ZIM vs SA: ஜிம்பாப்வேவுக்கு எதிரான டி20 போட்டியில் தென் ஆப்பிரிக்க அணி கேப்டன் ரஸ்ஸி வேண்டர் டுசென் மற்றும் ருபின் ஹர்மான் ஆகியோர் அரைசதம் கடந்து அணிக்கு வெற்றியைத் தேடிக்கொடுத்தனர்.
தென் ஆப்பிரிக்கா, நியூசிலாந்து அணிகள் தற்சமயம் ஜிம்பாப்வேவில் சுற்றுப்பயணம் மேற்கொண்டு அந்த அணிக்கு எதிராக முத்தரப்பு டி20 தொடரில் விளையாடி வருகிறது. இதில் நான்காவது லீக் போட்டியில் ஜிம்பாப்வே மற்றும் தென் ஆப்பிரிக்க அணிகள் பலப்பரீட்சை நடத்தின. ஹராரே ஸ்போர்ட்ஸ் கிளப் மைதானத்தில் நடைபெற்ற இப்போட்டியில் டாஸ் வென்ற தென் ஆப்பிரிக்க அணி முதலில் பந்துவீசுவதாக அறிவித்தது. இதையடுத்து களமிறங்கிய ஜிம்பாப்வே அணிக்கு வெஸ்லி மதவெரே மற்றும் பிரையன் பென்னட் இணை தொடக்கம் கொடுத்தனர்.
இதில் பிரையன் பென்னட் ஒருபக்கம் சிறப்பான ஆட்டத்தை வெளிப்படுத்தி அணியின் ஸ்கோரை உயர்த்திய நிலையில், மறுமுனையில் மதவெரே 13 ரன்களுக்கும், மடாண்டே 8 ரன்களுக்கும், சிக்கந்தர் ரஸா 9 ரன்களுக்கும் என விக்கெட்டை இழந்தனர். பின்னர் பென்னட்டுடன் இணைந்த ரியான் பார்ல் ஓரளவு தாக்குப்பிடித்து அணியின் ஸ்கோரை உயர்த்தும் முயற்சியில் இறங்கினர். இதில் பென்னட் தனது அரைசதத்தைப் பதிவுசெய்ய, இருவரின் பார்ட்னர்ஷிப்பும் 80 ரன்களைத் தாண்டியது. அதன்பின் 7 பவுண்டரி மற்றும் 3 சிக்ஸர்கள் என 61 ரன்களைச் சேர்த்து பென்னட் ஆட்டமிழந்தார்.
இறுதியில் ரியான் பார்ல் 36 ரன்களைச் சேர்த்ததைத் தவிர்த்து மற்ற வீரர்கள் யாரும் பெரிதளவில் ரன்களைச் சேர்க்க தவறினர். இதனால் ஜிம்பாப்வே அணி 20 ஓவர்கள் முடிவில் 6 விக்கெட்டுகள் இழப்பிற்கு 144 ரன்களைச் சேர்த்தது. தென் ஆப்பிரிக்க அணி தரப்பில் கார்பின் போஷ் 2 விக்கெட்டுகளை கைப்பற்றினார். அதன்பின் இலக்கை நோக்கி விளையாடிய தென் ஆப்பிரிக்க அணிக்கு தொடக்கம் சிறப்பானதாக அமையவில்லை. அணியின் தொடக்க வீரர்கள் பிரிட்டோரியஸ் 4 ரன்னிலும், ரீஸா ஹென்றிக்ஸ் 6 ரன்னிலும் என ஆட்டமிழந்து ஏமாற்றமளித்தனர்.
பின்னர் ஜோடி சேர்ந்த கேப்டன் ரஸ்ஸி வேன்டர் டுசென் மற்றும் ருபின் ஹர்மான் இணை பொறுப்புடன் விளையாடி அணியின் ஸ்கோரை உயர்த்தினர். தொடர்ந்து சிறப்பாக விளையாடி வந்த இருவரும் அரைசதம் கடந்ததுடன், மூன்றாவது விக்கெட்டிற்கு 100 ரன்களுக்கு மேல் பார்ட்னர்ஷிப் அமைத்தனர். அதன்பின் 3 பவுண்டரி, 4 சிக்ஸர்களை அடித்திருந்த ரூபின் ஹர்மான் ஆட்டமிழந்தார். இருப்பினும் இப்போட்டியில் இறுதிவரை ஆட்டாமிழக்காமல் இருந்த ரஸ்ஸி வேண்டர் டுசென் 52 ரன்களையும், டெவால் பிரீவிஸ் 14 ரன்களையும் சேர்த்து அணிக்கு வெற்றியைத் தேடிக்கொடுத்தனர்.
Also Read: LIVE Cricket Score
இதன்மூலம் தென் ஆப்பிரிக்க அணி 17.2 ஓவர்களில் இலக்கை எட்டியதுடன் 7 விக்கெட் வித்தியாசத்தில் ஜிம்பாப்வே அணியை வீழ்த்தி வெற்றியைப் பதிவுசெய்தது. இந்த வெற்றியின் மூலம் இந்த முத்தரப்பு டி20 தொடரில் தென் ஆப்பிரிக்க அணி இரண்டாவது வெற்றியைப் பதிவுசெய்துள்ள நிலையில், ஜிம்பாப்வே அணி ஹாட்ரிக் தோல்வியைச் சந்தித்துள்ளது. இப்போட்டியில் சிறப்பான ஆட்டத்தை வெளிப்படுத்திய ரூபின் ஹர்மான் ஆட்டநாயகன் விருதை வென்றார்.