தனக்கு பிடித்த பேட்டர், பந்துவீச்சாளர் குறித்து மனம் திறந்த சிக்கந்தர் ரஸா!

ஜிம்பாப்வே அணியின் நட்சத்திர ஆல் ரவுண்டர் மற்றும் அணியின் கேப்டனாக அறியபடுபவர் சிக்கந்தர் ரஸா. இவர் சர்வதேச கிரிக்கெட் மட்டுமின்றி பல்வேறு நாடுகள் நடத்தும் ஃபிரான்சைஸ் லீக் போட்டிகளிலும் பங்கேற்று விளையாடியுள்ளார். இதனால் ஒவ்வொரு பேட்ஸ்மேன் மற்றும் பந்துவீச்சாளரின் பலம் மற்றும் பலவீனங்களை அவர் நன்கு அறிந்திருக்கிறார். இதற்கிடையில், ஜிம்பாப்வே கேப்டன் சமீபத்தில் சமூக ஊடகங்களில் உலகம் முழுவதும் உள்ள தனது ரசிகர்களுக்காக கேள்வி-பதில் அமர்வை நடத்தினார்.

தனது ரசிகர்களுடனான சமூக வலைதள அமர்வின் போது சிக்கந்தர் ரஸா ரசிகர்கஈன் பல கேள்விகளுக்கு பதிலளித்தார்.  அப்போது ரசிகர் ஒருவர் சிக்கந்தர் ரஸாவிடம் பாகிஸ்தானுக்காக விளையாட நினைத்தீர்களா என்ற கேள்வியை எழுப்பினார். அதற்கு பதிலளித்த அவர், தான் பாகிஸ்தானில் பிறந்தாலும், ஜிம்பாப்வே கிரிக்கெட்டின் தயாரிப்பு என்றும், ஜிம்பாப்வேக்காக மட்டுமே விளையாட விரும்புவதாகவும் தெரிவித்திருந்தார். 

இதுகுறித்து ரஸா தனது பதிவில்,"நான் ஒரு பாகிஸ்தானியாக பிறந்தாலும், ஜிம்பாப்வே கிரிக்கெட்டின் தயாரிப்பு. நான் எப்போதும் ஜிம்பாப்வேயை பிரதிநிதித்துவப்படுத்துவேன். அவர்கள் எனக்காக நேரத்தையும் பணத்தையும் செலவழித்துள்ளனர், நான் அவர்களின் நம்பிக்கையை திருப்பித் தர முயற்சிக்கிறேன், நான் அடையும் எதுவும் அந்த நம்பிக்கையைத் திருப்பித் தராது. ஜிம்பாப்வே என்னுடையது. மேலும் நான் அவர்களுக்கு முற்றிலும் சொந்தமானவன்" என்று தெரிவித்துள்ளார். 

மேற்கொண்டு அவரிடம் உங்களுக்கு பிடித்த பேட்டர் மற்றும் பந்துவீச்சாளர்கள் யார் என்பது குறித்த கேள்வியை ஒரு ரசிகர் எழுப்பினார். அதற்கு பதிலளித்த சிக்கந்தர் ரஸா, இந்திய அணியின் கேப்டன் ரோஹித் சர்மா, ஜிம்பாப்வே அனுபவ வீரர் கிரேக் எர்வின் மற்றும் பாகிஸ்தானின் அப்துல்லா ஷஃபிக் ஆகியோர் தனக்கு மிகவும் பிடித்த பேட்டர்கள் என்றும், இந்தியவின் ஜஸ்பிரித் பும்ரா, விண்டீஸின் சுனில் நரைன், பாகிஸ்தானின் ஷாஹீன் அஃப்ரிடி ஆகியோரை தனக்கு பிடித்த பந்துவீச்சாளர்களாக தேர்வு செய்துள்ளார்.

Also Read: Akram ‘hopes’ Indian Team Will Travel To Pakistan For 2025 Champions Trophy

இந்நிலையில் சிக்கந்தர் ரஸாவின் இந்த பதில்களானது தற்சமயம் கிரிக்கெட் ரசிகர்கள் மத்தியில் வைரலாகி வருகிறது. ஜிம்பாப்வே அணிக்காக கடந்த 2013ஆம் ஆண்டு சர்வதேச கிரிக்கெட் போட்டிகளில் அறிமுகமான சிக்கந்தர் ரஸா, இதுவரை அந்த அணிக்காக 17 டெஸ்ட், 142 ஒருநாள் மற்றும் 91 டி20 போட்டிகளில் விளையாடி ஏழாயிரத்திற்கும் அதிகமான ரன்களையும், பந்துவீச்சில் 188 விக்கெட்டுகளையும் கைப்பற்றி அசத்தியுள்ளார் என்பது குறிப்பிடத்தக்கது.