எதிர்வரும் ஆஷஸ் தொடரில் ஜோஃப்ரா ஆர்ச்சர் துருப்புச்சீட்டாக இருப்பார் - ஜேம்ஸ் ஆண்டர்சன்!

இங்கிலாந்து - ஆஸ்திரேலிய அணிகளுக்கு இடையே நடைபெறும் பரம்பரியமிக்க டெஸ்ட் தொடரான ஆஷஸ் தொடரின் மீது ரசிகர்களில் எதிர்பார்ப்பு எப்போதும் அதிகளவில் இருந்து வந்துள்ளது. அந்தவகையில் இம்முறை இங்கிலாந்து அணியானது ஆஸ்திரேலியாவிற்கு சுற்றுப்பயணம் மேற்கொண்டு 5 டெஸ்ட் போட்டிகள் கொண்ட தொடரில் விளைடாடவுள்ளது. 

அதுமட்டுமில்லாமல் இங்கிலாந்து அணி கடந்த 10ஆண்டுகளுக்கு மேலாகவே ஆஸ்திரேலியாவில் டெஸ்ட் தொடரை வெல்லமுடியாமல் தடுமாறி வருகிறது. அதிலும் குறிப்பாக கடந்தாண்டு நடைபெற்ற தொடரை கூட இங்கிலாந்து அணியானது 2-2 என்ற கணக்கில் சமன்செய்து அசத்தியதே தவிர, தொடரை வெல்ல முடியவில்லை. இதனால் இம்முறை அந்த தடையை உடைத்து தொடரை கைப்பற்றுமா என்ற எதிர்பார்ப்புகளும் அதிகரித்துள்ளன.

மேலும் எதிர்வரும் ஆஷஸ் தொடருக்கான இடம் மற்றும் தேதி குறித்த அறிவிப்பை ஆஸ்திரேலிய கிரிக்கெட் வாரியம் சமீபத்தில் அறிவித்துள்ளது. அந்தவகையில் ஆஸ்திரேலியா மற்றும் இங்கிலாந்து அணிகளுக்கு இடையேயன ஆஷஸ் டெஸ்ட் தொடரின் முதல் டெஸ்ட் போட்டி அடுத்த ஆண்டு நவம்பர் மாதம் 21ஆம் தேதி தொடங்கும் என்றும், இரு அணிகளுக்கு இடையேயான இரண்டாவது டெஸ்ட் போட்டியானது பகலிரவு போட்டியாக பிரிஸ்பேனில் நடைபெறம் என அறிவிக்கப்பட்டுள்ளது.

இந்நிலையில், எதிர்வரும் ஆஷஸ் கோப்பை கிரிக்கெட் தொடரில் இங்கிலாந்து அணி வெற்றிபெறுவதில் வேகப்பந்து வீச்சாளர் ஜோஃப்ரா ஆர்ச்சர் முக்கிய பங்கினை வகிப்பார் என முன்னாள் வீரர் ஜேம்ஸ் ஆண்டர்சன் நம்பிக்கை தெரிவித்துள்ளார். இதுகுறித்து பேசிய அவர், “ஜோஃப்ரா ஆர்ச்சரை முழு உடற்தகுதியுடன் வைத்திருக்க முடிந்தால், நம்மால் நிச்சயம் ஆஷஸ் தொடரை வெல்லும் வாய்ப்பு உள்ளது. ஆனால் என்னை பொறுத்தவரை அவரது காயம் தான் இங்கிலாந்து டெஸ்ட் அணிக்கு கவலையளிக்கிறது. 

ஆனால் ஜோஃப்ரா போதுமான அளவு கடினமாக உழைத்து, சிறப்பாகச் சமாளித்தால், அவர் ஆஷஸில் எங்களுக்கு மிகப்பெரும் துருப்புச்சீட்டாக இருப்பார். அதேசமயம் கிறிஸ் வோக்ஸ், மார்க் வூட், ஆர்ச்சர் என எங்களுக்கு போதுமான அனுபவம் வாய்ந்த வீரர்கள் கிடைத்துள்ளதாக நினைக்கிறேன். அவர்களைப் போலவே கஸ் அட்கின்சன், பிரைடன் கார்ஸ் மற்றும் மேத்யூ பாட்ஸ் ஆகியோரும் சிறப்பாகச் செயல்பட்டு வருகின்றனர்” என்று தெரிவித்துள்ளார்.

இங்கிலாந்து டெஸ்ட் அணிக்காக கடந்த 2019ஆம் ஆண்டு அறிமுகமான ஜோஃப்ரா ஆர்ச்சர் இதுவரை 13 டெஸ்ட் போட்டிகளில் விளையாடி 42 விக்கெட்டுகளை கைப்பற்றி அசத்தியுள்ளார். இருப்பினும் காயம் காரணமாக கடந்த 2021ஆம் ஆண்டுக்கு பிறகு டெஸ்ட் அணியில் இடம்பிடிக்காத அவர், மீண்டும் எப்போது டெஸ்ட் அணிக்கு திரும்புவார் என்ற எதிர்பார்ப்புகள் அதிகரித்துள்ளன. 

Also Read: Funding To Save Test Cricket

ஆஷஸ் டெஸ்ட் தொடர் அட்டவணை

• முதல் டெஸ்ட்: பெர்த் - நவம்பர் 21-25
• இரண்டாவது டெஸ்ட்: பிரிஸ்பேன் - டிசம்பர் 4-8
• மூன்றாவது டெஸ்ட்: அடிலெய்டு -டிசம்பர் 17-21
• நான்காவது டெஸ்ட்: மெல்போர்ன் - டிசம்பர் 26-30
• ஐந்தாவது டெஸ்ட்: சிட்னி - ஜனவரி 4-8