ஐசிசி ஆண்டின் சிறந்த டெஸ்ட் வீரர் விருதை வென்ற ஜஸ்பிரித் பும்ரா!

ஒவ்வொரு ஆண்டின் இறுதியிலும் சர்வதேச கிரிக்கெட் கவுன்சிலானது ஆண்டின் சிறந்த வீரர், சிறந்த வீராங்கனை, சிறந்த ஒரு நாள் அணி, டி20 அணி, டெஸ்ட் அணி உள்ளிட்ட பல்வேறு விருதுகளை வழங்கி கௌரவித்து வருகிறது. அந்தவகையில் 2024 ஆண்டில் சிறப்பாக செயல்பட்ட வீரர்களை தேர்வு செய்யும் பணிகளில் ஐசிசி இறங்கியுள்ளது.

அதன் ஒரு பகுதியாக 2024ஆம் ஆண்டிற்கான ஐசிசி டெஸ்ட் வீரராக இந்திய வேகப்பந்து வீச்சாளர் ஜஸ்பிரித் பும்ரா தேர்வு செய்யப்பட்டுள்ளார். அதன்படி கடந்த ஆண்டில் ஜஸ்பிரித் பும்ரா 13 டெஸ்ட் போட்டிகளில் 357 ஓவர்கள் வீசி 14.92 என்ற சராசரியுடன் 71 விக்கெட்டுகளை வீழ்த்தியுள்ளார். இதன் மூலக் கடந்த 2024ஆம் ஆண்டில் அதிக டெஸ்ட் விக்கெட்டுகளை கைப்பற்றிய வீரராகவும் ஜஸ்பிரித் பும்ரா சதனை படைத்தது குறிப்பிடத்தக்கது. 

இந்த சாதனையின் மூலம், ஒரு காலண்டர் ஆண்டில் 70க்கும் மேற்பட்ட டெஸ்ட் விக்கெட்டுகளை வீழ்த்திய நான்காவது இந்திய பந்து வீச்சாளர் என்ற பெருமையை பும்ரா பெற்றார். இதற்கு முன் இந்திய ஜாம்பவான்களான ரவிச்சந்திரன் அஸ்வின், அனில் கும்ப்ளே மற்றும் கபில் தேவ் ஆகியோர் இந்த சாதனையை செய்துள்ளனர். இதன் காரணமாகவே தற்சமயம் ஆண்டின் சிறந்த டெஸ்ட் வீரருக்கான விருது பும்ராவுக்கு வழங்கப்பட்டுள்ளது. 

முன்னதாக 2024ஆம் ஆண்டிற்கான ஐசிசி சிறந்த டெஸ்ட் வீரருக்கான பரிந்துரைப் பட்டியலில் இலங்கையின் கமிந்து மெண்டிஸ் மற்றும் இங்கிலாந்து பேட்ஸ்மேன்கள் ஹாரி புரூக் மற்றும் ஜோ ரூட் ஆகியோருடன் ஜஸ்பிரித் பும்ராவின் பெயரும் இடம்பிடித்திருந்தது. இந்நிலையில் வாக்கெடுப்பின் அடிப்படையில் ஐசிசி ஆண்டின் சிறந்த டெஸ்ட் வீரருக்கான விருதானது ஜஸ்பிரித் பும்ராவுக்கு வழங்கப்பட்டுள்ளது குறிப்பிடத்தக்கது.

Also Read: Funding To Save Test Cricket

2024 ஆம் ஆண்டு பும்ராவுக்கு சிறப்பான ஆண்டாக அமைந்தது, ஏனெனில் அவர் இந்தியாவிலும் வெளிநாட்டிலும் தனது அற்புதமான பந்துவீச்சின் மூலம் எதிரணி பேட்டர்களை ஸ்தம்பிக்க வைத்தார். மேலும் இவரது பந்துவீச்சின் காரணமாக இந்திய அணி எதிவரும் உலக டெஸ்ட் சாம்பியன்ஷிப் தொடரின் இறுதிப்போட்டிக்கு மிக அருகில் இருந்த நிலையில், நியூசிலாந்து மற்றும் ஆஸ்திரேலிய தொடர்களில் சந்தித்த தோல்வி காரணமாக இறுதிப் போட்டிக்கு முன்னேறத் தவறியது குறிப்பிடத்தக்கது.