சர்வதேச கிரிக்கெட்டில் பல்வேறு சாதனைகளை படைத்த ரோஹித் சர்மா!

இங்கிலாந்து அணிக்கு எதிரான இரண்டாவது ஒருநாள் போட்டியில் சதமடித்து அசத்திய ரோஹித் சர்மா சர்வதேச கிரிக்கெட்டில் பல்வேறு சாதனைகளை படைத்துள்ளார்.

சர்வதேச கிரிக்கெட்டில் பல்வேறு சாதனைகளை படைத்த ரோஹித் சர்மா! (Image Source: Google)

இந்தியா - இங்கிலாந்து அணிகளுக்கு இடையேயான இரண்டாவது ஒருநாள் போட்டி கட்டாக்கில் நேற்று நடைபெற்றது. இப்போட்டியில் டாஸ் வென்று முதலில் பேட்டிங் செய்த இங்கிலாந்து அணியில் பென் டக்கெட் 65 ரன்களையும், ஜோ ரூட் 69 ரன்களை சேர்த்து ஆட்டமிழக்க, இறுதிவரை களத்தில் இருந்த லியாம் லிவிங்ஸ்டோன் 41 ரன்களையும் சேர்க்க, இங்கிலாந்து அணி 49.5 ஓவர்களில் 304 ரன்களுக்கு ஆல் அவுட்டானது. இந்திய அணி தரப்பில் ரவீந்திரா ஜடேஜா 3 விக்கெட்டுகளை வீழ்த்தினார்.

இதனையடுத்து 305 என்ற இலக்கை நோக்கி களமிறங்கிய இந்திய அணிக்கு கேப்டன் ரோஹித் சர்மா, துணைக்கேப்டன் ஷுப்மன் கில் இணை அபாரமான தொடக்கத்தைக் கொடுத்தனர். இதில் இருவரும் அரைசதம் கடந்ததுடன் முதல் விக்கெட்டிற்கு 136 ரன்கள் பாட்னர்ஷிப் அமைத்து அசத்தினர். அதன்பின் ஷுப்மன் கில் 60 ரன்களில் ஆட்டமிழந்தாலும், மறுமுனையில் அதிரடியாக விளையாடி வந்த ரோஹித் சர்மா தனது 32ஆவது ஒருநாள் சதத்தைப் பதிவுசெய்து அசத்தினார்.

பின் ரோஹித் சர்மா 119 ரன்களில் விக்கெட்டை இழக்க, அடுத்து களமிறங்கிய ஸ்ரேயாஸ் ஐயர் 44 ரன்களையும், அக்ஸர் படேல் 41 ரன்களையும் சேர்த்து அணிக்கு வெற்றியைத் தேடிக்கொடுத்தனர். இதன்மூலம் இந்திய அணி 44.3 ஓவர்களில் இலக்கை எட்டியதுடன் 4 விக்கெட் வித்தியாசத்தில் இங்கிலாந்தை வீழ்த்தி வெற்றிபெற்றதுடன் 2-0 என்ற கணக்கில் தொடரையும் வென்றது. இப்போட்டியில் சதமடித்து அசத்திய ரோஹித் சர்மா ஆட்டநாயகன் விருதை வென்றார். \

சிக்ஸர் சாதனை

இந்நிலையில், இந்த போட்டியின் மூலம் ரோஹித் சர்மா பல சாதனைகளையும் படைத்து அசத்தியுள்ளார். அதன்படி ஒருநாள் கிரிக்கெட்டில் அதிக சிக்ஸர்கள் அடித்த வீரர்கள் பட்டியலில் கிறிஸ் கெயிலை முந்தி ரோஹித் சர்மா இரண்டாவது இடத்தைப் பிடித்துள்ளார். முன்ந்தாக கிறிஸ் கெயில் 331 சிக்ஸர்கள் அடித்து இரண்டாம் இடத்தில் இருந்த நிலையில், தற்போது ரோஹித் சர்மா 338 சிக்ஸர்களை அடித்து இரண்டாம் இடத்தை பிடித்துள்ளார். இந்தப் பட்டியலில் பாகிஸ்தானின் ஷாஹித் அப்ரிடி 351 சிக்ஸர்களுடன் முதலிடத்தில் உள்ளார்.

ராகுல் டிராவிட் சாதனை முறியடிப்பு

இதுதவிர்த்து இப்போட்டியில் ரோஹித் சர்மா 119 ரன்களைச் சேர்த்ததன் மூலம் சர்வதேச ஒருநாள் போட்டிகளில் அதிக ரன்கள் எடுத்த இந்திய வீரர்கள் பட்டியலில் ராகுல் டிராவிட்டை முந்தி ரோஹித் சர்மா நான்காவது இடத்தைப் பிடித்துள்ளார். முன்னதாக ராகுல் டிராவிட் 318 இன்னிங்ஸ்களீல் 10,889 ரன்களைச் சேர்த்து நான்காம் இடத்தில் இருந்த நிலையில், தற்போது ரோஹித் சர்மா 259 இன்னிங்ஸ்களில் 10,987 ரன்களை எடுத்து நான்காம் இடத்திற்கு முன்னேறியுள்ளார். 

 

Rohit Sharma achieved several big milestones last night! pic.twitter.com/XZPDOA1HV3

— CRICKETNMORE (@cricketnmore) February 10, 2025

ஒருநாள் போட்டிகளில் அதிக ரன்கள் எடுத்த இந்திய வீரர்கள்

• 18426 - சச்சின் டெண்டுல்கர் (452 ​​இன்னிங்ஸ்)
• 13911 - விராட் கோலி (283 இன்னிங்ஸ்)*
• 11363 - சவுரவ் கங்குலி (300 இன்னிங்ஸ்)
• 10987 - ரோஹித் சர்மா (259 இன்னிங்ஸ்)*
• 10889 - ராகுல் டிராவிட் (318 இன்னிங்ஸ்)

அதிக சதங்கள்

இது தவிர, சர்வதேச கிரிக்கெட்டில் இந்தியாவுக்காக அதிக சதங்கள் அடித்த வீரர்கள் பட்டியலிலும் ராகுல் டிராவிட்டை முந்தி ரோஹித் சர்மா மூன்றாம் இடத்திற்கு முன்னேறியுள்ளார். முன்னதாக ராகுல் டிராவிட் 48 சதங்களை அடித்த நிலையில், தற்போது ரோஹித் சர்மா 49 சிக்ஸர்களுடன் மூன்றாம் இடத்திற்கு முன்னேறியுள்ளார். இந்த பட்டியலில் சச்சின் டெண்டுல்கர் 100 சதங்களுடன் முதலிடத்திலும், விராட் கோலி 81 சதங்களூடன் இரண்டாம் இடத்திலும் உள்ளது குறிப்பிடத்தக்கது. 

சச்சின் டெண்டுல்கரின் சாதனையை முறியடிப்பு

இப்போட்டியில் ரோஹித் சர்மா சதமடித்ததன் மூலம் ஒருநாள் போட்டிகளில் அதி வேகமாக 32 சதங்களை அடித்த வீரர்கள் பட்டியலில் முன்னால் ஜாம்பவான் சச்சின் டெண்டுல்கரை பின்னுக்கு தள்ளி இரண்டாவது இடத்தைப் பிடித்துள்ளார். முன்னதாக சச்சின் டெண்டுல்கர் 283 இன்னிங்ஸ்களில் 32 சதங்களை அடித்திருந்த நிலையில் ரோஹித் சர்மா 259 இன்னிங்ஸில் இந்த சாதனையைப் படைத்துள்ளார். இந்த பட்டியலில் விராட் கோலி 194 இன்னிங்ஸ்களுடன் முதலிடத்தில் உள்ளார்.

Win Big, Make Your Cricket Tales Now