ஆஸ்திரேலியா மற்றும் இங்கிலாந்து அணிகளுக்கு இடையிலான 2025 ஆஷஸ் தொடரின் முதல் டெஸ்ட் போட்டி நவம்பர் 21 முதல் பெர்த்தில் தொடங்குகிறது. பெர்த் டெஸ்டுக்கு முன்னதாக ஆஸ்திரேலிய அணி பெரும் பின்னடைவை சந்தித்துள்ளது. அந்த அணியின் நட்சத்திர வேகப்பந்து வீச்சாளர்களில் ஒருவரான சீன் அபோட் காயம் காரணமாக பெர்த் டெஸ்ட் போட்டியில் இருந்து விலகியுள்ளார்.
ஷெஃபீல்ட் ஷீல்ட் கோப்பை ஆஸ்திரேலியாவில் நடைபெற்று வருகிறது. சிட்னி கிரிக்கெட் மைதானத்தில் விக்டோரியாவுக்கு எதிரான போட்டியில் நியூ சவுத் வேல்ஸ் அணிக்காக சீன் அபோட் மற்றும் ஜோஷ் ஹேசில்வுட் விளையாடினர். இப்போட்டியின் மூன்றாவது நாளில், முதல் அமர்வின் போது இரு வீரர்களும் காயம் காரணமாக மைதானத்தை விட்டு வெளியேறினர். இதையடுத்து அவர்களுக்கு ஸ்கேன் பரிசோதனையும் மேற்கொள்ளப்பட்டது.
பரிசோதனையின் முடிவில் ஜோஷ் ஹெசில்வுட் பெர்த் டெஸ்டுக்கு முன்பு அவர் உடல் தகுதியுடன் இருப்பார் என்று ஆஸ்திரேலிய கிரிக்கெட் வாரியம் கூறியுள்ளது. அதேசமயம் சீன் அபோட்டின் காயம் தீவிரமடைந்துள்ளதன் காரணமாக அவர் பெர்த் டெஸ்ட் போட்டியில் இருந்து விலகியதாகவும், அவர் காயத்தில் இருந்து மீள்வதற்கு சில காலம் தேவைப்படலாம் என்றும் ஆஸ்திரேலிய கிரிக்கெட் வாரிய அறிவித்துள்ளது.
ஏற்கெனவே ஆஸ்திரேலிய அணி கேப்டன் பாட் கம்மின்ஸ் காயம் காரணமாக முதல் போட்டியில் இருந்து விலகியுள்ள நிலையில், தற்சமயம் சீன் அபோட்டும் முதல் போட்டியில் இருந்து விலகி இருப்பது அணிக்கு பெரும் பின்னடைவை ஏற்படுத்தியுள்ளது. மேலும் சீன் அபோட்டுக்கான மாற்று வீரர் யார் என்பதையும் ஆஸ்திரேலிய கிரிக்கெட் வாரியம் அறிவிக்கவில்லை என்பதும் குறிப்பிடத்தக்கது.
Also Read: LIVE Cricket Score
ஆஸ்திரேலிய டெஸ்ட் அணி: ஸ்டீவ் ஸ்மித் (கேப்டன்), சீன் அபோட், ஸ்காட் போலண்ட், அலெக்ஸ் கேரி, பிரெண்டன் டாகெட், கேமரூன் கிரீன், ஜோஷ் ஹேசில்வுட், டிராவிஸ் ஹெட், ஜோஷ் இங்கிலிஸ், உஸ்மான் கவாஜா, மார்னஸ் லபுஷாக்னே, நாதன் லையன், மிட்செல் ஸ்டார்க், ஜேக் வெதரால்ட், பியூ வெப்ஸ்டர்.