட் (13288 ரன்கள்) ஆகியோர் உள்ளனர். அதேசயம் ரூட் டெஸ்ட் கிரிக்கெட்டில் 143 போட்டிகளில் 279 இன்னிங்ஸ்களில் 13006 ரன்கள் எடுத்துள்ளார்.
சச்சின் டெண்டுல்கரின் உலக சாதனையை முறியடிக்க வாய்ப்பு
ரூட் இதுவரை டெஸ்ட் கிரிக்கெட்டில் 65 அரைசதங்கள் அடித்துள்ளார். இந்தத் தொடரில் அவர் நான்கு அரைசதங்கள் அடித்தால், சர்வதேச டெஸ்ட் போட்டிகளில் அதிக அரைசதங்கள் அடித்த வீரர் என்ற பெருமையைப் பெறுவார். தற்போது, இந்த சாதனை 68 அரைசதங்கள் அடித்த சச்சின் டெண்டுல்கரின் பெயரில் உள்ளது, மேலும் ஷிவ்நரைன் சந்தர்பால் 66 அரைசதங்களுடன் இரண்டாவது இடத்தில் உள்ளார் என்பது குறிப்பிடத்து.
சனத் ஜெயசூர்யாவை முந்தும் வாய்ப்பு
Also Read: LIVE Cricket Score
ஜோ ரூட் மூன்று வடிவங்களிலும் சேர்த்து 365 போட்டிகளில் 478 இன்னிங்ஸ்களில் 21025 ரன்கள் எடுத்துள்ளார். அவர் இந்த தொடரில் 8 ரன்கள் எடுத்தவுடன், சர்வதேச கிரிக்கெட்டில் அதிக ரன்கள் எடுத்த வீரர்களின் பட்டியலில் ஒன்பதாவது இடத்தைப் பிடிக்கவுள்ளார். தற்சமயம் இலங்கை அணியின் முன்னாள் ஜாம்பவான் சனத் ஜெயசூர்யா 586 போட்டிகளில் 651 இன்னிங்ஸ்களில் 21032 ரன்கள் எடுத்து 9ஆவது இடத்தில் உள்ளார் என்பது குறிப்பிடத்தக்கது.