IND vs AUS: ஸ்ரேயாஸ் ஐயருக்கு நிபந்தனை விதித்த பிசிசிஐ!

இந்தியா - ஆஸ்திரேலிய அணிகளுக்கு இடையேயான பார்டர் கவாஸ்கர் கோப்பை தொடர் விறுவிறுப்பாக நடைபெற்று வருகிறது. முதல் போட்டியில் இந்திய அணி அபார வெற்றி பெற்ற நிலையில், தற்போது 2ஆவது போட்டிக்கான ஏற்பாடுகள் நடந்து வருகின்றன. இந்த போட்டி வரும் பிப்ரவரி 17ஆ ம் தேதி முதல் 21ஆம் தேதி வரை டெல்லியில் உள்ள அருண் ஜெய்ட்லி மைதானத்தில் நடைபெறவுள்ளது. இதற்கான பிளேயிங் 11 குழப்பம் தற்போது இருந்தே சூடுபிடித்துள்ளது.

இந்திய அணியை பொறுத்தவரையில் கடந்த போட்டியில் மிடில் ஆர்டரில் மோசமாக சொதப்பியது. லோயர் ஆர்டரில் மட்டும் ஜடேஜா - அக்‌ஷர் ஆகியோர் காப்பாற்றவில்லை என்றால் சிரமம் ஏற்பட்டிருக்கும். இந்த சிக்கலுக்கு காரணம் ஸ்ரேயாஸ் ஐயர் இல்லாதது தான். முதுகில் ஏற்பட்ட பிரச்சினை காரணமாக முதல் டெஸ்டில் இருந்து விலகிய அவர், அடுத்த போட்டியில் வந்துவிடுவார் எனக்கூறப்பட்டது.

அதன்படி பெங்களூரு தேசிய கிரிக்கெட் அகாடமியில் ஸ்ரேயாஸ் ஐயர், முழுமையாக குணமடைந்துவிட்டார் எனக்கூறப்பட்டுள்ளது. உடற்தகுதி தேர்விலும் தேர்ச்சியடைந்துவிட்டதாகவும் தகவல்கள் வெளியாகின. எனினும் அவரை 2வது டெஸ்ட் போட்டிக்கு அவரை சேர்க்க இந்திய அணி தயாராக இல்லை என தெரிகிறது. இதற்கு காரணம் புதிய விதிமுறை தான்.

அதாவது என்னதான் ஒரு வீரர் ஃபிட்னஸில் தேர்ச்சி பெற்றாலும் நேரடியாக ஒரு போட்டியில் கொண்டு வர தயாராக இல்லை. உள்நாட்டு தொடர்களில் விளையாடி ஃபார்மை நிரூபித்துவிட்டு தான் வரவேண்டுமாம். அதன்படி தான் ஜடேஜா சமீபத்தில் ரஞ்சிக்கோப்பையில் தமிழ்நாடு அணிக்கு எதிராக 7 விக்கெட்களை கைப்பற்றி நிரூபித்தார். தற்போது அதே போல ஸ்ரேயாஸ் ஐயருக்கு இரானி கோப்பை கொடுக்கப்பட்டுள்ளது.

இரானி கோப்பையில் மத்திய பிரதேசம் மற்றும் ரெஸ்ட் ஆஃப் இந்தியா அணிகள் வரும் மார்ச் 1ஆம் தேதி முதல் மோதவுள்ளன. இதில் ஸ்ரேயாஸ் ஐயரின் பெயரையும் சேர்த்து விளையாட வைக்கவுள்ளனர். ஒருவேளை அவர் 90 ஓவர்களிலும் எந்தவித உடல் தொந்தரவுகளும் இன்றி நன்றாக விளையாடிவிட்டால் ஆஸ்திரேலியாவுடனான 3ஆவது மற்றும் 4ஆவது டெஸ்ட் போட்டிக்கு தேர்வு செய்யப்படுவார். ஆஸ்திரேலியாவுக்கு எதிரான 3 & 4 வது டெஸ்ட் போட்டிகளுக்கு இன்னும் இந்திய அணி அறிவிக்கப்படவில்லை என்பது குறிப்பிடத்தக்கது.