சச்சின், டிராவிட், கவாஸ்கரின் சாதனை பட்டியலில் இணையவுள்ள கேஎல் ராகுல்!
இங்கிலாந்து அணிக்கு எதிரான நான்காவது டெஸ்ட் போட்டியின் மூலம் இந்திய அணியின் நட்சத்திர வீரர் கேஎல் ராகுல் சிறப்பு சாதனை பட்டியலில் இடம்பெறும் வாய்ப்பை பெற்றுள்ளார்.
இங்கிலாந்து - இந்தியா அணிகளுக்கு இடையேயான ஆண்டர்சன் - டெண்டுல்கர் கோப்பை டெஸ்ட் தொடரின் 4ஆவது போட்டி எதிர்வரும் ஜூலை 23ஆம் தேதி மான்செஸ்டரில் உள்ள ஓல்ட் டிராஃபோர்ட் கிரிக்கெட் மைதானத்தில் நடைபெறவுள்ளது. தற்சமயம் இங்கிலாந்து அணி இத்தொடரில் 2-1 என்ற கணக்கில் முன்னிலை வகித்து வரும் நிலையில், இப்போட்டியிலும் வெற்றிபெற்று தொடரை கைப்பற்றும் முனைப்பில் விளையாடவுள்ளது.
அதேசமயம் இந்திய அணி இப்போட்டியில் வெற்றி பெற்றால் மட்டுமே தொடரை சமன்செய்யும் என்பதால் இப்போட்டியில் எந்த அணி வெற்றிபெறும் என்ற எதிர்பார்ப்புகள் அதிகரித்துள்ளன. மேலும் இப்போட்டிகாக இரு அணி வீரர்களும் தீவிரமாக தயாராகியும் வருகின்றன. இந்நிலையில் இப்போட்டியில் இந்திய வீரர் கேஎல் ராகுல் சிறப்பான ஆட்டத்தை வெளிப்படுத்தும் பட்சத்தில் ஜாம்பவான்கள் வரிசையில் இணையும் வாய்ப்பை பெற்றுள்ளார்.
அதன்படி இப்போட்டியில் ராகுல் மேற்கொண்டு 11 ரன்களைச் சேர்க்கும் பட்டத்தில் இங்கிலாந்து மண்ணில் தனது 1000 டெஸ்ட் ரன்களைப் பதிவுசெய்வார். இதனை அவர் பூர்த்தி செய்யும் பட்சத்தில் இந்திய அணி தரப்பில் இந்த மைல்கல்லை எட்டும் நான்காவது இந்திய வீரர் எனும் பெருமையையும் அவர் பெறுவார். இதற்கு முன், சச்சின் டெண்டுல்கர், ராகுல் டிராவிட் மற்றும் சுனில் கவாஸ்கர் ஆகியோர் மட்டுமே இங்கிலாந்து மண்ணில் இந்த சாதனையைச் செய்துள்ளனர்.
இங்கிலாந்தில் அதிக ரன்கள் அடித்தவர்கள் பட்டியலில், சச்சின் டெண்டுல்கர் 17 டெஸ்டில் 30 இன்னிங்ஸ்களில் விளையாடி 4 சதம், 8 அரைசதங்களுடன் 1575 ரன்களை எடுத்து முதலிடத்தில் உள்ளார். ராகுல் டிராவிட் 13 டெஸ்டில் 23 இன்னிங்ஸ்களில் விளையாடி 6 சதங்கள் மற்றும் 4 அரைசதங்களுடன் 1376 ரன்களை எடுத்து இரண்டாம் இடத்திலும், சுனில் கவாஸ்கர், 16 டெஸ்ட் போட்டிகளில் 28 இன்னிங்ஸ்களில் விளையாடி இரண்டு சதம், 8 அரைசதங்களுடன் 1152 ரன்கள் எடுத்து மூன்றாம் இடத்தைப் பிடித்துள்ளார்.
நடப்பு இங்கிலாந்து டெஸ்ட் தொடரில் கேஎல் ராகுல் சிறப்பான ஆட்டத்தை வெளிப்படுத்தி வருவதுடன், இத்தொடரில் அதிக ரன்கள் எடுத்த வீரர்களின் பட்டியலில் தற்போது நான்காவது இடத்தில் உள்ளார். முதல் மூன்று டெஸ்ட் போட்டிகளின் முடிவில், அவர் 62.50 சராசரியுடன் 375 ரன்கள் எடுத்துள்ளார். இதில் இரண்டு சதங்கள் மற்றும் ஒரு அரை சதமும் அடங்கும். இதில் அவர் அதிகபட்சமாக ஒரு இன்னிங்ஸில் 137 ரன்களை எடுத்துள்ளார் என்பது குறிப்பிடத்தக்கது.
Also Read: LIVE Cricket Score
இந்திய டெஸ்ட் அணி: ஷுப்மன் கில் (கேப்டன்), ரிஷப் பந்த், யஷஸ்வி ஜெய்ஸ்வால், கேஎல் ராகுல், சாய் சுதர்ஷன், அபிமன்யு ஈஸ்வரன், கருண் நாயர், நிதிஷ் குமார் ரெட்டி, ரவீந்திர ஜடேஜா, துருவ் ஜூரல், வாஷிங்டன் சுந்தர், ஷர்துல் தாக்கூர், ஜஸ்பிரித் பும்ரா, முகமது சிராஜ், பிரசித் கிருஷ்ணா, ஆகாஷ் தீப், அர்ஷ்தீப் சிங், குல்தீப் யாதவ்.
Win Big, Make Your Cricket Tales Now
