ஐசிசி ஒருநாள் தரவரிசை: ஆல் ரவுண்டர்கள் வரிசையில் பிரேஸ்வெல் முன்னேற்றம்!

பாகிஸ்தான் அணி சமீபத்தில் நியூசிலாந்தில் சுற்றுப்பயணம் மேற்கொண்டு 5 போட்டிகள் கொண்ட டி20 தொடரிலும், 3 போட்டிகள் கொண்ட ஒருநாள் தொடரிலும் விளையாடி வருகிறது. இதில் நடந்து முடிந்த டி20 தொடரை நியூசிலாந்து அணி 4-1 என்ற கணக்கில் பாகிஸ்தான் வீழ்த்தி வெற்றிபெற்று அசத்தியது. 

இதனையடுத்து நடந்து முடிந்த மூன்று போட்டிகள் கொண்ட ஒருநாள் தொடரையும் நியூசிலாந்து அணி 3-0 என்ற கணக்கில் கைப்பற்றி பாகிஸ்தானை ஒயிட்வாஷ் செய்து அசத்தியுள்ளது. இந்நிலையில் சர்வதெச கிரிக்கெட் கவுன்சில் ஒருநாள் வீரர்களுக்கான தரவரிசைப் பட்டியலை இன்று வெளியிட்டுள்ளது. இதில் பேட்டர்களுக்கான தரவரிசையில் முதல் 10 இடங்களில் எந்த மாற்றங்களும் இல்லாமல் இந்திய அணியின் ஷுப்மான் கில் தொடர்ந்து முதலிடத்தில் நீடித்து வருகிறார். 

மேற்கொண்டு இந்திய அணியின் கேப்டன் ரோஹித் சர்மா 3ஆம் இடத்திலும், விராட் கோலி 5ஆம் இடத்திலும், ஸ்ரேயாஸ் ஐயர் 8ஆவது இடத்திலும் தொடர்கின்றனர். இந்த பட்டியலில் பாகிஸ்தான் அணியின் கேப்டன் முகமது ரிஸ்வான் இரண்டு இடங்கள் முன்னேறி 21ஆவது இடத்தையும், தென் ஆப்பிரிக்க கேப்டன் டெம்பா பவுமா 29ஆவது இடத்தையும், பாகிஸ்தானின் சல்மான் அலி ஆகா 40ஆவது இடத்திற்கும் முன்னேறியுள்ளனர். 

இதுதவிர்த்து பந்துவீச்சாளர்களுக்கான தரவரிசை பட்டியலில் இலங்கையின் மஹீஷ் தீக்ஷனா முதலிடத்திலும், இந்தியாவின் குல்தீப் யாதவ் இரண்டாம் இடத்திலும், தென் ஆப்பிரிக்காவின் கேசவ் மஹாராஜ் மூன்றாம் இடத்திலும், நமீபியாவின் பெர்னார்ட் ஸ்கோல்ட்ஸ் 5ஆம் இடத்திலும் தொடரும் நிலையில், ஆஃப்கானிஸ்தானின் ரஷித் கான் ஒரு இடம் முன்னேறி 5ஆம் இடத்திற்கு முன்னேறியுள்ளார். அதேசமயம் நியூசிலாந்தின் மிட்செல் சான்ட்னர் இரண்டு இடங்கள் பின் தங்கியுள்ளார். 

Also Read: Funding To Save Test Cricket

அதேசமயம் ஆல் ரவுண்டர்களுக்கான தரவரிசையில் ஆஃப்கானிஸ்தானின் அஸ்மதுல்லா ஒமர்ஸாய் முதலிடத்திலும், முகமது நபி இரண்டாம் இடத்திலும் தொடரும் நிலையில், நியூசிலாந்து வீரர் மைக்கேல் பிரேஸ்வெல் 2 இடங்கள் முன்னேறி 5ஆம் இடத்தைப் பிடித்துள்ளார். அதேசமயம் இந்திய வீரர் ரவீந்திர ஜடேஜாவும் ஒரு இடம் முன்னேறி 9ஆம் இடத்தைப் பிடித்துள்ளார் என்பது குறிப்பிடத்தக்கது.