கேஎல் ராகுல் தொடக்க வீரராக களம் இறங்குவார் - ரோஹித் சர்மா!

ஆஸ்திரேலிய அணிக்கு எதிரான இரண்டாவது டெஸ்ட் போட்டியில் கேஎல் ராகுல் தொடக்க வீரராக களமிறங்குவார் என இந்திய அணி கேப்டன் ரோஹித் சர்மா உறுதியளித்துள்ளார்.

கேஎல் ராகுல் தொடக்க வீரராக களம் இறங்குவார் - ரோஹித் சர்மா! (Image Source: Google)

ஆஸ்திரேலியாவில் சுற்றுப்பயணம் செய்துவரும் இந்திய அணி 5 போட்டிகளை உள்ளடக்கிய பார்டர் கவாஸ்கர் கோப்பை கிரிக்கெட் தொடரில் விளையாடி வருகிறது. இதில் நடந்து முடிந்த முதல் டெஸ்ட் போட்டியில் இந்திய அணியானது 295 ரன்கள் வித்தியாசத்தில் ஆஸ்திரேலிய அணியை வீழ்த்தி அபார வெற்றியைப் பதிவுசெய்துள்ளது. இந்த வெற்றியின் மூலம் 5 போட்டிகள் கொண்ட டெஸ்ட் தொடரில் 1-0 என்ற கணக்கில் இந்திய அணி முன்னிலைப் பெற்றுள்ளது. 

இதைத்தொடர்ந்து ஆஸ்திரேலியா - இந்திய அணிகளுக்கு இடையேயான இரண்டாவது டெஸ்ட் போட்டியானது பகலிரவு ஆட்டமாக அடிலெய்டில் நாளை (டிசம்பர் 06) நடைபெறவுள்ளது. இதில் ஏற்கெனவே இந்திய அணி முதல் போட்டியில் வெற்றிபெற்று தொடரில் முன்னிலை வகிக்கும் நிலையில், இப்போட்டியிலும் வெற்றிபெற்று தங்கள் ஆதிக்கத்தை செலுத்த முயற்சிக்கும். அதேவேளை சொந்த மண்ணில் தோல்வியைத் தழுவியுள்ள ஆஸ்திரேலிய அணியானது இப்போட்டியில் அதற்கான பதிலடியை கொடுக்கும் முயற்சியிலும் விளையாடவுள்ளது. இதனால் இப்போட்டியில் எந்த அணி வெற்றிபெறும் என்ற எதிர்பார்ப்புகள் அதிகரித்துள்ளன.

இந்நிலையில் தனிப்பட்ட காரணங்களால் முதல் டெஸ்ட் போட்டியில் இருந்து விலகிய ரோஹித் சர்மா இப்போட்டி முதல் இந்திய அணியில் இணைந்துள்ளார். இதனால் நாளைய போட்டியில் இந்திய அணியின் தொடக்க வீரர்களாக யார் களமிறங்குவார் என்ற கேள்வி எழுந்துள்ளது. ஏனெனில் முந்தைய போட்டியில் தொடக்க வீரராக கேஎல் ராகுல் களமிறங்கி சிறப்பான ஆட்டத்தை வெளிப்படுத்தியதன் காரணமாக அவரது இடத்தை மாற்றக்கூடாது என்ற கோரிக்கைகள் எழுந்தது. இந்நிலையில் கேஎல் ராகுல் எந்த வரிசையில் களமிறங்குவார் என்பது குறித்து கேப்டன் ரோஹித் சர்மா விளக்கமளித்துள்ளார். 

இதுகுறித்து இன்று நடைபெற்ற செய்தியாளர் சந்திப்பின் போது பேசிய ரோஹித் சர்மா, “கேஎல் ராகுல் தொடக்க வீரராக களம் இறங்குவார். நான் மிடில் ஆர்டரில் ஏதாவது ஒரு இடத்தில் களமிறங்குவேன். ஏனெனில் முதல் டெஸ்ட் போட்டியில் கேஎல் ராகுல் பேட்டிங் செய்த விதமும், ஜெய்ஸ்வாலுடனான அவரது பார்ட்னர்ஷிப்பும் அந்த போட்டியின் வெற்றிக்கு உறுதுணையாக இருந்தது. இந்தியாவுக்கு வெளியே அவர் பேட்டிங் செய்யும் விதம் அதற்கு தகுதியானது. இது மிகவும் எளிமையான முடிவு. தனிப்பட்ட முறையில், இது எளிதானது அல்ல. ஆனால் அணிக்கு இது எளிதான முடிவாகும்” என்று தெரிவித்துள்ளார். 

இந்திய டெஸ்ட் அணி: ரோஹித் சர்மா (கே), ஜஸ்பிரித் பும்ரா, யஷஸ்வி ஜெய்ஸ்வால், அபிமன்யு ஈஸ்வரன், ஷுப்மான் கில், விராட் கோலி, கேஎல் ராகுல், ரிஷப் பந்த், சர்ஃப்ராஸ் கான், துருவ் ஜூரல், ரவிச்சந்திரன் அஸ்வின், ரவீந்திர ஜடேஜா, முகமது சிராஜ், ஆகாஷ் தீப், பிரசித் கிருஷ்ணா, ஹர்ஷித் ராணா, நிதிஷ் குமார் ரெட்டி, வாஷிங்டன் சுந்தர்.

Win Big, Make Your Cricket Tales Now