ஐசிசி ஆடவர் சாம்பியன்ஸ் கோப்பை கிரிக்கெட் தொடர் இறுதிக்கட்டத்தை எட்டியுள்ளது. இதில் ரோஹித் சர்மா தலைமையிலான இந்திய அணி இறுதிப்போட்டிக்கு முன்னேறிய நிலையில், மற்றொரு இடத்திற்கு நியூசிலாந்து - தென் ஆப்பிரிக்க அணிகளுக்கு இடையே கடும் போட்டி நிலவி வருகிறது.
இந்நிலையில் சர்வதேச கிரிக்கெட் கவுன்சில் ஒருநாள் வீரர்களுக்கான தரவரிசைப் பட்டியலில் இன்று வெளியிட்டுள்ளது. இதில் பேட்டர்களுக்கான தரவரிசைப் பட்டியலில் இந்திய அணியின் துணைக்கேப்டன் ஷுப்மன் கில் தொடர்ந்து முதலிடத்தில் நீடித்து வருகிறார். அவரைத்தொடர்ந்து பாகிஸ்தான் அணியின் பாபர் ஆசாம் இரண்டாம் இடத்தில் தொடரும் நிலையில் தென் ஆப்பிரிக்காவின் ஹென்ரிச் கிளாசென், இந்திய அணியின் விராட் கோலி ஆகியோர் தலா ஒரு இடம் முன்னேறியுள்ளார்.
அதேசமயம் முன்னதாக மூன்றாம் இடத்தில் இருந்த இந்திய அணி கேப்டன் ரோஹித் சர்மா இரண்டு இடங்கள் பின் தங்கி 5ஆம் இடத்திற்கு தள்ளப்பட்டுள்ளார். அவர்களைத் தொடர்ந்து அயர்லாந்தின் ஹேரி டெக்டர் 6ஆம் இடத்திலும், நியூசிலாந்தின் டேரில் மிட்செல் 7ஆம் இடத்திலும் உள்ள நிலையில், நடப்பு சாம்பியன்ஸ் கோப்பை தொடரில் அபாரமாக செயல்பட்டு வரும் இந்திய வீரர் ஸ்ரேயாஸ் ஐயர் ஒரு இடம் முன்னேறி 8ஆம் இடத்தைப் பிடித்துள்ளார்.
மேற்கொண்டு சாம்பியன்ஸ் கோப்பை தொடரில் அபாரமாக விளையாடிய ஆஃப்கானிஸ்தானின் இப்ராஹிம் ஸத்ரான் 13 இடங்கள் முன்னேறி 10ஆம் இடத்தைப் பிடித்துள்ள நிலையில், ஆஸ்திரேலியாவின் டிராவிஸ் ஹெட் ஒரு இடம் முன்னேறி 12ஆம் இடத்தையும், தென் ஆப்பிரிக்காவின் ரஸ்ஸி வேன்டர் டுசென் 14ஆம் இடத்தையும், இந்திய வீரர் கேஎல் ராகுல் 15ஆம் இடத்தையும் பிடித்துள்ளது குறிப்பிடத்தக்கது.
ஒருநாள் பந்துவீச்சாளர் தரவரிசையில் இலங்கை அணியின் மஹீஷ் தீக்ஷ்னா முதலிடத்தில் தொடரும் நிலையில், தென் ஆப்பிரிக்காவின் கேசவ் மஹாராஜ் இரண்டாம் இடத்திற்கும், நியூசிலாந்தின் மேட் ஹென்றி மூன்றாம் இடத்திற்கும் முன்னேறியுள்ளனர். இதில் இந்திய வீரர் குல்தீப் யாதவ் 3 இடங்கள் பின் தங்கி 6ஆம் இடத்திற்கு தள்ளப்பட்டுள்ள நிலையில், முகமது ஷமி மூன்று இடங்கள் முன்னேறி 11ஆவது இடத்தைப் பிடித்துள்ளார்.
மேற்கொண்டு ஆல்ரவுண்டர்களுக்கான தரவரிசைப் பட்டியலில் ஆஃப்கானிஸ்தானின் அஸ்மதுல்லா ஒமர்ஸாய் முதாலிடத்தைப் பிடித்துள்ள நிலையில், சக நாட்டவரான முகமது நபி இரண்டாம் இடத்திற்கு தள்ளப்பட்டுள்ளார். மேற்கொண்டு ஜிம்பாப்வேவின் சிக்கந்தர் ரஸா மூன்றாம் இடத்திலும், வங்கதேசத்தின் மெஹிதி ஹசன் நான்காம் இடத்திலும், நியூசிலாந்தின் மிட்செல் சான்ட்னர் 5ஆம் இடத்தியும் பிடித்துள்ளனர்.
Also Read: Funding To Save Test Cricket
இந்த பட்டியலில் இந்திய அணியின் ரவீந்திர ஜடேஜா 9ஆம் இடத்தில் நீடிக்கும் நிலையில், நடப்பு சாம்பியன்ஸ் கோப்பை தொடரில் அபார ஆட்டத்தை வெளிப்படுத்தி வரும் அக்ஸர் படேல் 17 இடங்கள் முன்னேறி 13ஆம் இடத்தைப் பிடித்துள்ளார். இதுதவிர்த்து தென் ஆப்பிரிக்காவின் மார்கோ ஜான்சன் 6 இடங்கள் முன்னேறி 15ஆம் இடத்திற்கும், இந்திய அணியின் ஹர்திக் பாண்டியா 3 இடங்கள் முன்னேறி 21ஆம் இடத்தியும் பிடித்துள்ளனர்.