India vs England 4th Test: மான்செஸ்டர் டெஸ்ட் போட்டியில் ஜஸ்பிரித் பும்ரா ஒரு விக்கெட்டை கைப்பற்றியதன் மூலம் இங்கிலாந்தில் டெஸ்ட் போட்டிகளில் 50 விக்கெட்டுகளை வீழ்த்திய இரண்டாவது இந்திய வீரர் எனும் பெருமையைப் பெற்றுள்ளார்.
இங்கிலாந்து - இந்தியா அணிகளுக்கு இடையேயான நான்காவது டெஸ்ட் போட்டி மான்செஸ்டரில் உள்ள ஓல்ட் டிராஃபோர்ட் மைதானத்தில் நடைபெற்று வருகிறது. இதில் டாஸை இழந்து முதலில் பேட்டிங் செய்த இந்திய அணி முதல் இன்னிங்ஸில் 358 ரன்களைச் சேர்த்து ஆல் அவுட்டானது. அதன்பின் முதல் இன்னிங்ஸை தொடங்கிய இங்கிலாந்து அணி ஜோ ரூட்டின் அபாரமான சதத்தின் மூலம் மூன்றாம் நாள் ஆட்டநேர முடிவில் 7 விக்கெட்டுகளை இழந்து 544 ரன்களைக் குவித்துள்ளது.
இதில் கேப்டன் பென் ஸ்டோக்ஸ் 76 ரன்களுடனும், லிடாம் டௌசன் 21 ரன்களுடனும் களத்தில் உள்ளனர். இந்திய அணி தரப்பில் வாஷிங்டன் சுந்தர் மற்றும் ரவீந்திர ஜடேஜா தலா 2 விக்கெட்டுகளைக் கைப்பற்றியுள்ளனர். இதனையடுத்து 186 ரன்கள் முன்னிலையுடன் இங்கிலாந்து அணி நாளை நான்காம் நாள் ஆட்டத்தை தொடரவுள்ளது. இந்நிலையில் இப்போட்டியில் இந்திய அணி வேகப்பந்து வீச்சாளர் ஜஸ்பிரித் பும்ரா சிறப்பு சாதனை படைத்துள்ளார்.
இங்கிலாந்தில் 50 டெஸ்ட் விக்கெட்டுகள்
இப்போட்டியில் ஜஸ்பிரித் பும்ரா இங்கிலாந்தின் ஜேமி ஸ்மித்தின் விக்கெட்டைக் கைப்பற்றியதன் மூலம் இங்கிலாந்தில் 50 டெஸ்ட் விக்கெட்டுகளை பூர்த்தி செய்துள்ளார். இதன்மூலம் சர்வதேச டெஸ்ட் கிரிக்கெட்டில் இங்கிலாந்தில் 50 விக்கெட்டுகளை கைப்பற்றிய இரண்டாவது இந்திய வீரர் எனும் பெருமையைப் பெற்றுள்ளார். இதற்கு முன், இஷாந்த் சர்மா மட்டுமே இங்கிலாந்தில் 50+ டெஸ்ட் விக்கெட்டுகளை கைப்பற்றியுள்ளார் என்பது குறிப்பிடத்தக்கது.
முதல் இந்திய வீரர்
இதுதவிர்த்து அவர் இங்கிலாந்தில் 50 டெஸ்ட் விக்கெட்டுகளை பூர்த்தி செய்ததன் மூலம், இரண்டு நாடுகளில் 50+ டெஸ்ட் விக்கெட்டுகளை வீழ்த்திய முதல் இந்தியர் மற்றும் அசிய வீரர் எனும் சாதனைகளையும் ஜஸ்பிரித் பும்ரா படைத்துள்ளார். முன்னதாக ஜஸ்பிரித் பும்ரா ஆஸ்திரேலியாவில் 64 டெஸ்ட் விக்கெட்டுகளை கைப்பற்றிய உள்ளார். இந்த பட்டியலில் இஷாந்த் சர்மா இங்கிலாந்திலும், கபில் தேவ் ஆஸ்திரேலியாவிலும் மட்டுமே 50 விக்கெட்டுகளை பூர்த்தி செய்துள்ளனர்.
- 64 - ஆஸ்திரேலியாவில் ஜஸ்பிரித் பும்ரா
- 51 - ஆஸ்திரேலியாவில் கபில் தேவ்
- 51 - இங்கிலாந்தில் இஷாந்த் சர்மா
- 50* இங்கிலாந்தில் ஜஸ்பிரித் பும்ரா
மேற்கொண்டு சர்வதேச கிரிக்கெட்டில் இங்கிலாந்தில் அதிக விக்கெட்டுகளை வீழ்த்திய ஆசிய பந்துவீச்சாளர்கள் பட்டியலில் பாகிஸ்தானின் வாசிம் அக்ரமை பின்னுக்கு தள்ளி ஜஸ்பிரித் பும்ரா இரண்டாம் இடத்திற்கு முன்னேறியுள்ளார். இதற்கு முன் வாசிம் அக்ரம் 46 இன்னிங்ஸில் 81 விக்கெட்டுகளை வீழ்த்தி இருந்த நிலையில், தற்போது பும்ரா 39 இன்னிங்ஸ்களில் 82 விக்கெட்டுகளை வீழ்த்தி அவரது சாதனையை முறியடித்துள்ளார். இந்த பட்டியலில் பாகிஸ்தானின் முகமது ஆமிர் 87 விக்கெட்டுகளுடன் முதலிடத்தில் உள்ளார்.